މި އަހަރުގެ ރޯދަ ހަދިޔާގެ ގޮތުގައި ގޭބީސީތަކަށް ސަރުކާރުން ދޭން ނިންމާފައިވާ މަސްދަޅު ކޭސް ބެހުމަށް ހަމަޖެހިފައިވާ މަރުކަޒުތަކުގައި ވާންޖެހޭ އެންމެ ފަހުގެ ތައްޔާރީތައް ވަމުން އަންނަ ކަމަށް ސިޓީސް މިިނިސްޓްރީން ބުނެފި އެވެ.

މިނިސްޓްރީން ހާމަކޮށްފައިވާ ގޮތުގައި ރޯދަ ހަދިޔާއަށް ދޭ މަސްދަޅުކޭސް ބަހަށް ފަށާނީ މިރޭ 8:30 އިން ފެށިގެންނެވެ. މާލެ ސަރަހައްދުން މަސްދަޅު ކޭސް ބެހުމަށް 15 މަރުކަޒެއް ކަނޑައަޅާފައިވާއިރު އެހެން އަހަރުތަކާ ހިލާފަށް މި އަހަރު ކިއުގައި ޖެހޭކަށް ނުޖެހޭނެ އެވެ.

މަސްދަޅު ކޭސް ނަންގަވަން ބޭނުންވާ ފަރާތްތަކަށް roadhahadhiya.mv ޕޯޓަލް މެދުވެރިކޮށް ޓޯކެން ނަމްބަރު ނެގޭނެ އިންތިޒާމު މިނިސްޓްރީން ވަނީ ހަމަޖައްސައިފަ އެވެ. ޓޯކަން ދޫކުރާނީ ހަމައެކަނި ޕޯޓަލް މެދުވެރިކޮށެވެ. އަދި ޕޯޓަލްގައި ރަޖިސްޓްރީ ކުރެވޭނީ 18 އަހަރުވެފައިވާ ފަރާތްތަކަށް ކަމަށާއި ޕޯޓަލްގައި ފުރިހަމަކުރަންޖެހޭ މައުލޫމާތުތައް ފުރިހަމަ ކުރުމުން ކަމަށް މިނިސްޓްރީން ވަނީ ބުނެފަ އެވެ.

https://x.com/MoCLPmv/status/2014946478670938319?s=20

މާލެ ސަރަހައްދުގައި މި އަހަރުގެ ރޯދަ ހަދިޔާ ބަހާނީ މިރެއިން ފެށިގެން 13 ފެބުރުވަރީ 2026 ގެ ނިޔަލަށް ހުކުރުދުވަސް ފިޔަވައި ކޮންމެ ރެއަކު 8:30 އިން 11:00 އަށެވެ. މާލެ ސަރަހައްދުގައި ރޯދަ ހަދިޔާ ބެހުމަށްޓަކައި 15 މަރުކަޒެއް ވަނީ ކަނޑައަޅައިފަ އެވެ. އެއީ؛

މާލެ

1. މިފްކޯ މަރުކަޒު
2. ސޯޝަލް ސެންޓަރު
3. ގަލޮޅު ބޯޅަދަނޑު
4. ހެންވޭރު ބޯޅަދަނޑު
5. އެމްޓީސީސީ ސޯމިލު

ހުޅުމާލެ ފޭސް 1

1. އުމަރު ޒާހިރު ބިލްޑިން
2. ޕޮލްކޯ ޓަވަރު
3. މުހައްމަދު ގާސިމް ޕްރީސްކޫލް

ހުޅުމާލެ ފޭސް 2

1. ހިޔާ ޓަވަރު 10
2. ކާމިލުދީދީ ސްކޫލް
3. އެމްޕީއެލް ޓަވަރު P

ވިލިމާލެ

1. ވެމްކޯ ސައިޓް

ރަށްރަށުގައި މިކަން ކުރިއަށްދާނީ އެސްޓީއޯ އާއި ކައުންސިލްތައް ގުޅިގެން، ރަށުގެ ގޭބިސީތަކުގެ ލިސްޓަށް ބަލައިގެންނެވެ. މާލެ ސަރަހައްދުގައި މަސްދަޅު ކޭސް ދޫކުރުމަށް ހަމަޖެހިފައިވަނީ ކޮންމެ ފެން މީޓަރަކަށް ކޭހެއްގެ އުސޫލުންނެވެ.

މިއަހަރުގެ ރޯދަމަހު މަހު ޖުމްލަ 118,673 ގޭބިސީއަކަށް މަސްދަޅު ކޭސް ދިނުމަށް ވަނީ ހަމަޖެހިފަ އެވެ. މީގެ ތެރޭގައި އަތޮޅުތަކުގެ 56,918 ގޭބިސީއާއި މާލެ ސަރަހައްދުގެ 61,755 ގޭބިސީ ހިމެނެ އެވެ.