އޮންލައިންކޮށް ކުރިމަތިވާ ބުލީކުރުމާއި، ކުޑަކުދިންގެ ނަފްސާނީ ދުޅަހެޔޮކަމަށް ހުރި ނުރައްކާތަކާ މެދު ކަންބޮޑުވުން އިތުރުވަމުންދާ މި ދަނޑިވަޅުގައި، 15 އަހަރުން ދަށުގެ ކުދިން ސޯޝަލް މީޑިއާ ބޭނުންކުރުން މަނާކުރުމަށް ފްރާންސްގެ ނެޝަނަލް އެސެމްބްލީން މިދިޔަ ހޯމަ ދުވަހު ތާއީދުކޮށްފި އެވެ.
މި ބިލުގައި ހުށަހަޅާފައިވަނީ 15 އަހަރުން ދަށުގެ ކުދިން ސޯޝަލް މީޑިއާގެ އެކި ވަސީލަތްތަކާއި، އެފަދަ ޕްލެޓްފޯމްތަކުގައި ހިމެނޭ މުއާމަލާތްކުރާ ބައިތައް ބޭނުންކުރުން މަނާކުރުމަށެވެ. މިއީ ސޯޝަލް މީޑިއާގެ ސަބަބުން ކުޑަކުދިންނަށް ކުރާ ނޭދެވޭ އަސަރުތަކާ މެދު އާންމުންގެ މެދުގައި އޮތް ބޮޑު ކަންބޮޑުވުންތަކާ ގުޅިގެން އެކުލަވާލާފައިވާ ބިލެކެވެ.
ފްރާންސްގެ ތިރީގޭގައި ނެގި ވޯޓުގައި މި ބިލަށް 116 މެންބަރުން ތާއީދުކޮށްފަވާއިރު، 23 މެންބަރުން ވަނީ ދެކޮޅަށް ވޯޓު ދީފައި އެވެ. މި ބިލު ދެން ހުށަހަޅޭނީ ސެނެޓަށެވެ. އެއަށްފަހު، ފަހުގެ ވޯޓަކަށް އަލުން ތިރީގެއަށް ހުށަހެޅޭނެއެވެ.
Advertisement
ރައީސް އެމަނުއެލް މެކްރޯން ވަނީ ޒުވާނުންގެ މެދުގައި ހިނގާ އަނިޔާވެރި އަމަލުތަކުގެ އެއް ސަބަބަކީ ސޯޝަލް މީޑިއާ ކަމަށް ވިދާޅުވެފަ އެވެ. އޭނާ ބޭނުންފުޅުވަނީ، 16 އަހަރުން ދަށުގެ ކުދިންނަށް ފޭސްބުކް، ސްނެޕްޗެޓް، ޓިކްޓޮކް އަދި ޔޫޓިއުބް ފަދަ ވަސީލަތްތައް މަނާކުރި ދުނިޔޭގެ ފުރަތަމަ ގައުމު ކަމަށްވާ އޮސްޓްރޭލިއާއިން ނިންމި ފަދަ ހަރުދަނާ ފިޔަވަޅެއް ފްރާންސްއިން ވެސް އެޅުމަށެވެ. މެކްރޯން އުއްމީދު ކުރައްވަނީ އަންނަ ސެޕްޓެމްބަރު މަހު އައު ތައުލީމީ އަހަރު ފެށުމުގެ ކުރިން މި ގާނޫނަށް އަމަލުކުރަން ފެށުމަށެވެ.
ބިލު ހުށަހަޅުއްވަމުން މެންބަރު ލޯރާ މިލާ ވިދާޅުވީ، މިއީ މުޖުތަމައުގައި ސާފު އިމެއް ކަނޑައެޅުމުގެ ގޮތުން ކުރާ ކަމެއް ކަމަށެވެ. "އަޅުގަނޑުމެންގެ ކުދިން ފޮތް ކިޔުމާއި ނިދުމާ ދުރުވެ، އެކަކު އަނެކަކާ އަޅާކިޔުން އިތުރުވެއްޖެ. މިއީ ސިކުނޑިތައް ސަލާމަތްކުރުމަށް ކުރާ ހަނގުރާމައެއް،" އޭނާ ވިދާޅުވިއެވެ.
މި ބިލާ ގުޅޭގޮތުން ވާހަކަ ދައްކަވަމުން މެންބަރު ތިއެރީ ޕެރޭޒް ސިފަކުރެއްވީ މިއީ "ޞިއްޙީ ކުއްލި ނުރައްކަލުގެ" ހާލަތަކަށް ދީފައިވާ ރައްދެއްގެ ގޮތުގައެވެ. އޮސްޓްރޭލިއާގެ މި ނިންމުން އިނގިރޭސިވިލާތް، ޑެންމާކް، ސްޕެއިން އަދި ގްރީސް ފަދަ ގައުމުތަކުން ވެސް ދަނީ ދިރާސާކުރަމުންނެވެ. އަދި ޔޫރަޕިއަން ޕާލަމަންޓުން ވެސް ވަނީ ސޯޝަލް މީޑިއާ ބޭނުންކުރުމުގައި ކުޑަ އުމުރެއް ކަނޑައެޅުމަށް ޔޫރަޕްގެ އިއްތިހާދަށް ގޮވާލާފަ އެވެ.
މި ގާނޫނުގެ ދަށުން، ކުޑަކުދިންނަށް ސޯޝަލް މީޑިއާ ބޭނުން ނުކުރެވޭނެ ގޮތަށް އުމުރު ކަށަވަރުކުރާ ނިޒާމުތައް ވަރުގަދަ ކުރަން ޖެހޭނެ އެވެ. މީގެ އިތުރުން، މިހާރުވެސް ޕްރައިމަރީ އަދި މިޑްލް ސްކޫލްތަކުގައި ފޯނު ބޭނުންކުރުން މަނާކޮށްފައި އޮންނަ އޮތުން، ހައިސްކޫލްތަކަށް ވެސް ފުޅާކުރުމަށް މި ގާނޫނުގައި ހިމަނާފައިވެ އެވެ.
2024 ވަނަ އަހަރު ހެދި ދިރާސާއަކުން ދައްކާގޮތުގައި، ފްރާންސްގެ އާންމުންގެ 73 އިންސައްތަ މީހުން މި ނިންމުމަށް ތާއީދުކުރެ އެވެ. ނަމަވެސް ޒުވާނުންގެ މެދުގައި މިކަމާ މެދު ތަފާތު ހިޔާލުތަކެއް ހުރިކަން ފާހަގަކުރެވެ އެވެ. ބައެއް ޒުވާނުން ސޯޝަލް މީޑިއާގެ ނުރައްކާތައް ގަބޫލުކުރާއިރު، އަނެއްބައި ޒުވާނުން ދެކޭގޮތުގައި މިއީ މާ ބޮޑުވަރުގެ ނިންމުމެކެވެ
