ސްޓެލްކޯއިން މިއަހަރުގެ ރޯދަ މަހަށާއި ޕީކް ސީޒަނަށް ކަރަންޓުގެ ހިދުމަތް އިތުރަށް ހަރުދަނާ ކުރުމުގެ މަސައްކަތް ފަށައިފި އެވެ.
ސްޓެލްކޯ އިން ބުނީ ރޯދަ މަހާއި އިރުވައި މޫސުން ފެށޭ ދުވަސްވަރަކީ އާއްމު ގޮތެއްގައި ކަރަންޓު ބޭނުންކުރާ މިންވަރު އިތުރުވާ ދުވަސްވަރެއް ކަމަށެވެ. އެހެންކަމުން ރޯދަ މަހާއި ޕީކް ސީޒަންގައި ރައްޔިތުންނަށް ފެންވަރު ރަނގަޅު ކަރަންޓުގެ ހިދުމަތެއް، 24 ގަޑިއިރު މެދު ކެނޑުމެއް ނެތި ދިނުމުގެ މަސައްކަަތް އެކުންފުނިން ދަނީ ކުރަމުންނެވެ.
ސްޓެލްކޯ އިން ބުނީ މާލެ އާއި ރާއްޖެ ތެރޭގެ ކަރަންޓު ކެޕޭސިޓީ ރަނގަޅު ކުރުމުގެ ގޮތުން ގިނަ މަސައްކަތްތަކެއް ކުރަމުންދާ ކަމަށެވެ. މި މަސައްކަތްތަކުގެ ތެރެއިން މި މަހު 14 ވަނަ ދުވަހުން ފެށިގެން އަލަށް ގެނައި ޖަނަރޭޓަރު ސެޓްތައް ރަށްތަކަށް ފޮނުވުމުގެ މަސައްކަތްވެސް ފަށާފައިވާ ކަމަށް އެކުންފުނިން ބުންޏެވެ.
އެގޮތުން ވިލިމާލޭގައި އިތުރު 1،200 ކިލޯވޮޓްގެ ޖެންސެޓެއް ބަހައްޓައި ބޭނުންކުރަން ވަނީ ފަށާފަ އެވެ. އަދި ވ. ތިނަދޫ އިންޖީނުގެއަށް 600 ކިލޯވޮޓްގެ ޖަނަރޭޓަރު ސެޓެއް ފޮނުވައި މިހާރު ވަނީ ޖަނަރޭޓަރުން ހިދުމަތް ދޭން ފަށާފަ އެވެ. އެ ޖަނަރޭޓަރާއެކު ތިނަދޫ ކަރަންޓު އުފެއްދުމުގެ ކެޕޭސިޓީ 1،539 ކިލޯވޮޓަށް އިތުރުވެފައިވާ ކަމަށް ސްޓެލްކޯ އިން ބުންޏެވެ.
އަދި ހަމަ އެހެންމެ އއ. މަތިވެރިއަށް ވެސް 600 ކިލޯވޮޓްގެ އާ ޖަނަރޭޓަރު ސެޓެއް ވަނީ ފޮނުވާފަ އެވެ. އަދި މަތިވެރީގައި ވެސް މިހާރު ޖަނަރޭޓަރުގެ ބޭނުން ދަނީ ކުރަމުންނެވެ. އާ ޖަނަރޭޓަރު ސެޓާއެކު މަތިވެރީގެ ކަރަންޓު އުފެއްދުމުގެ ކެޕޭސިޓީ 1،650 ކިލޯވޮޓަށް އިތުރުވެފައިވާ ކަމަށް ސްޓެލްކޯ އިން ބުންޏެވެ.
މީގެ އިތުރުން އއ. އުކުޅަހަށާއި އއ. ތޮއްޑޫ އަދި ކ. ގުރައިދު އަށްވެސް ވެސް 1،000 ކިލޯވޮޓްގެ އާ ޖަނަރޭޓަރު ސެޓުތައް ފޮނުވައި ހިދުމަތްދޭން މިހާރު ވަނީ ފަށާފަ އެވެ. އާ ޖަނަރޭޓަރު ސެޓުތަކާއެކު އުކުޅަހުގެ ކަރަންޓު އުފެއްދުމުގެ ކެޕޭސިޓީ 2،564 ކިލޯވޮޓަށް އިތުރުވެފައި ވާއިރު ތޮއްޑޫގެ ކަރަންޓު އުފެއްދުމުގެ ކެޕޭސިޓީ ވަނީ 3،592 ކިލޯވޮޓަށް އަދި ގުރައިދޫގެ ކަރަންޓް އުފެއްދުމުގެ ކެޕޭސިޓީ ވަނީ 2،960 ކިލޯވޮޓަށް ވަނީ އިތުރުކޮށްފަ އެވެ.
މާލެ ސަރަހައްދާއި ވަކި ވަކި ރަށްތަކުގެ ކަރަންޓު ކެޕޭސިޓީ އިތުރު ކުރުމުގެ ސަބަބުން ރޯދަ މަހަށާއި އަދި ކުރިއަށް އޮތް ހޫނުގަދަ ދުވަސްތަކުގައި ރައްޔިތުންނަށް ރަނގަޅު ފެންވަރުގެ ކަރަންޓު ހިދުމަތް ލިބޭނެ ކަމަށް ސްޓެލްކޯއިން ބުނެއެވެ.
