ޑިވެލޮޕްމަންޓް ބޭންކް އޮފް މޯލްޑިވްސް (ޑީބީއެމް) އަށް ބޭންކިން ވިޔަފާރި ފެށުމުގެ ހުއްދަ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ދޫކޮށްފި އެވެ.

އެމްއެމްއޭ އިން ބުނީ ޑިވެލޮޕްމަންޓް ބޭންކަށް ބޭނުންވާ ބޭންކިން ލައިސަންސް މިދިޔަ އޮކްޓޫބަރު މަހުގެ 13 ވަނަ ދުވަހު ދޫކޮށްފައިވާ ކަމަށާއި، މިހާރު ވިޔަފާރި ފެށުމުގެ ހުއްދަވެސް ދީފައިވާ ކަމަށެވެ.

ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅުގެ ދަށުން، ސަރުކާރުގެ ސައްތައިންސައްތަ ހިއްސާ އެކުލެވޭ ގޮތަށް 16 މެއި 2024 ގައި އުފެއްދެވި ކުންފުންޏެކެވެ. މި ބޭންކުގެ މައިގަނޑު މަގުސަދަކީ ދެމެހެއްޓެނިވި އިގުތިސާދީ އަދި އިޖުތިމާއީ ތަރައްގީއަށް އިންވެސްޓުކުރުމާއި، އުމްރާނީ ތަރައްގީއަށް ބޭނުންވާ ފައިސާ ހޯދުމުގައި ދިމާވާ ގޮންޖެހުންތަކަށް ހައްލު ހޯދައިދިނުމެވެ.

އެމްއެމްއޭއިން ހާމަކުރި ގޮތުގައި، މި ބޭންކުގެ ހިދުމަތް ފެށުމުން ދިގުމުއްދަތުގެ މާލީ އެހީތެރިކަން ހޯދުމަށް މަގުފަހިވެ، ރާއްޖޭގެ އިގުތިސާދު ދެމެހެއްޓެނިވި ގޮތެއްގައި ކުރިއެރުވުމަށް ބޮޑު އެހީތެރިކަމެއް ލިބިގެންދާނެ އެވެ. މިއީ ރާއްޖޭގެ މާލީ ދާއިރާ ފުޅާކޮށް ހަރުދަނާކުރުމަށް ކުރެވޭ މަސައްކަތަށް ލިބުނު މުހިންމު ކުރިއެރުމެއްގެ ގޮތުގައި އެމްއެމްއޭ އިން ސިފަކުރެ އެވެ.

މި ބޭންކާ ގުޅޭގޮތުން ރައީސުލްޖުމްހޫރިއްޔާ ޑރ. މުއިއްޒު ވިދާޅުވީ، މިއީ ރާއްޖޭގެ އިގުތިސާދު ކުރިއެރުވުމަށް ކުރެވޭ ތާރީހީ މަސައްކަތެއް ކަމަށެވެ. އަދި މި ބޭންކު ވެގެންދާނީ ފަތުރުވެރިކަމުގެ ދާއިރާގައި ރިސޯޓުތައް ތަރައްގީ ކުރުމާއި، އިއާދަކުރަނިވި ހަކަތަ، ރިއަލްއެސްޓޭޓް އަދި ހައުސިން ފަދަ ދާއިރާތަކުން އިންވެސްޓުކުރާ ފަރާތްތަކަށް މުހިންމު "ހަބަކަށް" ކަމަށްވެސް އެމަނިކުފާނު ވިދާޅުވި އެވެ.

ސަރުކާރުގެ އަމާޒަކީ މި ބޭންކު މެދުވެރިކޮށް ކުޑަ އިންޓްރެސްޓް ރޭޓެއްގައި ތަރައްގީގެ މުހިންމު މަޝްރޫއުތަކަށާއި އަމިއްލަ ބޮޑެތި އިންވެސްޓްމަންޓްތަކަށް ލޯނު ލިބޭނެ މަގު ތަނަވަސްކޮށްދިނުމެވެ. މީގެ އިތުރުން، ސިންޑިކޭޝަން ފައިނޭންސް މެދުވެރިކޮށް ޕީއެސްއައިޕީ މަޝްރޫއުތަކަށް ފައިސާ ފޯރުކޮށްދިނުމާއި، ރާއްޖޭގެ ބޭންކިން ނިޒާމުގައި ބޭރު ފައިސާ ބެހެއްޓުމުގެ ޝައުގުވެރިކަން އިތުރުކުރުމަކީވެސް މި ބޭންކުގެ މަގުސަދުތަކުގެ ތެރޭގައި ހިމެނޭ ކަންކަމެވެ.