ހުޅުމާލެ ދެވަނަ ފިޔަވަހީގައި ތަރައްގީ ކުރި 4،000 ފްލެޓްތަކުގައި ތިރިއަށް އުސޫލާއި ހިލާފަށް ކުނި އަޅާ ފަރާތްތަކަށް ފިޔަވަޅު އަޅާ ޖޫރިމަނާކުރަން ފަށައިފި އެވެ.

ފަހި ދިރިއުޅުން ކޯޕަރޭޝަނުން ބުނީ އެ ހައުސިން ޔުނިޓުތަކުގެ އާންމު ސަރަހައްދުތަކާއި، އިމާރާތްތަކުގެ ގްރައުންޑް ފްލޯ ހިމޭންހެން ކަނޑައެޅިފައިވާ އުސޫލުތަކާއި ހިލާފަށް ބައެއް ފަރާތްތަކުން ކުނި އަޅަމުންދާކަން އެކޯޕަރޭޝަނަށް ފާހަގަވެފައިވާ ކަމަށެވެ. އަދި އެގޮތަށް އުސޫލުން ބޭރުން ކުނި ޖަމާކުރުމުގެ ސަބަބުން ޓަވަރުތަކުގައި ދިރިއުޅޭ އެހެން އާއްމު ރައްޔިތުންގެ ޝަކުވާ ލިބެމުންދާ ކަމަށެވެ. މިއީ އެކޯޕަރޭޝަނުން ކަނޑައަޅައި އާންމުކޮށްފައިވާ ކުނި އުކާލުމުގެ ގަވާއިދާ ކަނޑައެޅިގެން ހިލާފަށް އަޅާފައިވާ ކުނި ކަމަށް އެކޯޕަރޭޝަނުން ވަނީ ބުނެފަ އެވެ.

މިކަމާ ބެހޭ ގޮތުން ސޯޝަލް މީޑިއާގައި ހިއްސާ ކުރި ޕޯސްޓެއްގައި އެފްޑީސީން ބުނީ، އަމާން ދޯދި މަޝްރޫއުގެ ދަށުން އިމާރާތްކޮށްފައިވާ 13 ޓަވަރަކުން މިހާތަނަށް ޖުމްލަ 460 ޓަނުގެ ކުނި ނަގާފައިވާ ކަމަށެވެ. އެއީ ގާތްގަނޑަކަށް 27 ޑަމްޕް ޓްރަކުގެ ކުނި ކަމަށެވެ. އަދި މިމަސައްކަތުގެ ދަށުން އަމާން އުދަރެސް އަދި ދޯދީގެ ޖުމްލަ 32 ޓަވަރު ސާފުކުރުމަށް ހަމަޖެހިފައިވާ ކަމަށެވެ. އެ ކުންފުނިން ވަނީ މި މަސައްކަތަށް ޓަވަރުތަކުގައި ދިރިއުޅޭ މީހުން ފުރިހަމައަށް އެއްބާރުލުން ދިނުމަށާއި، ކުނި އުކާލުމުގައި އެފްޑީސީން ކަނޑައަޅާފައިވާ އުސޫލުތަކަށް ފުރިހަމައަށް ބޯލެނބުމަށް އިލްތިމާސް ކޮށްފަ އެވެ.

އެފްޑީސީން ވަނީ ކުނި އުކާލުމަށް ހާއްސަ ސަރަހައްދުތައް އެފްލެޓްތަކުގައި ކަނޑައަޅާފަ އެވެ. އެގޮތުން އިމާރާތްތަކުގެ ކޮރިޑޯތަކާއި ހިނގާ މަގުތަކުގެ އިތުރުން ޓަވަރުތަކުގެ ބޭރު ސަރަހައްދުތަކަށް ކުނި އެޅުމާއި، ކުނި ޖަމާކުރުމަކީ މަނާކަމެއް ކަމަށެވެ. އަދި ގޭބިސީތަކުން އުފެދޭ ކުނި އުކާލަން ވާނީ ހަމައެކަނި ގްރައުންޑް ފްލޯގައި ހުންނަ ގާބޭޖު ރޫމްތަކުގައި އެކަމަށް ހާއްސަކޮށްފައި ހުންނަ ކުނިވަށިތަކަށެވެ. މީގެއިތުރުން ޔުނިޓުތަކަށް އަލަށް ބަދަލުވާއިރު، އުފެދޭ ފޮށިގަނޑުތަކާއި، ފުޅިމަދު އަދި އެނޫންވެސް ތަކެތި އުސޫލުތަކާއި އެއްގޮތަށް އުކާލުމަކީ ޔުނިޓެއްގެ ވެރިފަރާތުގެ ޒިންމާއެއް ކަމަށް އެފްޑީސީން ބުނެއެވެ.

އެހެންކަމުން މި އުސޫލުތަކާއި ހިލާފަށް އަމަލު ކުރާ ފަރާތްތަކަށް އެފްޑީސީން ފިޔަވަޅު އަޅާ ޖޫރިމަނާ ކުރާނެ ކަމަށް އެފްޑީސީން ވަނީ ބުނެފަ އެވެ.