މާލޭގައި އަލަށް ބިނާކުރި މަސްޖިދުލް ޔޫސުފުލް ބަރުބަރީ މިސްކިތް މިމަހުގެ 16 ވާ އާދީއްތަ ދުވަހު ރަސްމީކޮށް ހުޅުވުމަށް ހަމަޖެހިފައިވާ ކަމަށް އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓަރު ވިދާޅުވީ، ބަރުބަރީ މިސްކިތް ރަސްމީކޮށް ހުޅުވުމަށް ހަމަޖެހިފައިވަނީ އެ ދުވަހުގެ އަސްރު ނަމާދަށް ކަމަށެވެ. ތިން ބުރިއަށް އިމާރާތްކޮށްފައިވާ މި މިސްކިތަކީ އެއްފަހަރާ 1،400 މީހުންނަށް ނަމާދު ކުރެވޭނެހާ ޖާގަ ތަނަވަސް މިސްކިތެކެވެ. މި މިސްކިތް ބިނާކުރުމުގެ މަސައްކަތް އިސްލާމިކް މިނިސްޓްރީއިން އަމިއްލަ ފަރާތަކާ ހަވާލުކޮށް، އެކަމުގެ އެއްބަސްވުމުގައި ސޮއިކޮށްފައިވަނީ މިދިޔަ އަހަރުގެ ޖަނަވަރީ މަހުގެ ތެރޭގަ އެވެ.

ރާއްޖޭގެ އެކި ކަންކޮޅުތަކުގައި ނަމާދުކުރާނެ ޖާގަ އިތުރުކުރުމަށް ސަރުކާރުން ކުރިއަށްގެންދާ މަޝްރޫއުތަކާ ގުޅޭގޮތުން ވާހަކަފުޅު ދައްކަވަމުން މިނިސްޓަރު ވިދާޅުވީ، މި އަހަރުގެ ތެރޭގައި އިތުރު ގިނަ މިސްކިތްތަކެއް ހުޅުވުމަށް ނިންމާފައިވާ ކަމަށެވެ. އެގޮތުން ވިލިމާލެ މަސްޖިދުއްސަލާމް އަދި މާލޭގެ ޒިކުރާ މިސްކިތުގެ އަމަލީ މަސައްކަތް ރަމަޟާން މަހުގެ ފަހުން ފެށިގެންދާނެ ކަމަށް ވިދާޅުވި އެވެ. މި ދެ މިސްކިތުގެ މަސައްކަތް މިހާރު މަޑުޖައްސާލާފައިވަނީ ރަމަޟާން މަސް ކައިރިވެފައި އޮތުމުން، މިސްކިތްތައް ތަޅާލައިފިނަމަ އާންމު ރައްޔިތުންނަށް ދަތިތަކާ ކުރިމަތިވެދާނެތީ ކަމަށް މިނިސްޓަރު ފާހަގަކުރެއްވި އެވެ.

މީގެ އިތުރުން، މި ދެ މިސްކިތް ޒަމާނީ ފެންވަރަށް ތަރައްގީ ކުރުމަށް މިހާރު ސްޕޮންސާ ލިބިފައިވާ ކަމަށްވެސް ޑރ. ޝަހީމް ވިދާޅުވިއެވެ. މިނިސްޓަރު އިތުރަށް ވިދާޅުވީ، މިހާރު މާލެ ސަރަހައްދުގައި ހުރި ބާ މިސްކިތްތަކުގެ ތެރެއިން ދެން ހުރީ ހެންވޭރު އަފީފުއްދީން މިސްކިތް އެކަނި ކަމަށާއި، އެ މިސްކިތަށްވެސް އެހީ ހަމަޖެހިގެންދާނެ ކަމަށެވެ. އަދި މާފަންނު ބޮޑުގެ މިސްކިތުގެ މަސައްކަތް ބާރަށް ކުރިއަށްދާ ކަމަށާއި، އަންނަ އަހަރުގެ ރޯދަ މަހަށް އެ މިސްކިތުގެ މަސައްކަތް ނިންމާލެވޭނެ ކަމަށް މިނިސްޓަރު ލަފާކުރެއްވި އެވެ.

ރާއްޖޭގެ ދީނީ ތާރީހާއި އާސާރީ ތަންތަނާ ގުޅޭގޮތުން ވާހަކަފުޅު ދައްކަވަމުން ވަޒީރު ވިދާޅުވީ، ރާއްޖޭގައި ހުރި ހިރިގަލުގެ އާސާރީ މިސްކިތްތައް އާސާރީ ތަންތަނުގެ ގޮތުގައި ރައްކާތެރިކަމާއެކު ދަމަހައްޓާނެ ކަމުގެ ޔަގީންކަން ދެއްވާ ކަމަށެވެ.