ޖިންސީ ފުރައްސާރަކުރުމުގެ ތުހުމަތު ސާބިތުވެ، އެމްއެމްއޭގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ) ގެ ވެރިޔާގެ މަގާމުން އިސްމާއިލް ސާޖިދު ވަކިކުރީ ގާނޫނީ ހަމައަކުން ނޫން ކަމަށް އޭނާ ވިދާޅުވެއްޖެ އެވެ.
މިދިޔަ އޮގަސްޓު މަހު އެ މަގާމަށް އައްޔަނުކުރި ސާޖިދު މަގާމުން ވަކިކުރަން ނިންމީ އެމްއެމްއޭގެ ޖިންސީ ފުރައްސާރައިގެ މައްސަލަ ބަލާ ކޮމިޓީން މައްސަލަ ސާބިތުވާ ކަމަށް ނިންމުމާ ގުޅިގެން މިދިޔަ ބުރާސްފަތި ދުވަހު އެވެ.
މިކަމާ ގުޅިގެން ސާޖިދު ފޭސްބުކުގައި ކުރެއްވި ޕޯސްޓެއްގައި ވިދާޅުވީ، އޭނާގެ މައްޗަށް ކުރި ތުހުމަތުތަކަކީ ދޮގުތަކެއްކަން ސާބިތުކޮށްދޭނެ ކިތާބީ ހެކި ކޮމިޓީއަށް ހުށަހަޅާފައިވާނެ ކަމަށެވެ. ނަމަވެސް ކޮމިޓީން މައްސަލަ ނިންމާފައިވަނީ އެ ހެކިތަކަށް އެއްވެސް މިންވަރަކަށް ބެލުމެއް ނެތި ކަމަށް އޭނާ ތުހުމަތު ކުރެއްވި އެވެ. ސާޖިދު ވިދާޅުވި ގޮތުގައި މައްސަލަ ހުށަހެޅި ފަރާތުން ކަނޑައެޅިގެން ދޮގު ހަދާފައިވާކަން އޭނާ ހުށަހެޅި ހެކިތަކުން ސާބިތުވެ އެވެ.
ސާޖިދު އިތުރަށް ވިދާޅުވީ، މި މައްސަލައަކީ އެފްއައިޔޫގެ މުވައްޒަފެއްގެ ހައިސިއްޔަތުން އެ މުވައްޒަފަކު ކޮށްގެން ނުވާނެ ކަންތައްތަކެއް ކުރުމުން، އެކަމާ މެދު ފިޔަވަޅު އެޅުމުން އުފެއްދި މައްސަލައެއް ކަމަށް ބެލެވޭ ކަމަށެވެ.
"މިގޮތުން ފައިނޭންޝަލް އިންޓެލިޖެންސް ޔުނިޓުގެ މުވައްޒަފެއްގެ ހައިސިއްޔަތުން އެ މުވައްޒަފު ކޮށްގެން ނުވާނެ ބައެއް ކަންކަން އެ މުވައްޒަފު ކުރުމުން އެ މުވައްޒަފާ މެދު އަމަލު ކުރަންޖެހޭ ގޮތަށް އަމަލުކުރުމަކީ މިއަދު މި އަނިޔާ ލިބުމުގެ އެއް އަސާސް ކަމަށް އަޅުގަނޑަށް ބެލެވެއެވެ،" އޭނާ ލިޔުއްވާފައިވެ އެވެ.
މީގެ އިތުރުން، މައްސަލައިގައި ބުނާ ކަންކަން ހިނގި ކަމަށް ބުނާ ދުވަހާއި މައްސަލަ ހުށަހެޅި ދުވަހާ ދެމެދު 39 ދުވަސް ހިނގާފައިވާކަން ފާހަގަކުރައްވައި، ސާޖިދު ވިދާޅުވީ އެ މުއްދަތުގެ ތެރޭގައި ހިނގާފައިވާ ކަންކަން އިދާރީ ލިޔެކިޔުންތަކުން އެނގެން ހުންނާނެ ކަމަށެވެ. އަދި މައްސަލައިގެ ތަފްސީލު އެނގުމުގެ ކުރިން މީޑިއާތަކަށް މައުލޫމާތު ލީކުވެފައިވާތީ، އެމްއެމްއޭގެ މައުލޫމާތު ރައްކާތެރިކުރުމުގެ ނިޒާމާ މެދުވެސް އޭނާ ވަނީ ސުވާލު އުފައްދާފަ އެވެ.
ސާޖިދު ވިދާޅުވީ އޭނާ އެ މަގާމުގައި ހުރުމުން އެއްވެސް ފަރާތަކަށް އުނދަގޫވާނަމަ، ސީދާ އެ ވާހަކަ ބުނި ނަމަވެސް މަގާމުން ވަކިވާން ތައްޔާރަށް ހުންނެވި ކަމަށެވެ. ނަމަވެސް މިހާރު އަމަލުކޮށްފައިވާ ގޮތަކީ އޭނާގެ އަބުރު ކަތިލުމުގެ އަމަލެއްގެ ގޮތުގައި ސިފަކުރެއްވިއެވެ.
"މި މައްސަލައިގައި އަޅުގަނޑާ މެދު އަޅާފައިވާ ފިޔަވަޅަކީ ގާނޫނީ ހަމައިގެ މަތިން އަޅާފައިވާ ފިޔަވަޅެއް ނޫންކަން މި މައްސަލައިގެ ތަފްސީލު ބެލި ކޮންމެ މީހަކަށްވެސް އެނގޭނެއެވެ،" އޭނާގެ ޕޯސްޓު ނިންމާލަމުން ވިދާޅުވެފައިވެ އެވެ.
އެފްއައިޔޫއަކީ މަނީ ލޯންޑްރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން، ރާއްޖޭގެ މާލީ މުއާމަލާތްތައް މޮނިޓާ ކުރުމަށް އެމްއެމްއޭގައި ގާއިމުކޮށްފައިވާ މުހިންމު ޔުނިޓެކެވެ. ގާނޫނު ބުނާގޮތުން އެ ޔުނިޓުގެ އިސްވެރިޔާ އައްޔަންކުރުމާއި ވަކިކުރުމުގެ ފުރިހަމަ އިހުތިޔާރު ލިބިގެންވަނީ މަރުކަޒީ ބޭންކުގެ ގަވަރުނަރަށެވެ.
