ހުޅުމާލެ ދެވަނަ ފިޔަވަހީގައި ހުންނަ ހިޔާ ފްލެޓުގެ ފަސް ވަނަ ޓަވަރުގައި ހިނގި އަލިފާނުގެ ހާދިސާއާ ގުޅިގެން އެ ޓަވަރުގެ 38 ފްލެޓަކަށް ގެއްލުން ލިބިފައިވާ ކަމަށް ނެޝަނަލް ޑިޒާސްޓާ މެނޭޖްމަންޓުން ހާމަކޮށްފި އެވެ.
އެންޑީއެމްއޭ އިން ބުނީ ރޭ ހުޅުމާލޭ ހިޔާ ފަސްވަނަ ޓަވަރުގައި ހިނގި އަލިފާނުގެ ހާދިސާގައި އެ ޓަވަރުގެ 38 އެޕާޓްމަންޓުގެ ނަރުދަމާ ހޮޅިތަކަށް ގެއްލުންވެފައިވާ ކަމަށެވެ. އެގޮތުން މިހާތަނަށް އެހީތެރިކަން ބޭނުންވެގެން ރިޕޯޓުކޮށްފައިވާ 18 އެޕާޓްމަންޓްގައި ދިރިއުޅޭ 85 ފަރާތަކަށް ވަގުތީ ބޯހިޔާވަހިކަން ހަމަޖެއްސުމަށާއި ކެއުން ބުއިމަށް އެހީ ފޯރުކޮށްދީފައިވާ ކަމަށް ބުންޏެވެ.
އެ އިދާރާއިން ބުނީ މި ހާދިސާއަށް ފަހު ނަރުދަމާއަށް ލިބުނު ގެއްލުން ދެނެގަނެ ގެއްލުންތައް މަރާމާތުކުރުމުގެ މަސައްކަތް އެޗްޑީސީއިން ކުރަމުންދާ ކަމަށެވެ. އަދި އަލިފާނުގެ ހާދިސާއާ ގުޅިގެން އިތުރަށް ބަލަން ޖެހޭ ކަންކަން އެޗްޑީސީ އާއި އެންޑީއެމްއޭ އާ ބަލަމުންދާ ކަމަށްވެސް ބުންޏެވެ.
މި އަލިފާނުގެ ހާދިސާ ހިނގާފައިވަނީ ރޭގެ 7:00 ޖަހާކަށްހާއިރު އެވެ. އަލިފާން ރޯވާން މެދުވެރިވީ ވައިގޮޅިއެއްގައި ހުރި އޭސީ އައުޓްޑޯ ޔުނިޓެއްގައި ރޯވެގެންނެވެ. އެޗްޑީސީ ސެކިއުރިޓީ އަދި ސަމާލަތީ ހިދުމަތްތަކުން ވަނީ އެ ޓަވަރުގައި ދިރިއުޅޭ ފަރާތްތައް އެއްކޮށް އިވެކުއޭޓް ކޮށްފަ އެވެ. ހާދިސާގެ ރިޕޯޓު ލިބުމާއެކު އެމްއެންޑީއެފްގެ ފަޔާ އެންޑް ރެސްކިއު ސާވިސްއިން ވަނީ ވަގުތުން ހަރަކާތްތެރިވެ އަލިފާން ކޮންޓްރޯލްކޮށްފަ އެވެ.
