ގއ، ގދ، އައްޑޫ އަދި ފުވައްމުލައް ޝެޑިއުލް ވައިގެ ދަތުރުތަކަކުން ގުޅާލުމަށް ފެށި "ސަދަން ކަނެކްޓިވިޓީ" މަޝްރޫއުގެ ދަށުން ކޫއްޑުއާއި ކާޑެއްދުއާ ދެމެދު ވައިގެ ދަތުރުތައް ފަށައިފި އެވެ.
މި މަޝްރޫއު އިފްތިތާހުކުރުމުގެ ގޮތުން އިއްޔެ ވަނީ އައްޑޫ ސިޓީން ފުވައްމުލައް ސިޓީއަށް ދަތުރުތައް ފަށާފައެވެ.
ކޫއްޑޫއާއި ކާޑެއްދޫއަށް ދަތުރު ފެށުމަށް މި ދެ ރަށުގައި މިއަދު ވަނީ ވަކިވަކިން ހާއްސަ ރަސްމިއްޔާތުތަކެއް ބާއްވާފަ އެވެ. މި ރަސްމިއްޔާތުތަކުގައި އައިލެންޑް އޭވިއޭޝަންގެ އިސްވެރިންނާއި، ރަށްރަށުގެ ކައުންސިލްތަކާއި، ފަތުރުވެރިކަމުގެ ދާއިރާގެ ބޭފުޅުންގެ އިތުރުން ރަށުގެ އާންމު ރައްޔިތުން ބައިވެރިވެފައިވެ އެވެ.
މި މަޝްރޫއާ ގުޅޭގޮތުން އައިލެންޑް އޭވިއޭޝަން ސާވިސަސްގެ ޑެޕިއުޓީ މެނޭޖިން ޑިރެކްޓަރު އަލީ ސަލީމް ވިދާޅުވީ، މިއީ ރައްޔިތުންނަށް ގިނަގުނަ ފައިދާތަކެއް ލިބިގެންދާނެ ދަތުރުތަކަކަށް ވެގެންދާނެ ކަމަށެވެ.
"މޯލްޑިވިއަނުން މި ހިދުމަތް މިހާރު މި ފަށަނީ، ވަރަށް އަގުހެޔޮކޮށް އާންމުންނަށް ވަރަށް ފަސޭހަވާނެ ފަދަ ގޮތަކަށް. ސަރުކާރުގެ ފަރާތުން މި ވައުދު އިރާދަކުރެއްވިއްޔާ މި ފުއްދުނީ،" ސަލީމް ވިދާޅުވި އެވެ.
މޯލްޑިވިއަން އިން މި ދަތުރުތަކަށް ބޭނުންކުރަނީ 15 މީހުންގެ ޖާގައިގެ ޓްވިން އޮޓާ މަރުކާގެ ބޯޓުތަކެވެ. ދަތުރުތައް ބަހާލެވިފައިވަނީ ޖުމްލަ ފަސް ސެކްޓަރަކަށެވެ. އެއީ އައްޑޫ ގަމުން ކާޑެއްދޫ، ކޫއްޑޫ އަދި ފުވައްމުލަކަށް ކުރާ ދަތުރުތަކުގެ އިތުރުން، ފުވައްމުލަކުން ކާޑެއްދޫ އަދި ކޫއްޑޫއަށް ކުރާ ދަތުރުތަކެވެ. މި ދަތުރުތަކުގެ އަގުތައް އުޅެނީ 500ރ. އާއި 900ރ. އާ ދެމެދުގައެވެ.
ދަތުރުތަކުގެ އަގުތައް:
- ގަން - ފުވައްމުލައް: 500ރ.
- ފުވައްމުލައް - ކޫއްޑޫ/ކާޑެއްދޫ: 650ރ.
- ގަން - ކާޑެއްދޫ/ކޫއްޑޫ: 900ރ.
މޯލްޑިވިއަން އިން ބުނީ މި އާ ހިދުމަތުގެ ސަބަބުން ސިއްހީ ބޭނުންތަކަށާއި ޒަރޫރީ އެހެނިހެން ކަންކަމުގައި ދެކުނުގެ އަތޮޅުތަކުގެ މެދުގައި ކުރަންޖެހޭ ދަތުރުތައް ވަރަށް ބޮޑަށް ކުރުވެ، ފަސޭހަވެގެންދާނެ ކަމަށެވެ.
