އީރާނުގެ ވެރިރަށް ތެހެރާނުގެ ހުޅަނގު ބާޒަރެއްގައި ބޮޑު އަލިފާނުގެ ހާދިސާއެއް ހިނގައި އެތަނުގައި ރޯވެ އަނދަމުން އެބަ ދެއެވެ. އަލިފާން ރޯވެ އަނދަމުން ދަނީ ޖަންނަތު އަބާދު މާރުކޭޓުގައެވެ.
މިއީ އީރާނުގެ އެންމެ ބިޒީ ވިޔަފާރި ސަރަޙައްދެވެ.
ތުރްކިޔޭގެ މަސްދަރަކުން ތެހެރާނުގެ އަލިފާނާއި ގުޅޭ ޑިޕާޓްމަންޓުގެ ތަރުޖަމާނު ޖަލާލް މަލޭކީއާއި ޙަވާލާދީ ބުނީ އަލިފާންގަނޑު ފެތުރި، ކައިރީގައި ތިބި ޢިމާރާތްތަކުގައި ރޯވެދާނެ ކަމުގެ ބިރު ހީވެފައިވާ ކަމަށެވެ. ނަމަވެސް ލިބުނު ގެއްލުންތަކުގެ ރަސްމީ މައުލޫމާތެއް އެ މަސްދަރުން ވެސް ހާމަކޮށްފައެއް ނުވެއެވެ.
އީރާނުގެ ބާޒާރުގައި ރޯވެ އަނދަމުންދާއިރު ފާހަގަ ކޮށްލެވޭ އަނެއް ކަމަކީ އެ ޤައުމުގެ ސަރުކާރާއި ދެކޮޅަށް ކުރަމުންދާ މުޒާހަރާތައް އަދިވެސް ކުރިޔަށްދާ ކަމެވެ.
އަނެއްކޮޅުން އެ ޤައުމުގެ އެތެރޭގައި ބިރުވެރިކަން އުފައްދަން ބޭރުގެ ޤައުމުތަނުން (ޚާއްޞަކޮށް އެމެރިކާ އާއި އިސްރާއީލުން) މަސައްކަތް ކުރަމުންދާ ކަމަށް ތެހެރާނުން ތުހުމަތު ކުރެއެވެ.
