ގަން އިންޓަނޭޝަނަލް އެއާޕޯޓަކީ ރާއްޖޭގެ ދެކުނުގައި ކުރާ ވައިގެ ދަތުރުފަތުރުގެ މައި ހަބަކަށް ހަދާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ ގއ، ގދ، އައްޑޫ އަދި ފުވައްމުލައް ޝެޑިއުލް ވައިގެ ދަތުރުތަކަކުން ގުޅާލުމަށް ފެށި "ސަދަން ކަނެކްޓިވިޓީ" އޮޕަރޭޝަން އިފްތިތާހުކުރުމަށް ގަމުގައި ބޭއްވި ރަސްމިއްޔާތުގަ އެވެ.
މިނިސްޓަރު އަމީން ވިދާޅުވީ ގަން އެއާޕޯޓުގެ ހާލަތު ބަދަލުކޮށް، އެތަނަކީ ބައިނަލްއަގުވާމީ އެއާލައިންތައް އޮޕަރޭޓްކުރާ ދެކުނުގެ މައި ހަބަށް ހައްދަވާނެ ކަމަށެވެ. އެގޮތުން މެދުއިރުމަތީގެ އެއާލައިނަކާއި ޗައިނާގެ އެއާލައިނެއް ގަމަށް ގެނައުމަށް ސަރުކާރުން މަސައްކަތް ކުރަމުންދާ ކަމަށާއި، ބޮޑެތި ލުއިތަކެއް ދީގެން ނަމަވެސް އެއާލައިންތައް ގެންނަން ޖެހޭ ކަމަށް އޭނާ ފާހަގަކުރެއްވި އެވެ.
"އިރާދަކުރެއްވިއްޔާ އަޅުގަނޑުމެން މި އެއާޕޯޓްގެ ހާލަތު ބަދަލުކުރާނަން. ގޭން އިންޓަނޭޝަނަލް އެއާޕޯޓަކީ އެއާލައިންތައް އަންނަ، ރާއްޖޭގެ ވައިގެ ސަދާން ހަބް ކަމުގައި އިރާދަކުރެއްވިއްޔާ އަޅުގަނޑުމެން ހަދާނަން،" މިނިސްޓަރު ވިދާޅުވި އެވެ.
ގަން އެއާޕޯޓަކީ ހުރިހާ ސައިޒެއްގެ މަތިންދާބޯޓު އޮޕަރޭޓްކުރެވޭނެ ގާބިލުކަން ހުރި ތަނެއް ނަމަވެސް، މީގެ ކުރިން އެކަށީގެންވާ މަސައްކަތްތަކެއް ކުރެވިފައި ނުވާކަން މިނިސްޓަރު ފާހަގަކުރެއްވި އެވެ. އަދި މިހާރު ފެށި އެއާ ކަނެކްޓިވިޓީގެ ސަބަބުން ހުވަދު އަތޮޅާއި، ފުވައްމުލައް އަދި އައްޑޫ ހިމެނޭހެން ފަތުރުވެރިކަމުގެ ދާއިރާ ފުޅާވެގެންދާނެ ކަމަށްވެސް ވިދާޅުވި އެވެ.
މި ރަސްމިއްޔާތުގައި ވާހަކަދައްކަވަމުން އައިލެންޑް އޭވިއޭޝަންގެ މެނޭޖިން ޑިރެކްޓަރު އިބްރާހީމް އިޔާސް ވިދާޅުވީ، ގަން އެއާޕޯޓް ބޭސްއެއްގެ ގޮތުގައި ބަލައިގެން ކުރިއަށްގެންދާ މި ދަތުރުތައް ހަފުތާގެ ހުރިހާ ދުވަހަކު ކުރާނެ ކަމަށެވެ. މި ދަތުރުތަކަށް ބޭނުންކުރަނީ ސީޕްލޭންގެ ގޮތުގައި ބޭނުންކުރާ "ޓްވިން އޮޓާ" މަރުކާގެ ބޯޓެއްގައި ފުރޮޅު ހަރުކޮށްގެންނެވެ.
މިނިސްޓަރު އިތުރަށް ވިދާޅުވީ ރައީސް ޑރ. މުހައްމަދު މުއިއްޒުގެ ތަސައްވުރަކީ ހަމައެކަނި އެއާޕޯޓްތަކެއް އެޅުން ނޫން ކަމަށާއި، އެ ވަސީލަތްތަކުގެ ބޭނުން ހިފައި ރައްޔިތުންގެ ދިރިއުޅުމަށް ފަސޭހަކަން ގެނެސްދިނުން ކަމަށެވެ.
