ޑޮލަރު ހޯދައިދޭނެ ކަމަށް ބުނެ ގިނަ ބައެއްގެ އަތުން އެކި އަދަދުތަކުން ފައިސާ ނަގައި، އެ ފައިސާ އަނބުރާ ރައްދުނުކޮށް ފިލައިގެން އުޅޭ ކަމަށް ތުހުމަތު ކުރެވޭ އަހުމަދު އަޔާޒް، މަޝްހޫރު ބޮޑުބެރު ގްރޫޕް "ހަބޭސް" އިން ވަކިކޮށްފި އެވެ.

މިކަމާ ގުޅިގެން ހަބޭސްއިން ނެރުނު ބަޔާނެއްގައި ބުނެފައިވަނީ، އެ ގްރޫޕަކީ މިފަދަ ގާނޫނާ ހިލާފު އަމަލުތައް ހިންގުމަށް އެއްވެސް އިރެއްގައި އެއްވެސް ބަޔަކަށް ހިތްވަރުދޭނެ ބައެއް ނޫން ކަމަށެވެ. އަދި އަޔާޒްގެ މައްޗަށް ކުރެވޭ ތުހުމަތުތަކަކީ އެ ބޭންޑުގެ ނަމަށްވެސް އޭގެ ސަބަބުން ކިލަނބުކަން އަންނާނެ ކަންތައްތަކެއްކަމަށް އެ ގްރޫޕުން ފާހަގަކުރި އެވެ.

ހަބޭސްއިން ބުނީ، މީސްމީޑިއާގައި މި ހަބަރު ފުރަތަމަ ފެތުރެން ފެށުމާއެކުވެސް އަޔާޒާ ވާހަކަ ދެކެވި، ބޭންޑުގެ މެންބަރުން އަމަލުކުރަންޖެހޭ 'ކޯޑް އޮފް ކޮންޑަކްޓް' އާ އެއްގޮތްވާގޮތުގެ މަތިން އޭނާއަށް ނަސޭހަތްތެރިވެ، އިތުރު ފުރުސަތެއް ދެވުނު ކަމަށެވެ. ނަމަވެސް، އޭގެ ފަހުންވެސް އެފަދަ އަމަލުތައް ތަކުރާރުވަމުންދާތީ، ހަބޭސްގެ ހުރިހާ ހަރަކާތްތަކުން އޭނާ މީގެކުރިން އެކަހެރިކޮށްފައިވާނެ ކަމަށެވެ.

މި މައްސަލައިގައި ކަން ހިނގާފައިވާ ގޮތް އިދާރީ ގޮތުން ބެލިއިރު، އަޔާޒްގެ މައްޗަށް ކުރެވޭ ތުހުމަތުތަކުގެ ތަހުގީގު ފުލުހުން ކުރިއަށްގެންދާކަން ކަށަވަރުވެފައިވާ ކަމަށް ހަބޭސް އިން ބުންޏެވެ. އެހެންކަމުން، ޖިނާއީ އަދުލުގެ ނިޒާމުގެ ތެރެއިން މި މައްސަލައަށް ޝަރީއަތުން ވަކި ގޮތެއް ކަނޑައަޅަންދެން، މިއަދުން ފެށިގެން އަޔާޒަކީ އެ ބޭންޑުގެ މެންބަރެއް ނޫން ކަމަށް މެނޭޖްމަންޓް ބޯޑުން ވަނީ ނިންމާފައިކަމަށް ހަބޭސްއިން ބުންޏެވެ.

އަޔާޒްގެ މައްޗަށް ތުހުމަތު ކުރެވެނީ ޑޮލަރު ދޭނެ ކަމަށް ބުނެ ގިނަ ބައެއްގެ އަތުން މަކަރާއި ހީލަތުން ފައިސާ ހޯދުމަށްފަހު، އެ ފައިސާ ނުދީ ފިލައިގެން އުޅޭ ކަމަށެވެ. މި މައްސަލައިގައި ގިނަ ބަޔަކު ދަނީ މީސްމީޑިއާގައި އެމީހުންނަށް ލިބުނު ގެއްލުމުގެ ވާހަކަ ހިއްސާކުރަމުންނެވެ.