ދެކުނުގެ ހަތަރު އަތޮޅު ވައިގެމަގުން ގުޅާލުމަށް ފެށި ދަތުރުތަކަކީ މުޅި ދިވެހިރާއްޖޭގެ ދަތުރުފަތުރުގެ ނިޒާމު ބަދަލުކޮށްލާނެ އިންގިލާބީ ބަދަލަކަށް ވެގެންދާނެ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.

މިނިސްޓަރު މިހެން ވިދާޅުވީ، ދެކުނުގެ ހަތަރު އަތޮޅު ވައިގެމަގުން ގުޅާލުމަށް ގދ. ކާޑެއްދޫއަށް ބޭއްވި ދަތުރު އިފްތިތާހު ކުރުމަށް ބޭއްވި ހަފްލާގައި ވާހަކަ ދައްކަވަމުންނެވެ.

މިނިސްޓަރު ވިދާޅުވީ ދެކުނުގެ ހަތަރު އަތޮޅު ގުޅުވައިލެވިގެން މިދިޔައީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިފަދަ ކަމެއް ކުރެއްވުމުގެ ބޭނުންފުޅު ވަރަށް ބޮޑަށް ހުންނެވުމާއިއެކު އެގޮތަށް ގެންގުޅުއްވި ވިސްނުންފުޅުގެ ސަބަބުން ކަމަށެވެ. ރާއްޖެއަކީ ވޮލިއުމް ބޭސްޑް ޓްރާންސްޕޮޓޭޝަން އޮތް ތަނެއް ނޫންކަން ފާހަގަކުރައްވައި، މިނިސްޓަރު ވިދާޅުވީ ރާއްޖެއަށް ބޭނުންވަނީ ފްރިކުއެންސީ ބޭސްޑް ޓްރާންސްޕޮޓޭޝަންއެއް ކަމަށާއި، ބޭނުންވަނީ ބޮޑެތި ބޯޓުފަހަރުގެ ބަދަލުގައި ގިނަ އަދަދަކަށް ފްލައިޓް އެޅޭނެ މަގެއް ކަމަށެވެ.

"ދެކުނުގެ ހަތަރު އަތޮޅު ޕައިލެޓް ޕްރޮޖެކްޓެއްގެ ގޮތުގައި ފެށިގެން މިދަނީ. މި ކާމިޔާބު ވެއްޖެނަމަ މިއީ މުޅި ދިވެހިރާއްޖޭގެ ދަތުރުފަތުރުގެ ނިޒާމު ބަދަލުކޮށްލާނެ އިންގިލާބެއް ގެންނާނެ ކަމަކަށް ވެގެންދާނެ،" މި މަޝްރޫއުގެ މުހިންމުކަމާ ގުޅޭގޮތުން ވާހަކަދައްކަވަމުން މިނިސްޓަރު ވިދާޅުވި އެވެ.

މިފަދަ ކުދި ފްލައިޓްތައް ޖެއްސުމަށް ބޭނުންވާ އިންފްރާސްޓްރަކްޗާ ގާއިމްކުރުމަކީ މިހާރު އެއާޕޯޓްތަކަށް ކުރާ ބޮޑެތި އިންވެސްޓްމަންޓްތަކާ އަޅާބަލާއިރު ކުޑަ ހަރަދެއް ހިނގާނެ ކަމެއްކަންވެސް މިނިސްޓަރު ވަނީ ފާހަގަކުރައްވާފަ އެވެ.

މޯލްޑިވިއަނުން ބުނި ގޮތުގައި، މި ދަތުރުތަކުގެ ސަބަބުން އެ ސަރަހައްދުގެ ރައްޔިތުންނަށް އަމިއްލަ ދަތުރުތަކާއި، ތައުލީމާއި ބޭސްފަރުވާ ފަދަ ޒަރޫރީ ބޭނުންތަކަށް ބޮޑެތި ލުއިފަސޭހަތަކެއް ލިބިގެންދާނެއެވެ. ވަކިން ހާއްސަކޮށް، ބޭސްފަރުވާއަށް ދަތުރުކުރާ ފަރާތްތަކަށް އައްޑޫ ގަން މެދުވެރިކޮށް ދަތުރުކުރުމަށް މީގެ ސަބަބުން މަގުފަހިވެގެންދާނެ ކަމަށް އެ ކުންފުނިން ބުނެ އެވެ.

މީމޯލްޑިވިއަންއިން ބުނި ގޮތުގައި މި ދަތުރުތަކަށް ބޭނުންކުރާނީ ޑީއެޗްސީ-6-300 ޓްވިން އޮޓާ މަރުކާގެ ބޯޓުތަކެވެ. މި ބޯޓުތަކަކީ އެއްފަހަރާ 15 ވަރަކަށް މީހުންނަށް ދަތުރުކުރެވޭނެ ބޯޓުތަކެކެވެ. މިހާރު މި ދަތުރުތަކަށް ބުކިން ހެދުމުގެ ފުރުސަތު ވަނީ އާންމުކޮށް ހުޅުވާލާފަ އެވެ.

މި ހިދުމަތް ފެށުމުގެ މައިގަނޑު މަގުސަދަކީ ދެކުނުގެ ހަތަރު އަތޮޅު (ގއ، ގއ، ޏ. އަދި ސ. އަތޮޅު) ގުޅުވާލައި، އެ ސަރަހައްދުގެ ދަތުރުފަތުރުގެ ނިޒާމު މިހާރަށްވުރެ ހަރުދަނާކޮށް، ރައްޔިތުންނަށް ފަސޭހަކަމާއެކު ދަތުރުކުރެވޭނެ މަގު ތަނަވަސްކޮށްދިނުމެވެ. މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ސަރަހައްދީ ތަރައްގީއަށް ކުރަމުންދާ މަސައްކަތްތަކުގެ ތެރެއިން މުހިންމު ފިޔަވަޅެކެވެ.