ލަންޑަންގައި ބާއްވާ "މުސްލިމް ޓްރެވަލް ޝޯ" ގައި ދިވެހިރާއްޖެއިން ބައިވެރިވާނެކަން އިންޓަރނޭޝަނަލް ހަލާލް ޓޫރިޒަމް އޮގަނައިޒޭޝަން (އައިއެޗްޓީއޯ) އިން ރަސްމީކޮށް ހާމަކޮށްފިއެވެ.
"މުސްލިމް ޓްރެވަލް ޝޯ" އަކީ ހަލާލް ޓޫރިޒަމް ޕްރޮމޯޓުކުރުމަށް ދުނިޔޭގައި ބާއްވާ އެންމެ ބޮޑު އެއް ހަރަކާތެވެ. މި ޝޯ ކުރިއަށްދާނީ އަންނަ ފެބްރުއަރީ 8-7 ގައި ލަންޑަންގެ އެކްސެލްގެ. މި ޝޯގައި ރާއްްޖެއިން ބައިވެރިވުމަކީ ހަލާލް ޓޫރިޒަމްގެ މަންޒިލެއްގެ ގޮތުގައި ރާއްޖެ ކުރިއެރުވުމަށް އެޅޭ މުހިންމު ފިޔަވަޅެކެވެ.
އައިއެޗްޓީއޯ އިން އިސްނަގައިގެން ކުރިއަށްގެންދާ މި ހަރަކާތުގައި ވިޒިޓް މޯލްޑިވްސްގެ އިތުރުން، މަޓާޓޯ، މޯލްޑިވްސް ބޯޓިން އެސޯސިއޭޝަން އަދި ރާއްޖޭގެ ގެސްޓް ހައުސް އެސޯސިއޭޝަންގެ ފަރާތުން ބައިވެރިވާން ވަނީ ނިންމާފަ އެވެ.
މުސްލިމް ޓްރެވަލް ޝޯއަކީ ހަލާލް ޓޫރިޒަމްގެ ދާއިރާއިން ދުނިޔޭގައި ބާއްވާ އެންމެ ފާހަގަކޮށްލެވޭ އެއް ހަރަކާތެވެ. މި ހަރަކާތުގެ ތެރެއިން ވިޔަފާރިވެރިންގެ މެދުގައި ބޭއްވޭ ބީޓުބީ ބައްދަލުވުންތަކާއި، އާންމު ފަތުރުވެރިންނަށް އަމާޒުކޮށްގެން ހިންގާ ހަރަކާތްތައް އެކުއެކީގައި ކުރިއަށްދާނެ އެވެ. މިއީ މުޅި ދުނިޔޭގެ މުސްލިމު ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތައް އެއްތަނަކުން ބައްދަލުވާނެ މުހިންމު މާހައުލެކެވެ.
މި ހަރަކާތަކީ ރާއްޖެއަށް ނުހަނު ބޭނުންތެރި ފުރުސަތެކެވެ. މި ފުރުސަތުގެ ބޭނުން ހިފައި، ރާއްޖޭގެ މުސްލިމު ފަތުރުވެރިކަމުގެ އައު ސިޔާސަތުތަކާއި، އިސްލާމީ އުސޫލުތަކަށް ފެތޭގޮތަށް ހުރި ހިދުމަތްތައް ދައްކާލުމަށް ވަނީ ރޭވިފަ އެވެ. އައިއެޗްޓީއޯ އިން ބުނާގޮތުގައި، މި ހަރަކާތުގެ ސަބަބުން ވިޔަފާރިވެރިންނާއި ފަތުރުވެރިންނާ ސީދާ ގުޅުން ބަދަހިވެ، ވިޔަފާރި ފުރުސަތުތަކަށް މަގުފަހިވާނެ އެވެ.
ދުނިޔޭގެ ފެންވަރުގައި ހަލުވިކަމާއެކު ކުރިއަރަމުންދާ ހަލާލް ޓޫރިޒަމް އިންޑަސްޓްރީގެ އަގު މިހާރު އުޅެނީ 200 އާއި 300 ބިލިއަން ޑޮލަރާ ދެމެދުގަ އެވެ. އަދި 2035 ވަނަ އަހަރާ ހަމައަށް މި އަދަދު 500 ބިލިއަން ޑޮލަރަށް އަރާނެ ކަމަށް ލަފާކުރެވެ އެވެ.
