ޔަމަނުގެ ޙޫޘީ ޖަމާޢަތުން ސަޢޫދީ އަރަބިއްޔާގެ ވެރިރަށް ރިޔާޟަށް އަމާޒުކޮށް ފޮނުވާލި މިސައިލެއް ސަޢޫދީ އިސްވެ އޮންނަ ކޯލިޝަންގެ ވައިގެ ދިފާޢީ ނިޒާމުން ހުއްޓުވައި ގޮއްވާލުމާ ގުޅިގެން، މިސައިލްގެ ބައިތައް ވެއްޓި މާއްދީ ގެއްލުންތަކެއް ލިބިފައިވާ ކަމަށް ސަޢޫދީ މީޑިއާތަކުން ރިޕޯޓްކޮށްފިއެވެ. ސަޢޫދީގެ ސިވިލް ޑިފެންސް އިދާރާއިން ބުނި ގޮތުގައި ފަތިހު ނުރައްކަލުގެ އިންޒާރުގެ މެސެޖު ފޯނުތަކަށް ފޮނުވުމާއެކު އަލްސުލައްޔިލް އަދި ރިޔާޟްގެ އެކި ސަރަޙައްދުތަކުގައި އިންޒާރުގެ ސައިރަންގެ އަޑު ވަނީ އިވިފައެވެ. އޭގެ ތިން މިނެޓެއްހާއިރު ފަހުން ބާރުގަދަ ގޮވުމެއްގެ އަޑު އިވުނު ކަމަށް މަންޒަރު ދުށް މީހުން ބުނެއެވެ.
ސަޢޫދީ ކޯލިޝަންގެ ތަރުޖަމާނު މޭޖަރ ޖެނެރަލް ތުރުކީ އަލްމާލިކީ ނެރުއްވި ބަޔާނެއްގައި ވިދާޅުވީ، ޙޫޘީން ފޮނުވާލި މިސައިލް ކާމިޔާބުކަމާއެކު ވައިގެ ތެރޭގައި ނައްތާލެވިފައިވާ ކަމަށާއި، ނަމަވެސް ގޮވި މިސައިލްގެ އެތިކޮޅުތައް ބިމަށް ވެއްޓުމުގެ ސަބަބުން ލިބުނު މާއްދީ ގެއްލުންތައް ކަމާބެހޭ އިދާރާތަކުން މިހާރު ވަޒަންކުރަމުންދާ ކަމަށެވެ.
ސަޢޫދީގެ ނޫހެއް ކަމަށްވާ އަރަބް ނިއުސް އިން ރިޕޯޓްކޮށްފައިވާ ގޮތުގައި މި ހާދިސާގައި އެއްވެސް މީހެއްގެ ފުރާނައަށް ގެއްލުމެއް ލިބުނު ކަމުގެ މަޢުލޫމާތެއް އަދި ލިބިފައެއް ނުވެއެވެ. އަދި ކުޑައިރުކޮޅެއްގެ ތެރޭގައި ނުރައްކާ ފިލައިފިކަން އަންގައި ސިވިލް ޑިފެންސުން ވަނީ އާންމުންނަށް މެސެޖު ފޮނުވާފައެވެ.
މި ހަމަލާއަށް ރައްދުދިނުމުގެ ގޮތުން، ޔަމަނުގެ ޛަމާރު އަދި ޞަޢުދާ ޕްރޮވިންސްގައި ޙޫޘީން ބެލިސްޓިކް މިސައިލް ފޮނުވުމަށް ބޭނުންކުރާ ދެ ލޯންޗު ޕްލެޓްފޯމެއް ސަޢޫދީ ކޯލިޝަނުން ވަނީ ވައިގެ ހަމަލާދީ ހަލާކުކޮށްލާފައެވެ. ފާއިތުވި ހަފުތާތަކުގައި ޙޫޘީން ދަނީ ރިޔާޟްގެ އެއާޕޯޓާއި ތެޔޮ ކާރުޚާނާތަކަށް އަމާޒުކޮށް ހަމަލާތައް ވަރުގަދަކުރަމުންނެވެ. އެހެންކަމުން ސަޢޫދީ ސަރުކާރުން ވަނީ ޤައުމުގެ ރައްޔިތުންނާއި މުހިންމު ބިނާތައް ޙިމާޔަތްކުރުމަށް އަޅަންޖެހޭ ހުރިހާ ފިޔަވަޅެއް އަޅާނެ ކަމުގެ ޔަޤީންކަން ދީފައެވެ.




