އައްޑޫ އިކުއަޓޯރިއަލް ހޮސްޕިޓަލުގައި ކެތު ލެބުގެ ހިދުމަތް ރަސްމީކޮށް ފަށައިފި އެވެ. މި ކެތު ލެބަކީ މާލެއިން ބޭރުގައި، އަތޮޅުތެރޭގެ ރަށެއްގައި ގާއިމުކުރި ފުރުތަމަ ކެތު ލެބެވެ.

އައްޑޫ ސިޓީގައި ކެތު ލެބުގެ ހިދުމަތް ދޭން ފަށާފައިވާއިރު އެ ސިޓީގައި މި ހިދުމަތް ފެށުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެކެވެ. އެގޮތުން އެ މަނިކުފާނުގެ ވައުދުފުޅާ އެއްގޮތަށް އައްޑޫ އިކުއަޓޯރިއަލް ހޮސްޕިޓަލުގައި މި ހިދުމަތް ގާއިމުކުރުމަށް، އިމާރާތަށް ގެންނަންޖެހޭ ބަދަލުތައް ގެނެސް، މެޝިނަރީސް ވެސް ވަނީ އިންސްޓޯލްކޮށްފަ އެވެ.

އައްޑޫ އިކުއަޓޯރިއަލް ހޮސްޕިޓަލާއި އިންދިރާ ގާންދީ މެމޯރިއަލް ހޮސްޕިޓަލް ގުޅިގެން ހިންގާ މި ކެތު ލެބުން މިހާތަނަށް ހަތް މީހަކު ފަރުވާ ހޯދާފައިވެ އެވެ.

އައްޑޫ ސިޓީގައި ކެތު ލެބް ހުޅުވިގެން ދިއުމާ ގުޅިގެން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގް ހަލީމް ވިދާޅުވީ، އައްޑޫ ސިޓީގައި މި ހިދުމަތް ފެށިގެން ދިއުމަކީ ސަރުކާރުން އަތޮޅުތެރޭގެ ސިއްހީ ހިދުމަތް ފުޅާކުރުމަށް ކުރިއަށްގެންދާ މަސައްކަތްތަކަށް ލިބުނު ވަރަށް ބޮޑު ކުރިއެރުމެއް ކަމަށެވެ. މީގެ އިތުރުން އައްޑޫ އިކުއަޓޯރިއަލް ހޮސްޕިޓަލުގެ ސީއީއޯ އިބްރާހިމް ޔާސިރު ވިދާޅުވީ، މި ސަރުކާރުން ކުރެއްވި މަސައްކަތުން ކެތު ލެބުގެ ހިދުމަތް ފެށިގެން ދިއުމަކީ ދެކުނުގެ އަތޮޅުތަކުގެ ރައްޔިތުންނަށް ލިބިގެންދިޔަ ކުރިއެރުމެއް ކަމަށެވެ.

އައްޑޫ އިކުއަޓޯރިއަލް ހޮސްޕިޓަލުގައި ކެތު ލެބުގެ ހިދުމަތް ފަށާފައިވަނީ، އައިޖީއެމްއެޗުގެ ކާޑިއެކް ސެންޓަރާ ގުޅިގެންނެވެ. މި ވަގުތު އައިޖީއެމްއެޗުގެ ޑޮކްޓަރުންނާއެކު ސާޖަރީތައް ހެދުމުގައި ހަރަކާތްތެރިވި ނަމަވެސް ކުރިއަށް އޮތްތަނުގައި އޭއީއެޗްގެ ޑޮކްޓަރުންނާއި ނަރުހުން ބަލި މީހުންނަށް ފަރުވާދިނުމުގައި ހަރަކާތްތެރިވާނެ ކަމަށް އައިޖީއެމްއެޗުން ވަނީ ބުނެފަ އެވެ.