ފަސް ދުވަސް ތެރޭގައި މާލެ ސަރަހައްދުން އެކަނި 19،000 އަށްވުރެ ގިނަ މަސްދަޅު ކޭސް ދޫކޮށްފައިވާ ކަަމަށް ސިޓީސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.
މި އަހަރު މަސްދަޅު ކޭސް ބެހުމަށް ހަމަޖެހިފައިވަނީ ޖުމްލަ 118،773 ގޭބީސީ އަކަށެވެ. އެއީ މާލޭގެ 61،755 ގޭބީސީއަކާއި އަތޮޅުތެރޭގެ 56،918 ގޭބީސީ އެވެ. މަސްދަޅު ކޭސް ބަހަން ފެށީ މިދިޔަ ހޮނިހިރު ދުވަހު އެވެ.
"އެކްސް"ގައި ކުރެއްވި ޕޯސްޓެއްގައި އާދަމް ޝަރީފް ވިދާޅުވީ، މާލޭގައި ރޯދަ ހަދިޔާ ބަހަން ފެށިފަހުން މިވީ ފަސް ދުވަހުގެ ތެރޭގައި 19,468 މަސްދަޅު ކޭސް ވަނީ ބަހާފައި ކަމަށެވެ.
ސިޓީސް މިނިސްޓްރީން ވަނީ އަތޮޅު ތެރޭގެ ރަށްތަކަށް ވެސް މަސްދަޅު ކޭސް ފޮނުވުމުގެ މަސައްކަތް ފަށާފަ އެވެ.
އަދި ބައެއް ރަށްތަކުގައި މަސްދަޅުކޭސް ބަހައި ނިމިފައިވާ ކަމަށް މިނިސްޓްރީން ވަނީ ބުނެފަ އެވެ. އެގޮތުން ހއ. މުރައިދޫ އާއި ހދ. ފިނޭ އަދި ނޮޅިވަރަމްފަރުގައި ވަނީ މަސްދަޅު ކޭސް ބަހައި ނިމިފައިވާއިރު ހދ. ނޮޅިވަރަމުގައި މަސްދަޅު ކޭސް ބެހުމުގެ މަސައްކަތް ކުރިއަށް ދާ ކަމަށް މިނިސްޓްރީއިން މައުލޫމާތު ދީފައިވެ އެވެ.
ހަމަ އެހެންމެ ނ. އަތޮޅުގެ ހުރިހާ ރަށެއްގެ އިތުރުން، ޅ. އަތޮޅުގެ ހަތަރު ރަށަކަށްވެސް މަސްދަޅު ކޭސް ފޮނުވާފައިވާ ކަމަށާއި ޅ. އޮޅުވެލިފުށީގެ ހުރިހާ ގޭބިސީތަކައް މަސްދަޅު ކޭސްތައް ހަވާލުކޮށް ނިމިފައިވާ ކަމަށްވެސް މިނިސްޓްރީން ބުންޏެވެ.
