ރަމަޟާން މަހާ ގުޅިގެން ސަރުކާރުން ރައްޔިތުންނަށް ރޯދަ ހަދިޔާގެ ގޮތުގައި ދޭ މަސްދަޅު ކޭސް ދޫކުރުމުގައި، އައިޑީ ކާޑުގެ އިތުރުން ޑްރައިވިން ލައިސަންސް، އީ-ފާސް އަދި ޕާސްޕޯޓް ވެސް ބަލައިގަންނާނެ ކަމަށް ސިޓީސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.

އެކްސްގައި މިނިސްޓަރު ކުރެއްވި ޕޯސްޓެއްގައި ވިދާޅުވީ، މާލޭގައި ރޯދަ ހަދިޔާ ބެހުމުގެ މަސައްކަތް ރޭ ކުރިއަށް ދިޔައީ ވަރަށް އޮމާންކަމާއި އަމާންކަމާއެކުގައި ކަމަށެވެ. އަދި މި ހިދުމަތުގައި އުޅުއްވާ ހުރިހާ މުވައްޒަފުންނަށާއި އާންމު ރައްޔިތުންގެ ފަރާތުން ލިބޭ އެއްބާރުލުމަށް މިނިސްޓަރު ވަނީ ޝުކުރު އަދާކުރައްވާފަ އެވެ.

މި އަހަރުގެ ރޯދަ ހަދިޔާ ބެހުމަށް ހަމަޖެހިފައިވަނީ ޖުމްލަ 118,773 ގޭބީސީއަކަށެވެ. މީގެ ތެރޭގައި މާލޭގެ 61,755 ގޭބީސީއަކާއި އަތޮޅުތެރޭގެ 56,918 ގޭބީސީ ހިމެނެ އެވެ. މާލެ ސަރަހައްދުގައި މަސްދަޅު ކޭސް ބަހަން ފަށާފައިވަނީ މި މަހުގެ 24 ވަނަ ދުވަހުގެ ރޭގަ އެވެ. ފުރަތަމަ ރޭ އެކަނިވެސް މާލެ، ވިލިނގިލި އަދި ހުޅުމާލޭގައި ގާއިމްކޮށްފައިވާ މަރުކަޒުތަކުން 4,196 މަސްދަޅު ކޭސް ވަނީ ދޫކޮށްފަ އެވެ.

މާލެ ސަރަހައްދުގައި މަސްދަޅު ކޭސް ދޫކުރާ މަރުކަޒުތަކަކީ:

1. މާލޭގައި: މިފްކޯ މަރުކަޒު، ސޯޝަލް ސެންޓަރު، އެމްޓީސީސީ ސޯމިލް، ހެންވޭރު ބޯޅަދަނޑު އަދި ގަލޮޅު ދަނޑު.
2. ހުޅުމާލެ ފޭސް 1 ގައި: އުމަރު ޒާހިރު ބިލްޑިންގ، ޕޮލްކޯ ޓަވަރު އަދި މުހައްމަދު ގާސިމް ޕްރީ ސްކޫލް.
3. ހުޅުމާލެ ފޭސް 2 ގައި: ކާމިލް ދީދީ ސްކޫލް، ހިޔާ ޓަވަރު 10 އަދި އެމްޕީއެލް ޓަވަރު ޕީ.
4. ވިލިމާލޭގައި: ވެމްކޯ ސައިޓް.

ރަށްރަށުގެ ގޭބިސީތަކަށް މަސްދަޅު ކޭސް ބެހުމުގެ މަސައްކަތް ކުރިއަށް ގެންދާނީ އެ ރަށެއްގެ ރަށު ކައުންސިލްތަކުންނެވެ. މަސްދަޅު ކޭސް ނެގުމަށް ޕޯޓަލް މެދުވެރިކޮށް ޝެޑިއުލް ކުރުމުގެ ފުރުސަތު މިހާރު ވަނީ ހުޅުވާލެވިފަ އެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން މިދިޔަ އަހަރުވެސް ވަނީ ރޯދަ މަހާ ދިމާކޮށް ކޮންމެ ގޭބިސީއަކަށް މަސްދަޅު ކޭހެއް ހަދިޔާކޮށްފަ އެވެ. މީގެ އިތުރުން ރައްޔިތުންނަށް ލުއިތަކެއް ހޯދައިދިނުމުގެ ގޮތުން ކަރަންޓާއި ފެން ބިލުން ވެސް ވަނީ ޑިސްކައުންޓް ދީފަ އެވެ.