ބޮލީވުޑްގެ ރަސްގެފާނުކަމަށް ބެލެވޭ ޝާހްރުކް ހާންގެ ދޮށީ ދަރިފުޅު އާރިޔާން ހާންގެ ވެބް ސީރީޒް "ދަ ބޭޑްސް އޮފް ބޮލީވުޑް"އާ ދެކޮޅަށް ހުށަހެޅި އަބުރުގެ ދައުވާ މުމްބާއީ ކޯޓަކަށް ބަދަލުކުރުމުގެ ހުއްދަ ދިއްލީ ހައިކޯޓުން ދީފި އެވެ.
ދިއްލީ ހައިކޯޓުން ނިންމީ އެ ކޯޓަށް އެ މައްސަލަ ބެލުމުގެ ސަރަހައްދީ އިހުތިސާސެއް ނެތް ކަމަށެވެ. އެހެންވެ އެ މައްސަލަ، މުމްބާއީގެ ކަމާބެހޭ ކޯޓަކަށް ހުށަހެޅުމުގެ މިނިވަންކަން ދިއްލީ ކޯޓުން ވަނީ ދީފަ އެވެ.
އެ އަޑުއެހުމުގައި ފަނޑިޔާރު ވިކާސް މަހާޖަން ވަނީ ފެބްރުއަރީ މަހުގެ 12 ވަނަ ދުވަހު ދެ ފަރާތުން ވެސް މުމްބާއީ ކޯޓަށް ހާޒިރު ވުމަށް އަމުރުކޮށްފަ އެވެ.
Advertisement
ސަމީރު ވަންކޭޅޭ ފުރަތަމަ ދިއްލީ ހައިކޯޓަށް ޕެޓިޝަނެއް ހުށަހެޅީ އާރިޔާން ހާން ޑައިރެކްޓް ކުރި ނެޓްފްލިކްސް ސީރީޒްގެ ފުރަތަމަ އެޕިސޯޑުގައި ދައްކަނީ އޭނާއާ ވައްތަރު ޝަހިސިއްޔަތެއް ކަމަށާއި އެކަމުގެ ސަބަބުން އޭނާގެ އަބުރު ކަތިލެވި އޭނާގެ އަބުރަށް ގެއްލުންދޭ ކަމަށް ބުނެ އެވެ.
ސަމީރު ބުނި ގޮތުގައި ސީރީޒްގައި ދައްކާފައިވާ ޝަހުސިއްޔަތުގެ ސިފައާއި ސްޓައިލާއި އުޅުމާއި ހަށިގަނޑުގެ ބައްޓަމުން ސާފުކޮށް އޭނާއާ ވައްތަރު ކަމަށާއި މީޑިއާ ރިޕޯޓްތަކުން ވެސް އެ ޝަހުސިއްޔަތު އޭނާއާ ގުޅުވާލާފައި ވާކަމަށް ބުނެފައި ވެއެވެ.
ސަމީރު ވަނީ މައްސަލައިގެ ބޮޑު މަންޒަރު ނައްތާލުމަށް ނުވަތަ މަނާކުރުމަށް ކޯޓުގައި އެދިފަ އެވެ. އަދި ފިލްމުގައި ދައްކާ ޝަޚްސިއްޔަތު މަރާލުމުގެ ސަބަބުން އޭނާގެ ޝަރަފާއި ކަރާމާތާއި ޕްރޮފެޝަނަލް އަބުރަށް އަސަރުކޮށްފައިވާ ކަމަށް ވެސް ބުނެފައިވެ އެވެ.
ކޯޓުން ބުނީ އެ މައްސަލަ މުމްބާއީއަށް ބަދަލުކުރީ ސަމީރު ދިރިއުޅެނީ މުމްބާއީގައި ކަމަށާއި، ސީރީޒްގެ ޕްރޮޑިއުސަރު ރެޑް ޗިލީސް އެންޓަޓެއިންމަންޓުގެ ރަޖިސްޓްރީ އޮފީސް ހުންނަނީ ވެސް މުމްބާއީގައި ކަމަށްވާތީ އެވެ.
ފާހަގަކޮށްލަންޖެހޭ ކަމަކީ ކުރިން ދެންނެވި ވެބް ސީރީޒް ޕްރޮޑިއުސްކޮށްފައި ވަނީ ޝާހްރުކް ހާންގެ ޕްރޮޑަކްޝަން ކުންފުނި ރެޑް ޗިލީސް އެންޓަޓެއިންމަންޓުން ކަމެވެ.
