ދުނިޔޭގެ މަގުބޫލުކަން ހޯދާފައިވާ ފިލްމު 'ދަ ޑެވިލް ވެއާސް ޕްރާޑާ' ގެ ދެވަނަ ބައިގެ ފުރަތަމަ ޓްރެއިލާ އާންމުކުރުމާއެކު، ފިލްމީ ދާއިރާގެ ގިނަ ބައެއްގެ ސަމާލުކަން މި ފިލްމަށް ހުއްޓިއްޖެއެވެ. 2006 ވަނަ އަހަރު ރިލީޒްކުރި ފުރަތަމަ ފިލްމުގެ ހަނދާންތައް އާވެގެންދިޔަ މި ޓްރެއިލާއިން ފެނިގެންދަނީ ފިލްމުގެ މައިގަނޑު ތިން ތަރިން ކަމަށްވާ މިރަންޑާ، އެންޑީ އަދި އެމިލީ އަލުން ބައްދަލުވާ މަންޒަރެވެ.
ޓްރެއިލާ ފެށިގެން އަންނަނީ 'ރަންވޭ' މެގަޒިންގެ ނުފޫޒުގަދަ އެޑިޓާ އިން ޗީފް މިރަންޑާ ޕްރީސްޓްލީ އާއި އާޓް ޑައިރެކްޓަރު ނައިޖެލް ކިޕްލިންގް، އަލުން އެންޑީގެ އިންޓަވިއުއެއް ނަގާ މަންޒަރަކުންނެވެ. އެންޑީއަކީ ކުރިން އޭނާގެ އެސިސްޓެންޓެއްގެ ގޮތުގައި މަސައްކަތްކުރި 'އެމިލީ' އިންގެ ތެރެއިން އެކަކުކަން ހަނދާންކޮށްދިނުމުންވެސް، މިރަންޑާ ހުރީ އޭނާ މަތިން ހަނދާން ނެތިފަ އެވެ.
މި ފަހަރުގެ ވާހަކައިގައި އެމިލީ ފެންނަނީ އެހެން މެގަޒިންއެއްގެ އިސް މަގާމެއްގައި ހުއްޓައެވެ. މިއީ އެއްވެސް މީހަކު އުއްމީދުކޮށްގެން ތިބި ބައްދަލުވުމެއް ނޫން ނަމަވެސް، މިރަންޑާގެ ފަރާތުން އަދިވެސް ފެންނަނީ އެއްވެސް މީހަކު ދަންނަ ކަމުގެ ކުލަވަރެއް ނޫނެވެ. ޓްރެއިލާއިން ފެންނަ ގޮތުގައި، މި ތިން ތަރިން އަލުން އެކުވެފައިވަނީ 'ރަންވޭ' މެގަޒިން ހުއްޓާލަން ޖެހިދާނެ ފަދަ ހާލަތަކުން ސަލަމާތް ކުރުމަށެވެ. ފެޝަންގެ ދުނިޔޭގައި އަދިވެސް އެންމެ ނުފޫޒުގަދަ މި ތަރިންނަށް މެގަޒިން ސަލާމަތް ކުރެވޭނެބާވަ އެވެ؟
މި ޓްރެއިލާއާއެކު ފޭނުން ތިބީ ދެވަނަ ބައި ބަލާލުމަށް ކެތްމަދުވެފަ އެވެ. ސޯޝަލް މީޑިއާގައި ހިޔާލު ފާޅުކުރި ފޭނަކު ބުނި ގޮތުގައި، މިއީ އެންމެން އިންތިޒާރު ކުރަމުންދިޔަ ސީކުއަލް އެވެ. އަދި މި ލެޖެންޑަރީ ތަރިން އަލުން އެކުގައި ފެނުމަކީ ލިބޭނެ ބޮޑު އުފަލެއް ކަމަށް އޭނާ ފާހަގަކުރި އެވެ. އެހެން މީހަކު ބުނި ގޮތުގައި، ދެވަނަ ބައެއް އުފެއްދުމަށް 20 އަހަރު ނެގި ނަމަވެސް، އެމިލީ ބްލަންޓް ފަދަ ތަރިން އަލުން ފެންނާތީ އޭނާ ހުރީ ވަރަށް ބޮޑަށް އުފާވެފަ އެވެ.
2006 ވަނަ އަހަރު ރިލީޒްކުރި 'ދަ ޑެވިލް ވެއާސް ޕްރާޑާ' އަކީ ފެޝަންގެ ދުނިޔެއާއި އޮފީސް މާހައުލުގެ ކަންތައްތައް ވަރަށް ފުރިހަމައަށް ދައްކުވައިދިން ފިލްމެކެވެ. މެރިލް ސްޓްރީޕް ކުޅެފައިވާ މިރަންޑާގެ ނުފޫޒުގަދަ ކެރެކްޓަރާއި، އެމިލީ ބްލަންޓް އަދި އޭން ހެތަވޭގެ އެސިސްޓެންޓް ރޯލުތަކަކީ ގިނަ ބައެއްގެ މަގުބޫލުކަން ހޯދި ރޯލުތަކެކެވެ.
'ދަ ޑެވިލް ވެއާސް ޕްރާޑާ 2' ޑައިރެކްޓް ކުރަނީ ފުރަތަމަ ބައިވެސް ޑައިރެކްޓްކުރި ޑޭވިޑް ފްރެންކެލްއެވެ. މި ފިލްމު ސިނަމާތަކަށް އަންނާނީ 1 މެއި 2026 ގައެވެ.
