ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގައި ވާދަކުރާ ކެންޑިޑޭޓުންގެ މެދުގައި ގުރުއަތުލުން މި ހަފްތާގެ ބުރާސްފަތި ދުވަހު ބޭއްވުމަށް އިލެކްޝަންސް ކޮމިޝަނުން ނިންމައިފި އެވެ.
އޭޕްރީލް މަހުގެ ހަތަރު ވަނަ ދުވަހު ބޭއްވުމަށް ހަމަޖެހިފައިވާ މި އިންތިހާބުގައި ޖުމްލަ 2،994 ކެންޑިޑޭޓުން ވާދަކުރެ އެވެ. އިންތިހާބުގެ ކަންކަން ވަކި ޓައިމްލައިނެއްގެ ތެރެއިން ކުރިއަށްދާއިރު، ކެންޑިޑޭޓުންގެ ނަންބަރު ތަރުތީބުކުރުމަށް ބާއްވާ ގުރުއަތުލުމާ ހަމައަށް ނަން އަނބުރާ ގެންދަން ބޭނުންވާ ފަރާތްތަކަށް އެ ފުރުސަތު އީސީން ވަނީ ދީފަ އެވެ. އިންތިހާބާ ގުޅޭ ޝަކުވާތައް ބަލައިގަތުމަށް ގައުމީ އިލެކްޝަންސް ކޮމްޕްލެއިންޓްސް ބިއުރޯ ގާއިމްކޮށްފައިވާއިރު، މިހާތަނަށް ހުށަހެޅި ހަތަރު ޝަކުވާއަކަށް ކޮމިޝަނުން ވަނީ ޖަވާބު ދީފަ އެވެ.
މިފަހަރުގެ އިންތިހާބުގައި ހަ ސިޔާސީ ޕާޓީއަކުން ވާދަކުރާއިރު، އެންމެ ގިނަ ކެންޑިޑޭޓުން ކުރިމަތިލާފައިވަނީ ވެރިކަންކުރާ ކޮންގްރެސް ޕާޓީންނެވެ. އެ ޕާޓީން ކައުންސިލް އިންތިހާބުގައި 665 ކެންޑިޑޭޓުން ވާދަކުރެ އެވެ. ޖުމްލަ ގޮތެއްގައި ސިޔާސީ ޕާޓީތަކުން 1،210 ކެންޑިޑޭޓުން ވާދަކުރާއިރު، އަމިއްލަ ގޮތުން 401 ކެންޑިޑޭޓުން ވާދަކުރެ އެވެ. ބައެއް ދާއިރާތަކަށް އިންތިހާބަކާ ނުލައި ބައެއް ބޭފުޅުން ހޮވިފައިވީ ނަމަވެސް، އެކަން މުޅިން ސާފުވާނީ ބުރާސްފަތި ދުވަހުގެ ގުރުއަތުލުމަށްފަހުގަ އެވެ.
މި އިންތިހާބުގައި ރަށު ކައުންސިލްތަކަށް 626 އަދި ސިޓީ ކައުންސިލްތަކަށް 52 ކައުންސިލަރުން އިންތިހާބު ކުރާނެ އެވެ. އިންތިހާބުގައި ވޯޓުލުމުގެ ހައްގު ޖުމްލަ 294,937 މީހުންނަށް ލިބިގެންވެ އެވެ. އޭގެ ތެރޭގައި ހިމެނެނީ 144,527 އަންހެނުންނާއި 150,410 ފިރިހެނުންނެވެ. ވޯޓުލާ މީހުންގެ ފައިނަލް ލިސްޓު އާންމުކުރުމަށް ހަމަޖެހިފައިވަނީ ރީ-ރަޖިސްޓްރޭޝަން މަރުހަލާއަށްފަހުގަ އެވެ.
އިންތިހާބު އޮބްޒާވްކުރުމަށް ބޭރުގެ ފަރާތްތަކަށް މި މަހުގެ 18 ވަނަ ދުވަހުގެ ނިޔަލަށް ވަނީ ފުރުސަތު ހުޅުވާލާފަ އެވެ.
