ކުރިއަށް އޮތް ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިހާބުގައި ވާދަކުރުމަށް އެދި ފޯމް ހުށަހެޅުމުގެ ސުންގަޑި ހަމަވިއިރު، މި އިންތިހާބުތަކުގައި ވާދަކުރުމަށް އެދި ޖުމްލަ 3،547 ފަރާތަކުން ފޯމް ހުށަހަޅައިފި އެވެ.

އިލެކްޝަންސް ކޮމިޝަނުގެ ތަފާސް ހިސާބުތަކުން ދައްކާގޮތުގައި، ކައުންސިލްތަކަށް ކުރިމަތިލުމަށް އެދި 1،936 ފަރާތަކުން ވަނީ ފޯމު ހުށަހަޅައިފަ އެވެ. މީގެ ތެރެއިން ކެންޑިޑެންސީ ބަލައިގަނެފައި ވަނީ 1،610 ފަރާތެއްގެ އެވެ. އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބަށް ބަލާލާއިރު، 1،611 ފަރާތަކުން ފޯމު ހުށަހަޅާފައިވެ އެވެ. މީގެ ތެރެއިން އީސީން ކެންޑިޑެންސީ ބަލައިގަނެފައި ވަނީ 1،383 ފަރާތެއްގެ އެވެ.

މި އިންތިހާބުގައި ވާދަކުރުމަށް ފޯމު ހުށަހަޅާފައިވާ ފަރާތްތަކުގެ ތެރެއިން 2،993 ފަރާތެއްގެ ކެންޑިޑެންސީ އީސީން ބަލައިގެންފައިވާއިރު، 554 ފަރާތެއްގެ ކެންޑިޑެންސީ ބަލައިގެންފައެއް ނުވެއެވެ. މި އިންތިހާބުގައި ވާދަކުރުމަށް ފޯމް ހުށަހެޅުމުގެ ފުރުސަތު އީސީން ހުޅުވާލީ މިދިޔަ މަހުގެ 17 ވަނަ ދުވަހު އެވެ.

އީސީން ބުނީ، ޕޯޓަލް މެދުވެރިކޮށް ހުށަހެޅި ހުރިހާ ފޯމުތަކެއް ޕްރޮސެސްކޮށް ނިންމުމަށް ފަހު، ފޯމު ހުށަހެޅި ފަރާތްތަކަށް ޖަވާބު ފޮނުވާފައިވާ ކަމަށެވެ. މި އަދަދުތަކަށް ބަދަލެއް އަންނާނީ ކެންޑިޑޭޓަކު އަމިއްލައަށް ނަން އަނބުރާ ގެންދިއުމުން ނުވަތަ ކޮމިޝަނުން ބަލައިނުގަތް ފޯމަކާ ގުޅިގެން ކޯޓަށް މައްސަލަ ހުށަހަޅައި، އެ ފޯމު ބަލައިގަތުމަށް ކޯޓުން އަމުރުކުރާ ހާލަތުގައި އެކަނި ކަމަށް އީސީން ބުންޏެވެ.

ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބު ބޭއްވުމަށް އީސީން ނިންމާފައި ވަނީ އަންނަ އޭޕްރީލް މަހުގެ ހަތަރުވަނަ ދުވަހަށެވެ. މި އިންތިހާބުގައި ރަށު ކައުންސިލްތަކަށް 626 ކައުންސިލަރުން އަދި ސިޓީ ކައުންސިލްތަކަށް 52 ކައުންސިލަރުން އިންތިހާބު ކުރާނެ އެވެ. އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކަށް ވެސް މި އަދަދުން މެންބަރުން އިންތިހާބުކުރުމަށް ވަނީ ހަމަޖެހިފަ އެވެ.

މި އިންތިހާބުގައި ވޯޓުލުމުގެ ހައްގު 294,937 މީހުންނަށް ލިބިފައިވާއިރު، މީގެ ތެރޭގައި ހިމެނެނީ 144,527 އަންހެނުންނާއި 150,410 ފިރިހެނުންނެވެ.