ރާއްޖޭގެ ޝަރުއީ ދާއިރާގެ މާލީ މިނިވަންކަން ކަށަވަރުކޮށް، އެ ދާއިރާ ހިންގުމުގައި މިނިވަން ނިޒާމެއް ގާއިމުކުރުމަށްޓަކައި 'ޝަރުއީ ދާއިރާގެ ގުޅުންހުރި މާލީ ކަންކަމުގައި ޢަމަލުކުރާނެ ގޮތުގެ އުސޫލު' މިއަދު ސަރުކާރުން ގެޒެޓްކޮށްފި އެވެ.

މި އުސޫލަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ޝަރުއީ ދާއިރާގެ މިނިވަންކަމުގެ ތަސައްވަރު ތަންފީޒުކުރުމުގެ ގޮތުން، މިނިސްޓްރީ އޮފް ފައިނޭންސް އިން އެކުލަވާލާފައިވާ އުސޫލެކެވެ. މީގެ މައިގަނޑު މަގްސަދަކީ އަދުލު އިންސާފުގެ ދާއިރާއަށް ދައުލަތުގެ ބަޖެޓުން ކަނޑައަޅާ ފައިސާ ރޭވުމާއި، ދޫކުރުމާއި، ބެލެހެއްޓުމުގެ އިތުރުން ރިޕޯޓްކުރުމަށް ހާއްސަ ހަރުދަނާ އޮނިގަނޑެއް އެކަށައެޅުމެވެ.

މި އުސޫލުގައިވާ ގޮތުން، ކޮންމެ އަހަރަކު ވެސް ރައްޔިތުންގެ މަޖިލީހުން ފާސްކުރާ ދައުލަތުގެ ބަޖެޓުގައި ޝަރުއީ ދާއިރާއަށް ބޭނުންވާ ފައިސާ ހިމަނަންޖެހެ އެވެ. އަދި ދައުލަތަށް ލިބޭނެކަމަށް އަންދާޒާކުރާ އާމްދަނީގެ މަދުވެގެން %2 ޝަރުއީ ދާއިރާއަށް ކަނޑައަޅަންވާނެ އެވެ. މި އިންސައްތަ ހިސާބުކުރުމުގައި ވަކި ކަމަކަށް ހާއްސަ ކުރެވިފައިވާ އާމްދަނީއާއި، އަލަށް ތައާރަފުކުރާ އާމްދަނީ އިތުރުކުރުމުގެ ފިޔަވަޅުތަކުން ލިބޭ ފައިސާއެއް ނުހިމެނޭނެއެވެ.

ޝަރުޢީ ދާއިރާއަށް ދެވޭ 'ޖުޑީޝަރީ ސެކްޓޯރަލް ގްރާންޓް' ބަލަހައްޓާނީ މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) ގައި ހުޅުވާފައިވާ ޚާއްޞަ އެކައުންޓެއް މެދުވެރިކޮށެވެ. ހުރިހާ މުޢާމަލާތްތަކެއް ހިންގަންވާނީ ދައުލަތުގެ ޕަބްލިކް އެކައުންޓިންގ ސިސްޓަމް މެދުވެރިކޮށް، މާލިއްޔަތު ގަވާއިދާ އެއްގޮތްވާ ގޮތުގެ މަތިންނެވެ.

ކޮންމެ އަހަރެއްގެ ސެޕްޓެމްބަރު 30 ގެ ކުރިން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީ.ޖޭ.އޭ) އިން ބަޖެޓު ތައްޔާރުކޮށް ފައިނޭންސް މިނިސްޓްރީއަށް ހުށަހަޅަންޖެހެ އެވެ. ބަޖެޓު ހިންގުމުގެ އިސް ޒިންމާ ޗީފް ޖުޑީޝަލް އެޑްމިނިސްޓްރޭޓަރު އުފުއްލަވަން ޖެހިވަޑައިގަންނަވާއިރު، ބަޖެޓުން ބޭރުން ކަމެއް ކުރަންޖެހިއްޖެނަމަ ސަޕްލިމެންޓްރީ ބަޖެޓެއް ފާސްކުރަންޖެހެ އެވެ.

ޝަރުއީ ދާއިރާގެ ތަރައްޤީގެ މަޝްރޫއުތަކަށް (ޕީ.އެސް.އައި.ޕީ) ހަރަދުކުރާނީ ސެކްޓޯރަލް ގްރާންޓްގެ ތެރެއިންނެވެ. އަދި މުވައްޒަފުންގެ މުސާރައާއި އިނާޔަތްތައް ދިނުމުގައި ޕޭ ކޮމިޝަނާއި ވަޒީފާއާބެހޭ ގާނޫނުގެ މިންގަނޑުތަކަށް ތަބާވާންޖެހެ އެވެ. މީގެ އިތުރުން، ބަދަލުގެ ގޮތުގައި ފައިސާ ދޭންޖެހޭ ހާލަތްތަކުގައި އެކަން ކުރެވޭނީ ކޯޓުގެ ނިހާއީ ހުކުމަކަށްފަހު ޝަރުއީ ދާއިރާގެ ބަޖެޓުންނެވެ.

މާލީ ކަންކަން ދެފުށް ފެންނަ ގޮތަށް ކުރިއަށް ގެންދިއުމަށްޓަކައި، ކޮންމެ މަހެއްގެ ހަރަދުތަކުގެ ތަފުސީލު އެ މަސް ނިމުމުގެ ކުރިން އާންމުކުރަންޖެހެ އެވެ. އަދި ޖެހިގެން އަންނަ މަހުގެ 15 ގެ ކުރިން ފިނޭންސް މިނިސްޓްރީއަށް ރިޕޯޓު ހުށަހަޅަންޖެހެ އެވެ.

މި އައު އުސޫލާއެކު، ރާއްޖޭގެ ޖުޑިޝަރީއަށް މާލީ ގޮތުން ފުރިހަމަ މިނިވަންކަން ލިބި، ދައުލަތުގެ މައި ހިސާބުތަކާ އެއްގޮތްވާ ގޮތުގެ މަތިން ޝަރުއީ ދާއިރާގެ މާލީ ނިޒާމު އިތުރަށް ހަރުދަނާވެގެންދާނެ ކަމަށް ސަރުކާރުން ބުނެ އެވެ.