ޔަމަނުގެ ސަރަޙައްދީ ކަނޑުގެ ސަލާމަތާއި ރައްކާތެރިކަން ދެމެހެއްޓުމަށާއި، ބައިނަލްއަޤްވާމީ ކަނޑުދަތުރުފަތުރަށް ހުރަސްއެޅުނަނުދިނުމަށްޓަކައި ސަރުކާރަށް ތާއީދުކުރާ ބައިވެރިންނާ ގުޅިގެން މަސައްކަތް ކުރަމުންދާ ކަމަށް އެ ޤައުމުގެ ކޯސްޓްގާޑުން ހާމަކޮށްފިއެވެ.
ޔަމަނުގެ ކޯސްޓްގާޑުން ނެރުނު ބަޔާނުގައި ބުނެފައިވަނީ، ބައިނަލްއަޤްވާމީ ވިޔަފާރި އުޅަނދުފަހަރަށް އަމާން މާޙައުލެއް ޤާއިމުކޮށްދިނުމަށާއި، ކަނޑުމަތީގެ ނިޔަމަކަން ޙިމާޔަތްކުރުމަށްޓަކައި ޔަމަނުގެ ސަރުކާރަށް އެއްބާރުލުންދޭ އިއްތިޙާދީ ބާރުތަކާއެކު ގާތުން މަސައްކަތް ކުރަމުންދާ ކަމަށެވެ.
މި ފިޔަވަޅު އަޅަން ނިންމާފައިވަނީ ރަތްކަނޑާއި އަދަން ކަނޑުއޮޅި ހިމެނޭ ސަރަޙައްދުގައި އުޅަނދުފަހަރަށް އަމާޒުކޮށް ދެމުންދާ ޙަމަލާތަކާ ގުޅިގެން، ކަނޑުދަތުރުފަތުރުގެ ސަލާމަތާމެދު ބޮޑެތި ކަންބޮޑުވުންތަކެއް އުފެދިފައިވާ ދަނޑިވަޅެއްގައެވެ. ޔަމަނުގެ ކޯސްޓްގާޑުން ފާހަގަކުރި ގޮތުގައި، ދުނިޔޭގެ އިޤްތިޞާދާ ގުޅިފައިވާ މި މުހިންމު ކަނޑުގެ ސަރަޙައްދު ހަމަނުޖެހުންތަކުން ދުރުކޮށް، އަމާންކަން ދެމެހެއްޓުމަކީ އެ ފަރާތްތަކުގެ މައިގަނޑު މަޤްޞަދެވެ.
Advertisement
އަދި މީގެ އިތުރުން، ޣައިރު ޤާނޫނީ ޢަމަލުތައް ހުއްޓުވުމަށާއި ކަނޑުފޭރުމުގެ ނުރައްކާތަކުން އުޅަނދުތައް ސަލާމަތްކުރުމަށް އަޅަންޖެހޭ ސަލާމަތީ ފިޔަވަޅުތައް އިތުރަށް ވަރުގަދަކުރަމުންދާ ކަމަށްވެސް ރިޕޯޓްތައް ބުނެއެވެ. ސަރަޙައްދީ ހަމަޖެހުން ޤާއިމުކުރުމަށްޓަކައި ބައިނަލްއަޤްވާމީ ފަރާތްތަކާ ގުޅިގެން ކުރެވެމުންދާ މި މަސައްކަތްތަކަކީ ކަނޑުމަތީގެ ސަލާމަތްތެރިކަން ކަށަވަރުކުރުމަށް އެޅޭ މުހިންމު ފިޔަވަޅެއް ކަމަށް ޔަމަނުގެ ކަމާބެހޭ ފަރާތްތަކުން ދެކެއެވެ.
