އެމެރިކާގެ ރައީސް ޑޮނަލްޑް ޓްރަމްޕް ބޭއްވި ކެބިނެޓް ބައްދަލުވުމެއްގައި ލޯ މަރައިގެން އިންނެވި މަންޒަރު ފެނުމާ ގުޅިގެން ފެތުރުނު ހަބަރުތަކަށް އޭނާ ރައްދު ދެއްވައިފި އެވެ. ވައިޓް ހައުސްގައި ބޭއްވި މި ބައްދަލުވުމުގައި ލޯ މަރާލީ ނިދި އައިސްގެން ނޫން ކަމަށާއި، އެއީ ބައްދަލުވުން މާ ބޮޑަށް "ފޫހިވުމުން" ކުރެއްވި ކަމެއް ކަމަށް ޓްރަމްޕް ވަނީ ބުނެފަ އެވެ.

މިދިޔަ ބުރާސްފަތި ދުވަހު ބޭއްވި މި ބައްދަލުވުމުގެ ތެރެއިން ޓްރަމްޕް އިރުކޮޅަކަށް ލޯ މަރައިގެން ހުންނަ މަންޒަރު ފެންނަ ވީޑިއޯތަކެއް އާންމުވުމާ ގުޅިގެން، ސޯޝަލް މީޑިއާގައާއި ސިޔާސީ ދާއިރާގައި ގިނަ ބައެއްގެ ފާޑުކިޔުން އޭނާއަށް ވަނީ އަމާޒުވެފަ އެވެ. ގިނަ ބަޔަކު ތުހުމަތު ކުރި ގޮތުގައި ޓްރަމްޕު އިނީ ބައްދަލުވުމުގެ ތެރޭގައި ނިދިފަ އެވެ.

ނަމަވެސް މިކަމާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން ޓްރަމްޕް ބުނީ، އޭނާގެ ސިއްހަތު ރަނގަޅު ކަމަށާއި ނިދީގެ އެއްވެސް މައްސަލައެއް ނެތް ކަމަށެވެ. އޭނާ ލޯ މަރާލީ ބައްދަލުވުމުގައި ދެކެވެމުންދިޔަ ދިގު އަދި ފޫހި ވާހަކަތަކުގެ ސަބަބުން ކަމަށް އޭނާ ތަކުރާރުކޮށް ބުންޏެވެ.

"އަހަރެން ލޯ މަރާލީ ނިދި އައިސްގެންނެއް ނޫން. އެއީ އެ ދައްކަމުންދިޔަ ވާހަކަތައް މާ ފޫހިވީމަ،" ޓްރަމްޕް ބުންޏެވެ. އޭނާ އިތުރަށް ބުނީ ބައެއް ކަންކަމާ ގުޅޭގޮތުން ކެބިނެޓް މެންބަރުން ދައްކަވާ ވާހަކަތަކަކީ ބައެއް ފަހަރު ވަރަށް ދިގުލައިގެންދާ ފޫހި ވާހަކަތަކެއް ކަމަށެވެ.

މީގެ ކުރިން ވެސް ޓްރަމްޕްގެ އުމުރާއި ސިއްހީ ހާލަތާ ގުޅުވައިގެން އިދިކޮޅު ފަރާތްތަކުން ވަނީ އެކި ކަހަލަ ސުވާލުތައް އުފައްދާފައެވެ. ނަމަވެސް ވައިޓް ހައުސްއިން ވަނީ ޓްރަމްޕުގެ ދިފާއުގައި ވާހަކަ ދައްކަވާފަ އެވެ. ވައިޓް ހައުސްގެ ތަރުޖަމާނު ބުނީ ރައީސް އަކީ ވަރަށް ބުރަކޮށް މަސައްކަތް ކުރައްވާ ބޭފުޅެއް ކަމަށާއި، ބައްދަލުވުމުގެ ހުރިހާ ކަމެއް އޭނާ ފުރިހަމައަށް ބައްލަވަމުން ގެންދަވާ ކަމަށެވެ.

މި ހާދިސާއަކީ ޓްރަމްޕްގެ ދެވަނަ ދައުރުގެ ތެރޭގައި އޭނާގެ ހަރަކާތްތަކާ ގުޅިގެން އާންމުންގެ ސަމާލުކަން އެންމެ ބޮޑަށް ހުއްޓުނު އެއް ކަންތަކެވެ.