ދިވެހިރާއްޖޭގެ ޙައްޖު މިޝަންގެ ފަރާތުން ސަޢުދީ ޢަރަބިއްޔާގެ މިނިސްޓްރީ އޮފް ޙައްޖު އެންޑް ޢުމްރާއާއި މުހިއްމު ބައްދަލުކުރެއްވުމެއް ބާއްވައިފިއެވެ. ޖިއްދާގައި ހުންނަ އެ މިނިސްޓްރީގެ ހެޑްކުއާޓާގައި ބޭއްވުނު މި ބައްދަލުކުރެއްވުމުގެ މައިގަނޑު މަޤްޞަދަކީ ދިވެހި ޙައްޖުވެރިންގެ ކަންކަން އިތުރަށް ހަރުދަނާކުރުމާއި، ދިމާވާ ގޮންޖެހުންތަކަށް ޙައްލު ހޯދުމެވެ.

މި ބައްދަލުކުރެއްވުމުގައި މައްކާގައި ޤާއިމުކޮށްފައިވާ ދިވެހި ޙައްޖުވެރިންނަށް ޚިދުމަތްދޭ އޮފީހުގެ ވެރިޔާ އައްޝައިޚް އިމްތިޠާއު ޢައްބާސް އާއި ޙައްޖު މިޝަންގެ އިސް މެންބަރުން ބައިވެރިވެވަޑައިގެންނެވިއެވެ. ދިވެހި ވަފުދުން ވަނީ ސަޢުދީގެ ޙައްޖާ ބެހޭ ކަންތައްތަކުގެ ޖެނެރަލް ސެކްރެޓަރީގެ އިތުރުން، ޙައްޖުގެ ކަންކަން ބަލަހައްޓަވާ ޑިރެކްޓަރ ޖެނެރަލް އަދި ދިވެހިރާއްޖެއަށް ކަނޑައަޅުއްވާފައި ހުންނަވާ ޚާއްސަ މަންދޫބާ ވެސް ބައްދަލުކުރައްވާފައެވެ.

މި ބައްދަލުވުމުގައި ދިވެހި ޙައްޖު މިޝަނުން ވަނީ ސަޢުދީ ސަރުކާރުން ދިވެހި ސަރުކާރާ މެދު ބަހައްޓަވާ ގާތްކަމާއި، ޚާއްޞަކޮށް ޙާޖީންގެ އިންތިޒާމުތައް ފުރިހަމަކުރުމަށް ކުރައްވާ ބުރަ މަސައްކަތްތައް ފާހަގަކޮށް ޝުކުރު އަދާކުރައްވާފައެވެ. މީގެ އިތުރުން، ޙައްޖުވެރިންނަށް މިހާރު ދިމާވަމުންދާ އެކިއެކި ގޮންޖެހުންތަކާ ގުޅޭގޮތުން ފުޅާ ދާއިރާއެއްގައި މަޝްވަރާކޮށް، ޚިދުމަތްތައް އިތުރަށް ރަނގަޅު ކުރެވޭނެ ގޮތްތަކާ ބެހޭގޮތުން ޚިޔާލު ބަދަލުކުރެވުނެވެ.

ދިވެހި ޙައްޖު މިޝަނަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޙައްޖުވެރިންގެ ކަންކަން އެންމެ މަތީ ފަންތީގައި ވިލަރެސްކުރުމަށް ކަނޑައަޅުއްވާފައިވާ ވަފުދެކެވެ. ދިވެހި ޙައްޖުވެރިންނާ ގުޅޭ އެންމެހާ އިންތިޒާމުތައް ފުރިހަމަކުރުމާއި، މަސައްކަތްތައް ކުރިއަށްދާ ގޮތް ގާތުން ބެލުމުގެ އިތުރުން، ޙައްޖުވެރިންނަށް ދެވޭ ޚިދުމަތްތައް މެދުނުކެނޑި ވިލަރެސްކުރުމަކީ މި މިޝަންގެ އެންމެ މުހިއްމު ޒިންމާއެވެ.