ދެކުނުގެ ހަތަރު އަތޮޅު ވައިގެ ދަތުރުން ގުޅާލުމުން، ޓޫރިޒަމާއި އާންމު ދަތުރުފަތުރަށް ބޮޑު ލުޔެއް ލިބިގެންދާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.
މިނިސްޓަރު އަމީން މި މޭރުމުން ވިދާޅުވީ އެކްސްގައި ހިއްސާކުރެއްވި ޕޯސްޓެއްގަ އެވެ. މިނިސްޓަރު ވިދާޅުވީ، ދެކުނުގެ ހަތަރު އަތޮޅު ވައިގެ މަގުން ގުޅާލުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންނެވި ވައުދުފުޅާއި އެއްގޮތަށް "ސަދަން ކަނެކްޓިވިޓީ" މިއަދު އިފްތިތާހު ކުރެވިފައިވާ ކަމަށެވެ.
މިއީ ދެކުނުގެ ހަތަރު އަތޮޅުގެ ރައްޔިތުންގެ ދިރިއުޅުމަށް އުފާވެރިކަން ގެނުވާނެ މުހިންމު ފެށުމެއް ކަމަށް މިނިސްޓަރު ވަނީ ފާހަގަކުރައްވައިފަ އެވެ.
މިއީ ރައީސްގެ ސިޔާސަތާއި އެއްގޮތަށް، މި ސަރަހައްދުގެ ދަތުރުފަތުރުގެ ނިޒާމު ހަރުދަނާކޮށް އިގްތިސާދީ އާ ދިރުމެއް ގެނައުމަށް އެޅުނު މުހިންމު ފިޔަވަޅެއްކަން ފާހަގަކުރައްވަމުން މިނިސްޓަރު ވިދާޅުވީ، 1 ފެބްރުއަރީ 2026 ގައި މި ފެށޭ ހިދުމަތާއެކު، އައްޑޫ، ފުވައްމުލައް އަދި ހުވަދޫ އަތޮޅުގެ ޓޫރިޒަމާއި އާންމު ދަތުރުފަތުރަށް ބޮޑު ލުޔެއް ލިބިގެންދާނެ ކަމަށެވެ.
ދެކުނުގެ ހަތަރު އަތޮޅު ވައިގެ މަގުން ރަސްމީކޮށް ގުޅައިލުމަށް ބޭއްވި ރަސްމިއްޔާތު އޮތީ މިއަދު ހަވީރު އައްޑޫ ސިޓީ ގަން އިންޓަނޭޝަނަލް އެއާޕޯޓުގަ އެވެ. މި ރަސްމިއްޔާތުގައި ޓްރާންސްޕޯޓު މިނިސްޓަރު މުހައްމަދު އަމީންގެ އިތުރުން ސަރުކާރުގެ ބައެއް ވަޒީރުންނާއި އިސް ބޭފުޅުން ބައިވެރިވެވަޑައިގެންފައިވެ އެވެ.
މި ދަތުރުތައް ކުރާނީ ގައުމީ އެއާލައިން "މޯލްޑިވިއަން" އިންނެވެ. މި ދަތުރުތަކަށް ބޭނުންކުރާނީ ޑީއެޗްސީ-6-300 ޓްވިން އޮޓާ މަރުކާގެ އެއްފަހަރާ 15 މީހުންނަށް ދަތުރުކުރެވޭ ވަރުގެ ބޯޓުތަކެކެވެ. މި ބޯޓުތަކުން ދެކުނުގެ އަތޮޅުތަކަށް ދަތުރުކުރުމަށް ހަމަޖެހިފައިވާ އަގުތަކަކީ ރައްޔިތުންނަށް އަތްފޯރާފަދަ އަގުތަކެކެވެ.
އެގޮތުން ކަނޑައަޅާފައިވާ އަގުތަކަކީ:
- ގަން - ފުވައްމުލަކު: ކޮޅަކަށް 500 ރުފިޔާ
- ގަން - ކާޑެއްދޫ: ކޮޅަކަށް 900 ރުފިޔާ
- ގަން - ކޫއްޑޫ: ކޮޅަކަށް 900 ރުފިޔާ
- ފުވައްމުލަކު - ކާޑެއްދޫ: ކޮޅަކަށް 650 ރުފިޔާ
- ފުވައްމުލަކު - ކޫއްޑޫ: ކޮޅަކަށް 650 ރުފިޔާ
މި ދަތުރުތަކަށް ބުކިން ހެދުމުގެ ފުރުސަތު މިހާރު ވަނީ އާންމުކޮށް ހުޅުވާލައިފަ އެވެ.
