ދިވެހި ކުޅިވަރު ކުޅުންތެރިންނަށް ހާއްސަ ހެލްތު އިންޝުއަރެންސްގެ ހިދުމަތް ފޯރުކޮށްދޭން މިއަދު ރަސްމީކޮށް ފަށައިފިކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއުލާނުކުރައްވައިފި އެވެ.
އެކްސްގައި ކުރެއްވި ފޯޓްސެއްގައި ރައީސް ވިދާޅުވީ، ރާއްޖޭގެ ގައުމީ 18 ކުޅިވަރު އެސޯސިއޭޝަނެއްގެ 385 ކުޅުންތެރިންނާއި އޮފިޝަލުންނަށް މި ހެލްތު އިންޝުއަރެންސްގެ ހިދުމަތް ލިބޭނެ އިންތިޒާމު މިހާރު ހަމަޖެހިފައިވާ ކަމަށެވެ.
ކުޅުންތެރިންގެ ސިއްހީ ރައްކާތެރިކަން ކަށަވަރުކުރުމަށްޓަކައި ތައާރަފުކުރި މި ހިދުމަތަކީ، ދިވެހި ކުޅިވަރުގެ އާއިލާއިން އެދެމުންދާތާ އެތައް އަހަރެއް ވެފައިވާ މުހިންމު ކަމެއްކަން ރައީސް ފާހަގަކުރެއްވި އެވެ. މި އިންޝުއަރެންސްގެ ދަށުން ކުޅުންތެރިންނަށް ގިނަގުނަ ލުއިފަސޭހަތަކެއް ލިބިގެންދާނެ އެވެ.
Advertisement
އެގޮތުން، ރާއްޖޭގައި ބާއްވާ އެކި މުބާރާތްތަކުގެ އިތުރުން، ރާއްޖެއިން ބޭރުގައި ބާއްވާ ބައިނަލްއަގްވާމީ މުބާރާތްތަކާއި ތަމްރީނުތަކުގައި ލިބޭ އަނިޔާތަކަށް ފަރުވާ ހޯދުމުގައި ބޮޑެތި ލުއިތަކެއް މި ސްކީމުގެ ތެރެއިން ލިބިގެންދާނެ އެވެ. މިއީ ދިވެހި އެތުލީޓުންގެ ސިއްހީ ރައްކާތެރިކަން ކަށަވަރުކޮށް، ކުޅިވަރުގެ މައިދާނުގައި އެ ކުޅުންތެރިންނަށް އިތުރު ހިތްވަރެއް ދިނުމުގެ މަގްސަދުގައި ސަރުކާރުން ފެށި މުހިންމު މަސައްކަތެކެވެ.
މި އިންޝުއަރެންސްގެ ސަބަބުން ކުޅިވަރު ކުޅުންތެރިންނަށް ދިމާވާ އަނިޔާތަކަށް ފަރުވާ ހޯދުމުގައި މާލީ ގޮތުން އުފުލަންޖެހޭ ބުރަ ކުޑަވެ، ފެންވަރު ރަނގަޅު ސިއްހީ ފަރުވާގެ ކަށަވަރުކަން ލިބިގެންދާނެ ކަމަށް ރައީސް ވިދާޅުވި އެވެ.
