ރިއަލިޓީ ޓީވީ ތަރި މޮލީ-މޭ ހޭގް، އޭނާ ދެވަނަ ދަރިފުޅަށް ބަނޑު ބޮޑުކަން ރަސްމީކޮށް ހާމަކޮށްފި އެވެ. މި އުފާވެރި ހަބަރު އޭނާ ހިއްސާކޮށްފައިވަނީ އިންސްޓަގްރާމްގައި އާންމުކުރި ވީޑިއޯއަކާއެކުގަ އެވެ.

މިކަން ހާމަކުރުމުގެ ގޮތުން އިންސްޓަގްރާމްގައި އާންމުކުރި ވީޑިއޯއާއެކު މޮލީ-މޭ ލިޔެފައިވަނީ "އަވަސް މުސްތަގުބަލެއްގައި ހަތަރު މީހުންނަށް" ވާނެ ކަމަށެވެ. އެ ވީޑިއޯއިން ފެންނަނީ މޮލީ-މޭ އޭނާގެ ބައިވެރިޔާ، މަޝްހޫރު ބޮކްސިން ތަރި ޓޮމީ ފިއުރީ އާއި އެމީހުންގެ ތިން އަހަރުގެ ދަރިފުޅު ބެމްބީއާއެކު ގޭގައި އުފާވެރި ވަގުތުކޮޅެއް ހޭދަކުރާ މަންޒަރެވެ.

މޮލީ-މޭ އަކީ މީގެ ކުރިންވެސް ބަނޑު ބޮޑުވުމާއި، ވިހެއުމާއި، އަދި ދަރިން ބެލުމުގައި ދިމާވާ ގޮންޖެހުންތަކާއި އުނދަގޫތަކުގެ ވާހަކަ ފާޅުކަން ބޮޑު ގޮތެއްގައި އޭނާގެ ސަޕޯޓަރުންނާ ހިއްސާކުރާ މީހެކެވެ. އޭނާ ބުނެފައިވާ ގޮތުގައި ފުރަތަމަ ދަރިފުޅު ލިބުމަށްފަހު އުޅެންޖެހުނު ދުވަސްތަކަކީ ވަރަށް ގޮންޖެހުން ބޮޑު ދުވަސްތަކެކެވެ. ހާއްސަކޮށް ފުރަތަމަ ދަރިފުޅު ބެމްބީއަށް ބަނޑު ބޮޑުއިރު، ނަފްސާނީ ގޮތުންނާއި ޖިސްމާނީ ގޮތުން ގިނަ އުނދަގޫތަކެއް ތަހައްމަލު ކުރަން ޖެހުނު ކަމަށާއި، ވިހެއުމުގެ ތެރޭގައި ކެތްނުކުރެވޭ ވަރުގެ ވޭން ތަހައްމަލު ކުރަން ޖެހުނު ކަމަށްވެސް އޭނާ ބުންޏެވެ.

މޮލީ-މޭ ދެވަނަ ދަރިފުޅަށް ބަނޑު ބޮޑުވި ހަބަރާއެކު ގިނަ ބަޔަކު އަންނަނީ އޭނާއަށް މަރުހަބާ ކިޔަމުންނެވެ. މިގޮތުން ފިއުރީގެ އާއިލާ މެންބަރެއް ކަމަށްވާ ޕެރިސް އާއި، ޓީވީ ޕްރެޒެންޓަރު ރޮޝެލް ހިއުމްސްގެ އިތުރުން ސްކާލެޓް މޮފަޓް ފަދަ މަޝްހޫރު ފަރާތްތަކުން ވަނީ އުފާވެރި މެސެޖުތަކެއް ހިއްސާކޮށްފަ އެވެ.

މޮލީ-މޭ އާއި ފިއުރީގެ ގުޅުން ފެށުނީ 2019 ވަނަ އަހަރުގެ "ލަވް އައިލެންޑް" ޝޯގެ ތެރެއިންނެވެ. 2023 ވަނަ އަހަރު އެމީހުންގެ ފުރަތަމަ ދަރިފުޅު ލިބި، އެ އަހަރު އެންގޭޖްވެސް ވިއެވެ. ނަމަވެސް އޭގެ ފަހުން ދެމީހުން ވަކިވުމުން، މޮލީ-މޭ އޭރު ބުނެފައިވަނީ އެމީހުންގެ ގުޅުން މިފަދަ ގޮތަކަށް ނިމިދާނެ ކަމަށް ދުވަހަކުވެސް ހީނުކުރާ ކަމަށެވެ.

ކުރީގެ ހެވީވޭޓް ޗެމްޕިއަން ޓައިސަން ފިއުރީގެ ކޮއްކޮ، ޓޮމީ ފިއުރީ ބުނެފައިވާ ގޮތުގައި، ލިބުނު އަނިޔާއަކާ ގުޅިގެން ބޯން ފެށުމަކީ އެމީހުންގެ ގުޅުން ކެނޑެން މެދުވެރިވި މައިގަނޑު ސަބަބެވެ. އެހެންނަމަވެސް، މިހާރު ފިއުރީ އެ އާދަ ހުއްޓާލާފައިވާތީ، ދެމީހުންގެ ގުޅުން އަލުން ރަނގަޅުވެފައިވާ ކަމަށް މޮލީ-މޭ ވަނީ ކަށަވަރުކޮށްދީފަ އެވެ.