ޤަވާޢިދާ ޚިލާފަށް އެތެރެކުރާ ޖަނަވާރުތައް ކޮންޓްރޯލްކުރުމުގައި ދަތިވަނީ އެނިމަލް ހެލްތު ޤާނޫނެއް ނެތުމުން ކަމަށް ދަނޑުވެރިކަމާއި ދިރޭތަކެއްޗާ ބެހޭ ވުޒާރާއިން ބުނެފިއެވެ.
ޑެޕިއުޓީ މިނިސްޓަރ ފާޠިމަތު ޒުހުރާ ވިދާޅުވީ ޤަވާއިދާއި ޚިލާފަށް އެތެރެކުރެވޭ ޖަނަވާރު ކޮންޓްރޯލް ކުރުމުގެ މަސައްކަތް ކުރަމުން އަންނަނީ މިނިސްޓްރީ އާއި ކަސްޓަމްސް އާއި ގުޅިގެން ކަމަށާ ޤަވާޢިދާއި ޚިލާފަށް ދިރޭ ޖަނަވާރު އެތެރެ ކުރެވުނު ނަމަވެސް، އެނިމަލް ހެލްތް ޤާނޫނެއް ނެތުމުގެ ސަބަބުން ގިނަ ގޮންޖެހުންތަކާއި މި ވަގުތު ކުރިމަތިވަމުން އަންނަ ކަމަށެވެ. މި ޤާނޫނު ވުޖޫދަށް އައުމާއެކު މިހާރު ދިމާވަމުން އަންނަ ގޮންޖެހުންތަކަށް ހައްލެއް ލިބިގެންދާނެ ކަމަށްވެސް އެކަމަނާ ވިދާޅުވިއެވެ.
ޑެޕިއުޓީ މިނިސްޓަރު ވިދާޅުވީ އެންމެ ފަހުން މާލެއަށް ކުރި ވިއްސާރާގައި މާލޭގެ މަގުމަތީގައި އުޅޭ ބުޅާތަކަށް ރައްކާތެރި މާހައުލެއް ހޯދުމަށްޓަކައި އެކަމަށް މަސައްކަތްކުރާ ޖަމިއްޔާތަކާއި ގުޅިގެން ގިނަ މަސައްކަތްތަކެއް ކޮށްފައިވާ ކަމަށެވެ.
Advertisement
މި ވަގުތު އެންމެ އިސްކަމެއް ދީގެން ކުރަމުން އަންނަ މަސައްކަތަކީ ހުޅުމާލެ ފޭސް 2 ގައި އަޅަމުން އަންނަ ކެޓް ޝެލްޓަރ އިމާރާތުގެ މަސައްކަތް ނިންމައި، ޚިދުމަތް ދިނުމަށް ވާންޖެހޭ އެންމެ ފަހުގެ ތައްޔާރީތައް ވުމުގެ މަސައްކަތް ކަމަށް ވެސް އެކަމަނާ ޚުލާސާ އަށް ފޮނުއްވި ޖަވާބުގައި ވެއެވެ.
