ކީރިތި ގުރުއާން ތަފްސީރުކުރުމަށް އޭއައި ބޭނުންކުރުން މިސްރުގެ ދާރުލް އިފްތާއިން މަނާކޮށްފި

ކީރިތި ގުރުއާން ތަފްސީރު ކުރުމަށް އާޓިފިޝަލް އިންޓެލިޖެންސް އެޕްލިކޭޝަން ބޭނުންކުރުން މިސްރުގެ ދާރުލް އިފްތާއިން މަނާކޮށްފި އެވެ.

މީހަކު ކުރި ސުވާލެއްގެ ޖަވާބުގައި މިސްރުގެ ދާރުލް އިފްތާއިން ބުނީ ކީރިތި ގުރުއާން މާނަކުރުމަށް ޗެޓް ޖީޕީޓީ ހިމެނޭ ގޮތަށް އާޓިފިޝަލް އިންޓެލިޖެންސް އެޕްލިކޭޝަންތަކަށް ބަރޯސާވުމަކީ ޝަރުއީ ގޮތުން މަނާ ކަމެއް ކަމަށެވެ.

މިސްރުގެ ދާރުލް އިފްތާއިން އިތުރަށް ބުނެފައި ވަނީ ކީރިތި ގުރުއާން ތަފުސީރުކުރުމަށް ޓަކައި އާޓިފިޝަލް އިންޓެލިޖެންސް، ބަރޯސާވެފައި ވަނީ ޝައްކުތަކާއި އަންދާޒާތަކާއި ސައްހަ ނޫން މަސްދަރުތަކާއި މައުލޫމާތަށް ކަމުން މުޖުތަމައުގައި ދީނީ އަދި ދިރާސާތަކުގެ ކޮރަޕްޝަނާއި އޮޅުންބޮޅުން އުފެދިދާނެ ކަމަށެވެ.

އަދި އެއްވެސް ސައްހަ މަސްދަރަކަށް ބަރޯސާ ނުވާ، އާޓިފިޝަލް އިންޓެލިޖެންސް އެޕްލިކޭޝަންތަކުން ކީރިތި ގުރުއާނުގެ ތަފުސީރު ލިއުމުން، އޮޅުން ބޮޅުން ބޮޑު އަދި ސައްހަ ނޫން މައުލޫމާތު ފެތުރުމުގެ ފުރުސަތު ބޮޑު ކަމަށް ވެސް ދާރުލް އިފްތާއިން ވަނީ ބުނެފަ އެވެ.

މިސްރުގެ ދާރުލް އިފްތާއިން ބާރުއަޅާފައި ވަނީ ކީރިތި ގުރުއާނުގެ ތަފްސީރު ދެނެގަތުމަށްޓަކައި ސައްހަ ތަފްސީރުތަކާއި، އިތުބާރުހުރި ޝަރަހަވެރިންނާއި، އިލްމީ ފަރާތްތަކާއި، ދީނީ މުއައްސަސާތަކުގެ އެހީތެރިކަން ހޯދުމަށެވެ.