ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، މިއަހަރުގެ ރަމަޟާން މަހުގެ ހަދިޔާގެ ގޮތުގައި ކޮންމެ ގޭބިސީއަކަށް ދޫކުރާ މަސްދަޅު ކޭސް ބެހުމުގެ މަސައްކަތް ބާރު ދުވެލީގައި ކުރިއަށްދާއިރު، މިހާތަނަށް 12,274 ގޭބިސީއަކަށް މަސްދަޅު ކޭސް ދޫކޮށްފައިވާ ކަމަށް ސިޓީސް މިނިސްޓްރީން ހާމަކޮށްފިއެވެ.
މިނިސްޓްރީން ބުނިގޮތުގައި، މާލެ ސަރަހައްދުގައި އެކަނިވެސް 65,230 ޑޮމެސްޓިކް ކަރަންޓް މީޓަރު ރަޖިސްޓްރީކޮށްފައިވެ އެވެ. ސަރުކާރުން ނިންމަވާފައިވަނީ ކޮންމެ ކަރަންޓު މީޓަރަކަށް މަސްދަޅު ކޭހެއް ދޫކުރުމަށެވެ. މިހާތަނަށް ދޫކުރެވުނު 12,274 ކޭހަކީ މާލެ ސަރަޙައްދުގައި ބަހަންޖެހޭ ޖުމްލަ ކޭހުގެ އިންސައްތައަށް ބަލާއިރު 18.8 އިންސައްތައެވެ.
މާލެ ސަރަހައްދުގައި މިދިޔަ ހޮނިހިރު ދުވަހުގެ ރޭ މަސްދަޅު ކޭސް ބަހަން ފަށާފައިވާއިރު، އަތޮޅުތަކުގައި މި މަސައްކަތް ފެށުމަށް މިހާރު ދަނީ ފަހުގެ ތައްޔާރީތައް ވަމުންނެވެ. އެސްޓީއޯއިން މިހާރު ވަނީ އަތޮޅުތަކަށް މަސްދަޅު ކޭސްތައް ފޮނުވުމުގެ މަސައްކަތް ފަށާފަ އެވެ. އަދި ރަށްރަށުގައި މަސްދަޅު ކޭސް ބެހުމުގެ އިންތިޒާމްތައް ކުރިއަށްދާނީ އެ ރަށެއްގެ ކައުންސިލްގެ ބެލުމުގެ ދަށުންނެވެ. އެސްޓީއޯއިން ބުނި ގޮތުގައި އެކި ސަރަހައްދުތަކުގައި ކޭސްތައް ގުދަންކުރެވޭނެ އިންތިޒާމް މިހާރު ވަނީ ހަމަޖެހިފަ އެވެ.
މުޅި ރާއްޖޭގައި ޖުމްލަ 118,673 ގޭބިސީއަށް މަސްދަޅު ކޭސް ދޫކުރުމަށް ސަރުކާރުން ވަނީ އަމާޒު ހިފާފަ އެވެ. މާލެ ސަރަހައްދުގައި މި މަސައްކަތް ފަސޭހަކުރުމަށްޓަކައި 15 ސަރަހައްދެއް ކަނޑައަޅާފައިވާއިރު، ކޭސް ދޫކުރަމުންދަނީ ހާއްސަ ޕޯޓަލްއެއް މެދުވެރިކޮށް ޓޯކަން ނެގުމުންނެވެ.
މާލެ ސަރަހައްދުގައި މަސްދަޅު ކޭސް ބަހާ މަރުކަޒުތައް:
މާލޭގައި: މިފްކޯ މަރުކަޒު، ސޯޝަލް ސެންޓަރު، އެމްޓީސީސީ ސޯމިލު، ހެންވޭރު ބޯޅަދަނޑު އަދި ގަލޮޅު ދަނޑު.
ހުޅުމާލެ ފޭސް 1 ގައި: ޢުމަރު ޒާހިރު ބިލްޑިންގ، ޕޮލްކޯ ޓަވަރު އަދި މުޙައްމަދު ޤާސިމް ޕްރީ ސްކޫލް.
ހުޅުމާލެ ފޭސް 2 ގައި: ކާމިލު ދީދީ ސްކޫލް، ހިޔާ ޓަވަރު 10 އަދި އެމްޕީއެލް ޓަވަރު ޕީ.
ވިލިމާލޭގައި: ވެމްކޯ ސައިޓު.
ސަރުކާރުގެ މި ނިންމުމަކީ ރަމަޟާން މަހު ރައްޔިތުންނަށް ލުއިފަސޭހަކޮށްދިނުމުގެ ގޮތުން ރައީސް މުޢިއްޒު ނިންމަވާފައިވާ ވަރަށް މުހިންމު ނިންމެވުމެކެވެ.
