ދައުލަތުގެ މައި ވިޔަފާރި ކުންފުނި، ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އަށް މިދިޔަ އަހަރު ލިބުނު ޖުމްލަ އާމްދަނީ 15.5 ބިލިއަން ރުފިޔާއަށް އަރައިފިކަން އެ ކުންފުނިން ހާމަކޮށްފި އެވެ.
މިދިޔަ އަހަރުގެ މާލީ ރިޕޯޓުތައް ދައްކާގޮތުން، މިއީ 2024 ވަނަ އަހަރުގެ އާމްދަނީއާ އަޅާބަލާއިރު 98 މިލިއަން ރުފިޔާގެ އިތުރުވުމެކެވެ. ކުންފުނީގެ މާލީ ހިސާބުތަކަށް ބަލާއިރު، ޓެކުހަށް ކެނޑުމުގެ ކުރިން މިދިޔަ އަހަރު 910 މިލިއަން ރުފިޔާގެ ފައިދާއެއް ލިބިފައިވެ އެވެ. އަދި ދައުލަތަށް ދައްކަންޖެހޭ ޓެކުހަށް ކެނޑުމަށްފަހު، މިދިޔަ އަހަރުގެ ސާފު ފައިދާގެ ގޮތުގައި އެސްޓީއޯއަށް ލިބިފައިވަނީ 762 މިލިއަން ރުފިޔާ އެވެ.
އަހަރުގެ ފަހު ކުއާޓާ ނުވަތަ ހަތަރުވަނަ ކުއާޓާގެ ތަފުސީލުތަކަށް ބަލާއިރު، އެ ކުއާޓާގައި އެކަނިވެސް ޖުމްލަ އާމްދަނީގެ ގޮތުގައި 4.1 ބިލިއަން ރުފިޔާ ވަނީ ލިބިފަ އެވެ. މިއީ އޭގެ ކުރީ ކުއާޓަރާ އަޅާބަލާއިރު 8 އިންސައްތައިގެ ކުރިއެރުމެކެވެ. މި ކުރިއެރުމުގައި އެންމެ ބޮޑު ދައުރެއް އަދާކުރީ ތެލުގެ ވިޔަފާރި އާއި އެހެނިހެން ދާއިރާތަކުން ލިބުނު އާމްދަނީ އެވެ. އެގޮތުން ތެލުގެ އާމްދަނީ 4 އިންސައްތަ އިތުރުވެފައިވާއިރު، އެހެނިހެން ވިޔަފާރިތަކުން ލިބުނު އާމްދަނީ ވަނީ 19 އިންސައްތައަށް އިތުރުވެފަ އެވެ.
Advertisement
ޖުމްލަ އާމްދަނީއަށް އައި މި ބޮޑު ބަދަލާއެކު، މިދިޔަ އަހަރުގެ ފަހު ކުއާޓަރުގެ ޖުމްލަ ފައިދާގެ ގޮތުގައި އެސްޓީއޯއަށް 671 މިލިއަން ރުފިޔާ ލިބިފައިވެ އެވެ. މިއީ އޭގެ ކުރީ ކުއާޓަރާ އަޅާބަލާއިރު 11 އިންސައްތައިގެ އިތުރުވުމެކެވެ. ޓެކުހަށް ކެނޑުމަށްފަހު މިދިޔަ ކުއާޓާގެ ސާފު ފައިދާގެ ގޮތުގައި ލިބިފައިވަނީ 244 މިލިއަން ރުފިޔާ އެވެ.
އެސްޓީއޯއިން އަންނަނީ ރާއްޖޭގެ ބާޒާރުގައި މުދަލުގެ އަގު ހިފެހެއްޓުމަށާއި، ކާޑުގެ ބާވަތްތަކާއި ތެލުގެ އިތުރުން ބޭހާއި އިމާރާތްކުރުމުގެ ސާމާނު ފަސޭހަކަމާއެކު ރައްޔިތުންނަށް ފޯރުކޮށްދިނުމުގައި މުހިންމު ދައުރެއް އަދާކުރަމުންނެވެ.
