ސްރީލަންކާގެ 78 ވަނަ މިނިވަން ދުވަހުގެ މުނާސަބަތުގައި އެ ގައުމުގެ ރައީސް އަނޫރާ ކުމާރާ ޑިސަނާޔަކެއަށާއި، ބޮޑުވަޒީރު ޑރ. ހަރިނީ އަމަރަސޫރިޔާ އަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ތަހުނިޔާ ފޮނުއްވައިފި އެވެ.
ރައީސް ޑިސަނާޔަކެ އަށް ފޮނުއްވި ސިޓީފުޅުގައި ރައީސުލްޖުމްހޫރިއްޔާ ވަނީ، މި އަހަރުގެ މިނިވަން ދުވަސް ސްރީލަންކާއާ ބައްދަލުކުރަނީ، އެ ގައުމުގެ އިގުތިސާދު އިތުރަށް ހަރުދަނާކުރުމުގައްޔާއި، އެ ގައުމުގައި އިޖުތިމާއީ ހަމަޖެހުން ގާއިމުކުރުމުގައްޔާއި، ގައުމީ ކުރިއެރުމުގައި، އެ ގައުމުން ވިލުންތެރިކަން ދައްކަމުންދާ ދަނޑިވަޅެއްގައިކަން ފާހަގަކުރައްވާފަ އެވެ. އަދި ދެ ގައުމުން ހިއްސާކުރާ ސަރަހައްދީ އަހުމިއްޔަތުތަކާއި އެއްބައިވަންތަކަމުގެ ތާރީހުން ބާރުދޭ، ދެ ގައުމުގެ ޒަމާންވީ ރަހުމަތްތެރިކަންވެސް އެމަނިކުފާނު ފާހަގަކުރެއްވި އެވެ.
ބޮޑުވަޒީރު ޑރ. އަމަރަސޫރިޔާ އަށް ފޮނުއްވި ސިޓީފުޅުގައި ރައީސުލްޖުމްހޫރިއްޔާ ވަނީ، ދެ ގައުމުން ހިއްސާކުރާ ރަހުމަތްތެރިކަމާއި އެއްބައިވަންތަކަން ފާހަގަކުރައްވައި، ދެ ގައުމުގެ ގުޅުން އިތުރަށް ހަރުދަނާވާނޭކަމަށް ޔަގީންކުރައްވާފަ އެވެ. ހާއްސަކޮށް، ދެ ގައުމުން މަސްލަހަތު ހިއްސާކުރާ ދާއިރާތައްކަމުގައިވާ ވިޔަފާރި، ތަރައްގީ އަދި ސަރަހައްދީ ހަމަޖެހުން ގާއިމުކުރުން ފަދަ ދާއިރާތަކުން ދެ ގައުމުގެ ގުޅުން ބަދަހިވަމުންދާނޭ ކަމަށް ޔަގީންކުރައްވާކަމަށް އެމަނިކުފާނު ވިދާޅުވި އެވެ.
މީގެ އިތުރުން، ރައީސުލްޖުމްހޫރިއްޔާ ވަނީ އެކްސްގައި ކުރެއްވި ޕޯސްޓެއްގައި، ދެ ގައުމުގެ އެތައް ގަރުނެއްވީ ގުޅުންތަކުގެ މައްޗަށް އަލިއަޅުއްވާލައްވައި، ސްރީލަންކާއަކީ ދިވެހިރާއްޖޭގެ އެންމެ ގާތް އަދި އެންމެ އިތުބާރުކުރެވޭ ރަހުމަތްތެރީންގެ ތެރޭގައި ހިމެނޭ ގައުމެއްގެ ގޮތުގައި ސިފަކުރައްވާފައެވެ. އެމަނިކުފާނު ވަނީ ރައީސް ޑިސަނާޔަކެ އާއި ބޮޑުވަޒީރު ޑރ. އަމަރަސޫރިޔާ އަށް ދުޅަހެޔޮކަމާއި ފުރިހަމަ ސިއްހަތަކަށް އެދިވަޑައިގެން، ސްރީލަންކާގެ ރައްޔިތުންނަށް އަމަންއަމާންކަމާއި ތަރައްގީ އާއި ފާގަތިކަން ލިބެމުންދިއުމަށް އެދިވަޑައިގެންފަ އެވެ.
ކޮންމެ އަހަރެއްގެ ފެބުރުއަރީ މަހުގެ ހަތަރު ވަނަ ދުވަސް ސްރީލަންކާގެ މިނިވަން ދުވަހުގެ ގޮތުގައި ފާހަގަކުރަނީ، 1948 ވަނަ އަހަރު، އިނގިރޭސި އިސްތިއުމާރުން އެ ގައުމަށް މިނިވަންކަން ލިބުނު ތާރީހީ ދުވަހުގެ ހަނދާން އާކުރުމުގެ ގޮތުންނެވެ.
