މި ސަރުކާރުގެ 'މޯލްޑިވްސް 2.0' ޑިޖިޓަލް ޓްރާންސްފޮމޭޝަން އެޖެންޑާގެ ދަށުން، ރާއްޖޭގައި އޭއައި އަދި ޑޭޓާ ކޮމްޕިޓެންސީ ސެންޓަރެއް ގާއިމުކުރުމަށް މޯލްޑިވްސް އިނޮވޭޝަން އެންޑް ޑިޖިޓަލް ކޮމްޕެނީ (މައިންޑްކޯ) އާއި ބޭންކް އޮފް މޯލްޑިވްސް (ބީއެމްއެލް) ގުޅިގެން މަސައްކަތް ކުރުމަށް އެގްރީމަންޓެއްގައި ސޮއިކޮށްފި އެވެ.
މި އެއްބަސްވުމުގައި މައިންޑްކޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ސައީދާ އުމަރެވެ. ބީއެމްއެލްގެ ފަރާތުން ސޮއިކުރެއްވީ އެ ބޭންކުގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފެވެ.
މި މަޝްރޫއަކީ ސަރުކާރުގެ ހިންގުން ހަރުދަނާކުރުމަށާއި، އާންމު ހިދުމަތްތައް ދިނުމުގައި އާޓިފިޝަލް އިންޓެލިޖެންސް (އޭއައި) އާއި ޑޭޓާގެ ބޭނުން ހިފުމަށް ރައީސުލްޖުމްހޫރިއްޔާ ގެންގުޅުއްވާ ތަސައްވުރު ހަގީގަތަކަށް ހެދުމަށް ފެށި ގައުމީ ފެންވަރުގެ މަސައްކަތެކެވެ. މި ސެންޓަރަކީ ދައުލަތުގެ އިދާރާތަކަށާއި އިގްތިސާދީ މުހިންމު ދާއިރާތަކަށް ރައްކާތެރި އަދި ޒިންމާދާރު ގޮތެއްގައި ޑޭޓާއާއި އޭއައި ބޭނުންކުރުމަށް އެހީތެރިވެދޭނެ މަރުކަޒެކެވެ.
Advertisement
ބީއެމްއެލްއިން ފާހަގަކުރި ގޮތުގައި، މި ސެންޓަރުގެ މައިގަނޑު އަމާޒަކީ ގައުމުގެ ތަރައްގީގައި އިސްކަންދޭ ކަންތައްތައް ހާސިލްކުރުމަށްޓަކައި އާންމު ހިދުމަތްތައް ރަނގަޅުކުރުމާއި، މުއައްސަސާތަކުގެ ގާބިލުކަން އިތުރުކުރުމެވެ. މީގެ އިތުރުން، ސަރުކާރުގެ އެކި ދާއިރާތަކަށް ދިމާވާ ގޮންޖެހުންތަކަށް އަމަލީ ހައްލެއް ހޯދުމަށް ރާއްޖޭގެ ޕްރައިވެޓް ސެކްޓަރާއި، ޓެކްނޮލޮޖީ ކުންފުނިތަކާއި، އަލަށް ފަށާ ވިޔަފާރިތަކާ ގުޅިގެން މި ސެންޓަރުން މަސައްކަތް ކުރާނެ އެވެ.
މި މަޝްރޫއުގައި ބީއެމްއެލް ބައިވެރިވަނީ ސެންޓަރު ފެށުމުގެ މަރުހަލާގައި އެހީތެރިވެދޭނެ ސްޓްރެޓީޖިކް ޕާޓްނަރެއްގެ ގޮތުގަ އެވެ. ބޭންކުން ހޯދާފައިވާ ޑިޖިޓަލް ޕޭމެންޓް، ފައިނޭންޝަލް ޓެކްނޮލަޖީ، އަދި ޑޭޓާގެ ތަޖުރިބާ ބޭނުންކޮށްގެން، ސަރުކާރުގެ އިދާރާތަކުން ޑޭޓާގެ މައްޗަށް ބިނާކޮށް ފުރިހަމަ ނިންމުންތައް ނިންމުމަށް މަގުފަހިވެގެންދާނެ ކަމަށް އެ ބޭންކުން ފާހަގަކުރި އެވެ.
މައިންޑްކޯއިން އިސްވެ ކުރިއަށްގެންދާ މި މުހިންމު މަޝްރޫއުގެ މަސައްކަތްތައް ފިޔަވަހިތަކަކަށް ބަހާލައިގެން ކުރިއަށް ގެންދިއުމަށް ހަމަޖެހިފައިވާއިރު، އަމަލީ މަސައްކަތް ފެށުމަށް ތާވަލުކޮށްފައިވަނީ މިއަންނަ އޭޕްރީލް މަހުގަ އެވެ.
