މޯލްޑިވްސް ކަރެކްޝަނަލް ސަވިސް (އެމްސީއެސް) އިން ރައްޔިތުންނަށް ދޭ ހިދުމަތްތައް އިތުރަށް ހަރުދަނާކޮށް ލުއިފަސޭހަކޮށްދިނުމުގެ ގޮތުން، އެ އިދާރާގެ އައު ފްރަންޓް އޮފީސް މިއަދު ރަސްމީކޮށް ހުޅުވައިފި އެވެ.
ހުޅުމާލޭ ޖަލުގެ ހުޅަނގު ދެކުނު ކަންމަތީގައި، ރީތިގަސް މަގާއި ކަށިމާ ހިނގުން ގުޅޭ ސަރަހައްދުގައި ގާއިމުކޮށްފައިވާ މި އާ އޮފީސް ހުޅުއްވައިދެއްވީ ހޯމްލޭންޑް ސެކިއުރިޓީގެ މިނިސްޓަރު އަލީ އިހުސާނެވެ.
ކަރެކްޝަނުން ބުނި ގޮތުގައި، މި ފްރަންޓް އޮފީސް ބިނާކުރުމުގެ މައިގަނޑު މަގްސަދަކީ އާންމު ރައްޔިތުންނަށް ބޭނުންވާ ހިދުމަތްތައް އެއް ފުރާޅެއްގެ ދަށުން، މާލެއާ އެއްފަދަ ލުއިފަސޭހަ ގޮތެއްގައި ފޯރުކޮށްދިނުމެވެ. މި އިމާރާތުގެ ހާއްސަ ފާހަގަކޮށްލެވޭ އެއް ކަމަކީ، މިއީ އެމްސީއެސްގެ ހެޑްކުއާޓާސްއާ އެއްގޮތަށް، ރިހެބިލިޓޭޝަންގެ ތެރެއިން ވަޒީފާ އަދާކުރާ ގައިދީންނާއި އެމްސީއެސްގެ އޮފިސަރުންގެ ހީވާގި އަދި ބުރަ މަސައްކަތުން ބިނާކޮށްފައިވާ ތަނެއް ކަމެވެ.
މިއަދު ހުޅުވުނު ފްރަންޓް އޮފީހުން ގިނަ ހިދުމަތްތަކެއް ލިބިގެންދާނެ އެވެ. އޭގެ ތެރޭގައި:
- ކުށުގެ ރެކޯޑް ސާފުކުރުމުގެ ހިދުމަތް.
- ފޯނު ކޯލްތަކަށް ޖަވާބުދިނުމާއި، މައި އީމެއިލް އަދި ކައުންޓަރަށް އަންނަ ސިޓީއާއި ލިޔެކިޔުންތައް ބަލައިގަތުން.
- ލިޔެކިޔުންތައް ކަމާބެހޭ ސެކްޝަންތަކާއި ޑިވިޝަންތަކާ ހަވާލުކުރުމާއި ރެކޯޑް ބެލެހެއްޓުން.
- އެކިއެކި ކަންކަމުގައި މައުލޫމާތު ސާފުކުރަން އަންނަ ފަރާތްތަކަށް އެހީތެރިކަން ފޯރުކޮށްދިނުން.
މީގެ އިތުރުން، ގައިދީންނާއި ބަންދުގައި ތިބޭ މީހުންނަށް އާއިލާތަކުން ފޮނުވާ އަންނައުނު ބަލައިގަތުންވެސް މި އޮފީހުން ކުރިއަށްދާނެ އެވެ. އަންނައުނު ބަލައިގަތުމަށް ހަމަޖެހިފައިވަނީ ކަނޑައެޅިފައިވާ އުސޫލުގެ ދަށުން، ކޮންމެ ހަފްތާއެއްގެ އާދީއްތަ އަދި އަންގާރަ ދުވަހު އެވެ.
މި އޮފީހާއެކު، ހުޅުމާލޭގައި ދިރިއުޅޭ ރައްޔިތުންނަށް ކަރެކްޝަނަލް ސަވިސްގެ ހިދުމަތްތައް ހޯދުމުގައި ބޮޑެތި ފަސޭހަތަކެއް ލިބިގެންދާނެ ކަމަށް އެ އިދާރާއިން އުންމީދު ކުރެ އެވެ.
