ދުބާއީއަކީ ތަރައްގީގެ ރޮނގުން "20 މިނެޓްގެ ސިޓީއަކަށް" ހެދުމަށް އަޒުމު ކަނޑައަޅައި އެކަން ކުރުމަށް ނިންމައިފި އެވެ.
މި މަޝްރޫއުގެ ދަށުން ދުބާއީގައި ދިރިއުޅޭ ރައްޔިތުންނަށް ގާތްގަނޑަކަށް ކޮންމެ ހިދުމަތެއް ވެސް ގިނަވެގެން 20 މިނެޓްގެ ތެރޭގައި ލިބޭނެ ކަމަށް ދުބާއީ ސަރުކާރުން ވަނީ ބުނެފަ އެވެ.
ދުބާއީ ސަރުކާރުން 20 މިނެޓްގެ ސިޓީއެއްގެ ހުވަފެން ހަގީގަތަކަށް ހެދުމަށް މަޝްރޫއެއް އެކުލަވާލާފައި ވާއިރު، ދުބާއީގެ ވަލީއަހުދު، އަދި ޑެޕިއުޓީ ޕްރައިމް މިނިސްޓަރު އަދި މިނިސްޓަރު އޮފް ޑިފެންސް ޝެއިހް ހަމްދާން ބިން މުހައްމަދު ބިން ރަޝީދު އަލް މަކްތޫމް ވަނީ އެ މަޝްރޫއު ފާސްކުރައްވައި ކުރިއަށް ގެންދިއުމަށް ނިންމަވާފަ އެވެ.
Advertisement
އެ މަޝްރޫއު ނިމުމުން ރައްޔިތުންނަށް ދުވަހުން ދުވަހަށް ބޭނުންވާ ޒަރޫރީ ވަސީލަތްތަކުގެ 80 އިންސައްތަ، އެންމެ 20 މިނެޓުގެ ތެރޭގައި ބޭނުންކުރަން ލިބޭނެ އެވެ. ހިދުމަތް ހޯދަން ބޭނުންވާ މީހުންނަށް ހިދުމަތްދޭ މަރުކަޒުތަކަށް ހިނގާފައި، ނޫންނަމަ ބައިސްކަލުން ނުވަތަ ތިމާވެއްޓާ ރައްޓެހި ދަތުރުފަތުރެއް ކޮށްގެން 20 މިނެޓް ތެރޭގައި ދެވޭނެ އެވެ.
މި މަޝްރޫއުގެ މަގުސަދަކީ ދުނިޔޭގެ ތަރައްގީވެފައިވާ އެހެން ސިޓީތަކަށްވުރެ މަދުވެގެން 10 އަހަރު ދުބާއީ ކުރިއަށް ގެންދިއުމެވެ.
މި މަޝްރޫއުގެ މައިގަނޑު ފޭސް ފަށަނީ ދުބާއީގެ އަލް ބަރްޝާ ދެ ސަރަހައްދުގަ އެވެ. އަލް ބަރްޝާގައި މަގުތައް ރައްކާތެރިކޮށް، ހިޔާދޭ ގަސް އިންދައި، ތިމާވެއްޓާ ރައްޓެހި ތަންތަން ހަދާނެ އެވެ.
މި މަޝްރޫއުގެ ދަށުން، ދުއްވާ ތަކެތީގެ ސަބަބުން ރައްޔިތުންނަށް ލިބޭ ޕްރެޝަރު ކުޑަކުރުމަށް އާ ކަންތައްތައް ތައާރަފުކޮށް ސިއްހީ ހިދުމަތް ދިނުމުގެ އަވަސް ނިޒާމެއް ވެސް ގާއިމު ކުރާނެ އެވެ.
