ނ. ވިހަފަރުގައި އެއާޕޯޓު އެޅުމަށް ބޭނުންވާ ބިން ހިއްކަން މިއަދު ފަށައިފި އެވެ.
ވިހަފަރުގައި އެއާޕޯޓެއް ތަރައްގީކުރުމަށް ރައީސްގެ ގަރާރަކުން ކަނޑައަޅުއްވައި، އިއުލާންކުރެއްވީ މާޗް 2024ގަ އެވެ. އަދި ޖުލައި 2025 ގައި ނ. އަތޮޅުގެ ރައްޔިތުންނާ ބައްދަލުކުރައްވައި އެމަނިކުފާނު ވަނީ މި އަހަރުގެ ކުރީކޮޅު، މިކަމުގެ އަމަލީ މަސައްކަތް ފެށޭނެ ކަމުގެ ޔަގީންކަން ދެއްވައިފަ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ވަނީ ވިހަފަރުގައި އެއާޕޯޓު ތަރައްގީކުރުމަށް ބޭނުންވާ ބިންހިއްކުމުގެ މަސައްކަތް ކުރިއަށްދާ ގޮތް ބައްލަވާލައްވާފަ އެވެ. ވިހަފަރު އެއާޕޯޓް ތަރައްގީކުރުމަށް ބިންހިއްކުމުގެ މަޝްރޫއު އަމަލީގޮތުން ފެށުމަށް އެ ސަރަހައްދުގައި މިއަދު މެންދުރު ފަހު ބޭއްވި ރަސްމިއްޔާތު ޝަރަފުވެރި ކޮށްދެއްވީ ވެސް އެ މަނިކުފާނެވެ.
Advertisement
މިއަދުގެ ރަސްމިއްޔާތުގައި އަމަލީ ގޮތުން މި މަޝްރޫއު ފައްޓަވައިދެއްވީ އިކޮނޮމިކް މިނިސްޓަރު މުހައްމަދު ސައީދާއި، މޯލްޑިވްސް އެއާޕޯޓްސް ކޮމްޕެނީ ލިމިޓެޑްގެ މެނޭޖިން ޑިރެކްޓަރު އިބްރާހީމް ޝަރީފް މުހައްމަދެވެ.
ނ. އަތޮޅުގައި އެއާޕޯޓެއް އޮންނަނީ ހަމައެކަނި މާފަރުގަ އެވެ. މާފަރުގައި އެއާޕޯޓެއް އޮތްކަމުގައި ވިޔަސް، އެ އަތޮޅު ހޮޅުދޫ، ވެލިދޫ އަދި ފޮއްދޫ ހިމެނޭ ސަރަހައްދުގައި އިތުރު އެއާޕޯޓެއް އޮތުން މުހިންމު ކަމަށް ރައީސް ދެކެވަޑައިގަންނަވައެވެ. ވަކިން ޙާއްސަކޮށް ފަތުރުވެރިކަމުގެ ގޮތުން ކުރިއަރާފައިވާ، އަދި ކުރިއަރަމުންދާ އަތޮޅެއްގެ ގޮތުންނާއި، އިގްތިސާދު ސިންދަފާތުކުރުމުގެ ބޮޑެތި މަޝްރޫއުތައް ހިނގާނޭ އަތޮޅެއްގެ ގޮތުން، މި އެއާޕޯޓް އޮތުމުން ދުރު ރާސްތާގައި ލުއިފަސޭހައާއި ފައިދާ ލިބޭނޭކަމުގައި ވެސް އެ މަނިކުފާނު ޤަބޫލުފުޅުކުރައްވަ އެވެ.
ރައީސްގެ ވައުދުފުޅާ އެއްގޮތަށް، ނ. ވިހަފަރުގައި އެއާޕޯޓު ތަރައްގީކުރުމަށް ބިންހިއްކުމުގެ އަމަލީ މަސައްކަތް މިއަދު ފަށާފައިވާއިރު، މި މަޝްރޫއުގެ ދަށުން، 40 ހެކްޓަރަށްވުރެ ބޮޑު ސަރަހައްދެއް، 1.6 މީޓަރުގެ އުސްމިނުގައި ހިއްކާނެ އެވެ.
