ޓާކޯސް އަކީ މެކްސިކޯއަށް ނިސްބަތްވާ، މުޅި ދުނިޔޭގައިވެސް ބޮޑު މަގުބޫލުކަމެއް ހޯދާފައިވާ، ރަހަ މީރު ކެއުމެކެވެ. މީގައި އާންމުކޮށް ބޭނުންކުރަނީ ފަތްޖަހާލާފައި ނުވަތަ އޮޅާލާފައިވާ "ޓޯޓިލާ" އެކެވެ. އޭގެ ތެރެއަށް ރަހަ ހެޔޮވަރުކޮށްފައިވާ މަހުގެ ބާވަތްތަކާއި، ތާޒާ ތަރުކާރީއާއި، ޗީޒްގެ އިތުރުން ތަފާތު ސޯސްތައް އަޅާފައި ހުރެއެވެ. ޓަކޯސްގެ އެންމެ ހާއްސަ އެއް ސިފައަކީ، އެކި މީހުންގެ ރަހަތަކާ ގުޅޭގޮތުން އޭގެ ތެރެއަށް އަޅާ ބާވަތްތައް ފަސޭހަކަމާއެކު ބަދަލުކޮށްލެވުމެވެ. އަވަސް ކެއުމެއްގެ ގޮތުގައި ނުވަތަ ފުރިހަމަ ބޮޑު ކެއުމެއްގެ ގޮތުގައި ބޭނުންކުރި ކަމުގައިވިޔަސް، ޓަކޯސް އަކީ ތަފާތު މީރު ރަހަތަކެއް އެކުލެވިގެންވާ ހިތްގައިމު ކެއުމެކެވެ.
ގޭގައި ފަސޭހައިން ތައްޔާރުކޮށްލެވޭނެ މީރު ޓާކޯއާއި ޑިޕް ހަދާނެ ގޮތް ތިރީގައި އެވަނީއެވެ.
ކްލެސިކް ޓާކޯ- ބޭނުންވާ ތަކެތި:
8 ޓާކޯ ޝެލް (ހަރު ނުވަތަ މަޑު ޓޯޓީލާ)
300 ގްރާމް މުގުރި ގެރިމަސް ނުވަތަ ކުކުޅުމަސް
1 ކުޑަ ފިޔާ (ކޮށާފައި)
2 އިނގުރު/ ލޮނުމެދު (ގާނާފައި)
1 ސައިސަމުސާ މިރުސް ކުނޑި
1 ސައިސަމުސާ ޕެޕްރިކާ
½ ސައިސަމުސާ ދިރި
ލޮނު (ރަހަލާވަރަށް)
1 ކުޑަ ޓޮމާޓޯ (ކުދިކޮށް ކޮށާފައި)
1 ޖޯޑު ލެޓިއުސް (ކޮށާފައި)
½ ޖޯޑު ޗެޑާ ޗީޒް (ގާނާފައި)
2 ސައިސަމުސާ ޒައިތޫނި ތެޔޮ
ތައްޔާރުކުރާނެ ގޮތް:
ތަވައަކަށް ޒައިތޫނި ތެޔޮ އަޅައި މެދުގިނީގައި ހޫނުކުރާށެވެ.
ކޮށާފައި ހުރި ފިޔާ އަދި ލޮނުމެދު އަޅައި މީރުކޮށްލާށެވެ.
މަސްކޮޅު އެޅުމަށްފަހު، ރަނގަޅަށް ރޯފިލައި މުށިކުލަ އަރަންދެން ކައްކާށެވެ.
މިރުސް ކުނޑި، ޕެޕްރިކާ، ދިރި އަދި ލޮނު އެއްކޮށްލުމަށްފަހު 2 ނުވަތަ 3 މިނެޓު ވަންދެން ކައްކާށެވެ.
ޓާކޯ ޝެލްތައް ޕެކެޓުގައިވާ އިރުޝާދާ އެއްގޮތަށް ހޫނުކޮށްލާށެވެ.
ކޮންމެ ޓާކޯ ޝެލްއެއްގެ ތެރެއަށް ތައްޔާރުކުރި މަސްކޮޅުން އެތިކޮޅެއް އަޅާށެވެ.
މައްޗަށް ލެޓިއުސް، ޓޮމާޓޯ އަދި ގާނާފައި ހުރި ޗީޒް އަޅާށެވެ.
ކްރީމީ ޓާކޯ ޑިޕް- ބޭނުންވާ ތަކެތި:
1 ދޮން އަވޮކާޑޯ
½ ޖޯޑު ސަވާ ކްރީމް ނުވަތަ ގްރީކް ޔޯގަޓް
1 ސައިސަމުސާ ލިނބޯ ހުތް
1 ކުޑަ ލޮނުމެދު (ގާނާފައި)
ލޮނު, ލިނބޯ, އަސޭމިރުސް (ރަހަލާވަރަށް)
ކޮރިއަންޑާ ފަތް (ބޭނުންނަމަ ކޮށާފައި)
ތައްޔާރުކުރާނެ ގޮތް:
އަވޮކާޑޯކޮޅު ތައްޓަކަށް އަޅައި ރަނގަޅަށް އޮމާންވަންދެން މޮޑެލާށެވެ.
އޭގެ ތެރެއަށް ސަވަރ ކްރީމް (ނުވަތަ ޔޯގަޓް) އެއްކޮށްލާށެވެ.
ލިނބޯހުތް، ލޮނުމެދު، ލޮނު އަދި އަސޭމިރުސް އަޅާށެވެ.
ހުރިހާ އެއްޗެއް ރަނގަޅަށް އެއްވެ ކްރީމްގަނޑަކަށް ވަންދެން އެއްކޮށްލާށެވެ.
ޓާކޯއާ އެކު ސާވްކުރާއިރު، ފިނިކޮށް ބެހެއްޓުމުން ރަހަ މީރުވާނެއެވެ.
