އެމްއެމްއޭގެ ފައިނޭންޝަލް އިންޓެލިޖެންސް ޔުނިޓު، (އެފްއައިޔޫ)ގެ އިސްވެރިޔާގެ މަގާމުގައި ހުންނެވި އިސްމާއިލް ސާޖިދުގެ މައްޗަށް ކުރެވުނު ޖިންސީ ފުރައްސާރައިގެ މައްސަލައެއް ސާބިތުވުމާ ގުޅިގެން އޭނާ މިއަދު މަގާމުން ވަކިކޮށްފި އެވެ.
މި މައްސަލައާ ގުޅިގެން، ސާޖިދުގެ މައްޗަށް ކުރެވުނު ފުރައްސާރައިގެ ތުހުމަތުތައް ތަހުގީގުކޮށްފައި ވަނީ އެމްއެމްއޭގައި އުފައްދާފައިވާ ޖިންސީ ފުރައްސާރަ ހުއްޓުވުމާ ބެހޭ ކޮމިޓީންނެވެ. އެ ކޮމިޓީން މައްސަލަ ބެލުމަށްފަހު، އޭނާގެ މައްޗަށް އެކަން ސާބިތުވާ ކަމަށް ނިންމައި، ވަޒީފާއިން ވަކިކުރުމަށް ލަފާދީފައިވެ އެވެ. އެހެންކަމުން، ކޮމިޓީގެ ނިންމުމާ އެއްގޮތަށް އޭނާ މިހާރު ވަނީ މަގާމުން ވަކިކޮށްފަ އެވެ.
އެފްއައިޔޫގެ ވެރިޔާގެ މަގާމަށް ސާޖިދު އައްޔަންކުރެއްވީ މިދިޔަ އަހަރުގެ އޮގަސްޓް މަހުގެ ތެރޭގަ އެވެ. ނަމަވެސް، އޭނާގެ މައްޗަށް ހުށަހެޅުނު ޖިންސީ ފުރައްސާރައިގެ މައްސަލައާ ގުޅިގެން، މިދިޔަ ޑިސެމްބަރު މަހުގެ 30 ވަނަ ދުވަހުން ފެށިގެން އޭނާ ހުންނެވީ ސަސްޕެންޝަނުގަ އެވެ. ސާޖިދަކީ މީގެ ކުރިން ޓެކްސް އެޕީލް ޓްރައިބިއުނަލުގެ މެންބަރުކަންވެސް ކުރައްވާފައިވާ ބޭފުޅެކެވެ.
އެފްއައިޔޫއަކީ މަނީ ލޯންޑްރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން، ރާއްޖޭގެ މާލީ މުއާމަލާތްތައް މޮނިޓާ ކުރުމަށް އެމްއެމްއޭގައި ގާއިމުކޮށްފައިވާ މުހިންމު ޔުނިޓެކެވެ. ގާނޫނު ބުނާގޮތުން އެ ޔުނިޓުގެ އިސްވެރިޔާ އައްޔަންކުރުމާއި ވަކިކުރުމުގެ ފުރިހަމަ އިހުތިޔާރު ލިބިގެންވަނީ މަރުކަޒީ ބޭންކުގެ ގަވަރުނަރަށެވެ.
