އިންޑިއާއިން ފެނިފައިވާ ނިޕާ ވައިރަސް، އެ ގައުމުން ބޭރުވެ އެހެން ގައުމުތަކަށް ފެތުރުމުގެ ނުރައްކާ ކުޑަކަމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ބުނެފި އެވެ.
އިންޑިއާއިން ނިޕާ ވައިރަސް ޖެހިފައިވާ މީހުން ފެނުމާ ގުޅިގެން ސަރަހައްދީ ބައެއް ގައުމުތަކުން އެއާޕޯޓުތަކުގައި ސްކްރީންކުރުން ވަރުގަދަކޮށްފައިވީ ނަމަވެސް، މި ބަލި ކޮންޓްރޯލްކުރުމުގެ ގާބިލުކަން އިންޑިއާގެ އިދާރާތަކުގައި އެބަހުރި ކަމަށް އެ ޖަމިއްޔާއިން ފާހަގަކުރެ އެވެ.
ޑަބްލިޔުއެޗްއޯއިން ހާމަކުރި ގޮތުގައި، މިހާތަނަށް ފެނުނު ކޭސްތަކަށް ބަލާއިރު މި ބަލި އިންސާނުންގެ މެދުގައި ގައިން ގަޔަށް އެރުން އިތުރުވެފައިވާކަމުގެ އެއްވެސް ހެއްކެއް ލިބިފައެއް ނުވެ އެވެ.
ނިޕާ ވައިރަހަކީ އާންމުގޮތެއްގައި ވާލުގެ ވައްތަރެއް ކަމަށްވާ ފްރުޓް ބެޓްއާއި އޫރު ފަދަ ޖަނަވާރުގެ ޒަރިއްޔާއިން ފެތުރޭ ބައްޔެކެވެ. އިންސާނުންގެ މެދުގައި މި ބަލި ފެތުރެނީ ބަލި ޖެހިފައިވާ މީހަކާއެކު ގިނަ ވަގުތު ހޭދަކުރުމުންނެވެ. މި ބަލީގެ އަލާމާތްތަކުގެ ތެރޭގައި ހުން އައުމާއި، ބޮލުގައި ރިއްސުމާއި، ކެއްސުމާއި، ނޭވާލާން އުނދަގޫވުން ހިމެނެ އެވެ. ބަލި ބޮޑުވާ ހާލަތްތަކުގައި ސިކުނޑި ދުޅަވެ، ވާނުވާ ނޭނގުމާއި ފިޓުޖެހުން ފަދަ ނުރައްކާތެރި އަލާމާތްތައް ފެނެ އެވެ.
ޑަބްލިޔުއެޗްއޯގެ ތަފާސްހިސާބުތަކުން ދައްކާގޮތުގައި މި ބަލި ޖެހޭ މީހުންގެ 40 އިންސައްތައާއި 75 އިންސައްތައާ ދެމެދުގެ އަދަދެއްގެ މީހުން މަރުވެ އެވެ.
މި ބައްޔަށް ވަކި ހާއްސަ ފަރުވާއެއް ނުވަތަ ވެކްސިނެއް އަދި އުފެއްދިފައެއް ނުވެ އެވެ. ނަމަވެސް ބަލީގެ އަލާމާތްތަކަށް ފަރުވާ ދެވެ އެވެ. ގިނަ ވެކްސިންތަކެއް ތައްޔާރުކުރުމުގެ މަސައްކަތް ކުރިއަށްދާއިރު، އެ ތަކެތި އަދި އޮތީ ތަހުލީލު މަރުހަލާގަ އެވެ.
އިންޑިއާއިން ފެނުނު ނިޕާ ކޭސް ތަކާއި ގުޅިގެން ކުރިއަށްދާ ތަހުގީގުގައި އެ މީހުންނަށް ބަލި ޖެހުނު ގޮތެއް މިހާތަނަށް ދެނެގަނެވިފައެއް ނުވެ އެވެ. މިއީ ފާއިތުވި އަހަރުތަކުގެ ތެރޭގައި އިންޑިއާއިން ނިޕާ ވައިރަސް ފެނުނު ހަތްވަނަ ފަހަރެވެ. އަދި މިއީ ވެސްޓު ބެންގޯލުން މި ބަލި ރިޕޯޓުކުރި ތިންވަނަ ފަހަރެވެ.
