ބޮލީވުޑްގެ ބަތަލާއިންގެ ތެރެއިން ގުދުރަތީ ރީތިކަމެއް ލިބިފައިވާ ހަމައެކަނި ފަންނާނަކީ އައިޝްވާރިޔާ ރާއީ ބައްޗަން ކަމަށް ބޮލީވުޑްގެ މަޝްހޫރު ޑައިރެކްޓަރު އަދި ކޮރިއޮގްރަފަރު ފަރާ ހާން ބުނެފި އެވެ.
ފަރާ މިހެން ބުނެފައިވަނީ އޭނާގެ ރަސްމީ ޔޫޓިއުބް ޗެނަލަށް ދޫކޮށްލި ވީޑިއޯއެއްގަ އެވެ. މި ވީޑިއޯގައި ފަރާ ވަނީ އޭނާގެ އާންމު ދިރިއުޅުމުގެ ބައެއް މަންޒަރުތައް ފޭނުންނަށް ދައްކާލާފަ އެވެ. އޭގެ ތެރޭގައި އޭނާ ގެންގުޅޭ ސްކިން ކެއާ ބާވަތްތަކާއި، އެ ތަކެތި ބޭނުންކުރާ ގޮތްވެސް ވަނީ ހިއްސާކޮށްފަ އެވެ.
ފަރާ ސްކިން ކެއާ ކުރާ މަންޒަރު ފެނުމުން، އޭނާގެ ގޭގައި މަސައްކަތްކުރާ ދިލިޕް ނަމަކަށް ކިޔާ މީހަކު ވަނީ ފަރާ އަކީ ގުދުރަތީ ގޮތުންވެސް ވަރަށް ރީތި މީހެއް ކަމަށް ބުނެފައެވެ. ނަމަވެސް، ދިލިޕްގެ އެ ވާހަކައަށް ރައްދު ދެމުން ފަރާ ބުނީ އޭނާއަކީ އެހާ ރީތި މީހެއް ނޫން ކަމަށެވެ. އަދި ބޮލީވުޑްގައި މިހާތަނަށް މަސައްކަތްކުރި އެކްޓަރުންގެ ތެރެއިން ހަގީގީ ގުދުރަތީ ރީތިކަމެއް ލިބިފައިވާ ހަމައެކަނި ފަންނާނަކީ ކުރީގެ މިސް ވޯލްޑް އައިޝްވާރިޔާ ރާއީ ކަމަށް ފަރާ ފާހަގަކުރި އެވެ.
Advertisement
ފަރާގެ މި ވާހަކަތަކާއެކު އެ ވީޑިއޯ މިހާރު ވަނީ ސޯޝަލް މީޑިއާގައި ވަރަށް ބޮޑަށް ވައިރަލްވެފަ އެވެ. ގިނަ ބަޔަކު ދަނީ ފަރާގެ މި ތެދުވެރިކަމަށް ސާބަސް ދެމުންނެވެ. އަދި އައިޝްވާރިޔާ އަކީ އެއްވެސް މޭކަޕަކާ ނުލައިވެސް ބޮލީވުޑްގައި ފެންނަ އެންމެ ރީތި އެއް ބަތަލާ ކަމަށް ގިނަ ބަޔަކު އެއްބަސްވެ، ފަރާގެ ވާހަކައަށް ތާއީދުކޮށްފައިވެ އެވެ.
