ބޭނުން ވެއްޖެ ނަމަ އީރާނާއި ދެކޮޅަށް ކުއްލި އަދި ބާރުގަދަ ހަމަލާތަކެއް ދިނުމަށް އެމެރިކާ އާއި އިސްރާއީލުން އެއްބަސްވުމަކަށް އައިސްފި ކަމަށް އިސްރާއީލުގެ ޗެނަލް 14 އިން ބުނެފިއެވެ.

އެމެރިކާގެ ހަމގުރާމަމަތީ މަނަވަރު އީރާނު ހިމެނޭ ގަލްފު ސަރަހައްދަށް ވަދެފައިވާ ދަނޑިވަޅުގައި، އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ ކޮމާންޑަރު ބްރެޑް ކޫޕަރ ވަނީ ޓެލްއަވީވްގައި އިސްރާއީލުގެ އަސްކަރިއްޔާގެ އިސް އޮފިޝަލުންނާއެކު ބައްދަލުވުމެއް ބާއްވައި، އީރާނާއި ގުޅޭ ގޮތުން މަޝްވަރާ ކޮށްފައެވެ.

މި ބައްދަލުކުރުމުގައި އެމެރިކާގެ އޮފިޝަލުން ބުނީ އީރާނާއި ގުޅޭ ކަންކަމުގައި (އީރާނަށް ހަމަލާ ދިނުމަށް) ރަނގަޅަށް ތައްޔާރު ވުމަށް ވަގުތު ބޭނުންވާ ކަމަށެވެ. ނަމަވެސް އެމީހުން ބުނީ ކުއްލި ހާލަތުގައި އެމެރިކާ އޮތީ ތައްޔާރަށެވެ.

އެމެރިކާއިން އީރާނަށް ހަމަލާއެއް ދޭނެ ކަމެއް އަދި ކަށަވަރު ކޮށް ނުދޭ އިރު، ޓްރަމްޕް ދެކޭގޮތުގައި ޚާމަނާއިގެ ވެރިކަން ބަދަލު ކުރުމަކީ ކޮންމެހެން ކުރަންޖެހޭ ކަމެކެވެ.

އެމެރިކާ އިން އީރާނަށް ހަމަލާ ދީފި ނަމަ މެދުއިރުމަތީގައިވާ އެމެރިކާގެ ބޭސްތަކަށާއި ހާއްސަކޮށް އިސްރާއީލަށް ވެސް ވަރުގަދަ ހަމަލާތަކެއް ދޭނެ ކަމަށް އީރާނާއި ޙަވާލާދީ ޚަބަރުތައް ބުނެއެވެ.

މިވާހަކަތަކާއި ގުޅިގެން އެމެރިކާގެ ސެންޓްރަލް ކޮމާންޑްގެ ކޮމާންޑަރު ވަނީ އިސްރާއީލު ހިމެނޭ ގޮތަށް މެދުއިރުމަތީގައި ތިބި އެމެރިކާގެ އެކުވެރިން ރައްކާތެރި ކުރާނެ ކަމަށާއި، އެމީހުންނަށް ގެއްލުމެއް ދިނުމަށް ފުރުސަތު ނުދޭނެ ކަމަށް ބުނެފައިވާ ކަމަށް އިސްރާއީލުގެ ޗެނަލުން ބުނެއެވެ.