އަންނަ އޭޕްރިލް މަހު ބޭއްވުމަށް ތައްޔާރުވަމުންދާ ލޯކަލް ކައުންސިލް އިންތިހާބުގައި ވާދަކުރުމަށް މިހާތަނަށް 1000 އަށްވުރެ ގިނަ މީހުން ކުރިމަތިލާފައިވާ ކަމަށް އިލެކްޝަންސް ކޮމިޝަނުން ހާމަކޮށްފި އެވެ.
އިލެކްޝަންސް ކޮމިޝަނުން އެންމެ ފަހުން އާންމުކުރި ތަފާސްހިސާބުތަކަށް ބަލާއިރު، ރަށު ކައުންސިލްތަކާއި ސިޓީ ކައުންސިލްތަކުގެ ގޮނޑިތަކަށް ވާދަކުރުމަށް ޖުމްލަ 1,010 މީހަކު ވަނީ ފޯމު ހުށަހަޅާފަ އެވެ. މީގެ ތެރެއިން މިހާތަނަށް ޝަރުތު ފުރިހަމަވެފައިވަނީ 750 ފޯމެވެ. ޝަރުތު ހަމަނުވުމުގެ ސަބަބުން އިތުރު 77 ފަރާތަކުން އަލުން ފޯމު ހުށަހަޅާފައިވާ ކަމަށްވެސް އެ ކޮމިޝަނުން ބުންޏެވެ.
ޝަރުތު ހަމަވި ފޯމުތަކުގެ ތަފްސީލަށް ބަލާއިރު، އެންމެ ގިނައީ ސިޔާސީ ޕާޓީތަކުގެ ފަރާތުން ކުރިމަތިލީ ފަރާތްތަކެވެ. އެގޮތުން 617 ފޯމަކީ ސިޔާސީ ޕާޓީތަކުން ހުށަހެޅި ފޯމުތަކަށްވާއިރު، އަމިއްލަ ގޮތުން އިންތިހާބުގައި ބައިވެރިވުމަށް 133 ފަރާތަކުން ވަނީ ފޯމު ހުށަހަޅާފަ އެވެ.
Advertisement
ކައުންސިލް އިންތިހާބުގެ އިތުރުން، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބަށްވެސް ބޮޑު ތަރުހީބެއް ލިބެމުންދާކަން ފާހަގަކުރެވެ އެވެ. އެ ކޮމިޓީތަކުގެ މެންބަރުކަމަށް 734 މީހަކު ކުރިމަތިލާފައިވާއިރު، އޭގެ ތެރެއިން 574 ފަރާތެއްގެ ޝަރުތު ވަނީ ހަމަވެފަ އެވެ. މީގެ ތެރޭގައި ހިމެނެނީ ސިޔާސީ ޕާޓީތަކުން ކުރިމަތިލީ 488 ފަރާތަކާއި އަމިއްލަ ގޮތުން ކުރިމަތިލީ 86 ފަރާތެކެވެ.
މިފަހަރުގެ އިންތިހާބަކީ ރާއްޖޭގެ ލާމަރުކަޒީ ނިޒާމުގެ ދަށުން ރަށްތަކާއި ސިޓީތަކަށް ޖުމްލަ 629 ކައުންސިލަރުން އިންތިހާބު ކުރުމަށް ބާއްވާ މުހިންމު އިންތިހާބެކެވެ.
ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބަށް ކުރިމަތިލުމުގެ ފުރުސަތު މި މަހުގެ 17 ވަނަ ދުވަހު ހުޅުވާލާފައިވާއިރު، މި ފުރުސަތު ހަމަވާނީ ކުރިއަށް އޮތް އާދީއްތަ ދުވަހުގެ މެންދުރުފަހު 3:00 އަށެވެ. އެހެންކަމުން ކުރިމަތިލާން ބޭނުންވާ ފަރާތްތަކުން އެ ވަގުތުގެ ކުރިން ފޯމު ހުށަހެޅުމަށް އިލެކްޝަންސް ކޮމިޝަނުން ވަނީ އިލްތިމާސްކޮށްފަ އެވެ.
