އިއްޔެ ހިނގި އަލިފާނުގެ ހާދިސާގައި ލިބުނު ގެއްލުން ދެނެގަނެ، ކުރަންޖެހޭ މަރާމަތުގެ މަސައްކަތް މިހާރު ކުރަމުންދާ ކަމަށް އެފްޑީސީއިން ބުނެފި އެވެ.

އަލިފާން ހިނގީ އަމާން ދޯދި ޓަވަރު އެކެއްގެ ގުރައުންޑު ފުލޯގައި ބަހައްޓާފާ ހުރި ކުނިތަކެއްގައި ރޯވެގެން ކަމަށް އެފްޑީސީއިން މައުލޫމާތު ދީފައިވެ އެވެ. މި ހާދިސާ ހިނގިތާ ކުޑަ ވަގުތުކޮޅެއް ތެރޭގައި ރިޕޯޓު ކުރުމުން ފަޔާ އެންޑް ރެސްކިއު ސާވިސްއިން ވަނީ ވަގުތުން ހަރަކާތްތެރިވެ އަލިފާން ނިއްވާލާފަ އެވެ. މިހާދިސާގައި އެއްވެސް މީހަކަށް އަނިޔާ ލިބިފައި ނުވާ ކަމަށް އެފްޑީސީއިން ބުނެ އެވެ.

ހަދިސާ ހިނގުމާއި ގުޅިގެން އެ ޓަވަރުތަކުގައި ދިރި އުޅޭ ފަަރާތްތަކަށް އަންގަންޖެހޭ މައުލޫމާތު އެ ކޯޕަރޭޝަނުން އޮފިޝަލް ވައިބާ ގުރޫޕުތައް މެދުވެރިކޮށް އަންގާފައިވާނެ ކަމަށް އެފްޑީސީއިން ބުނެފައިވެ އެވެ. އޭގެ އިތުރުން އެހާދިސާ މެދުވެރިވާން ދިމާވި ސަބަބާއި، ހާދިސާގެ ސަބަބުން އިމާރަތަށް ލިބުން ގެއްލުންތައް ދެނެގަނެ މަރާމަތު ކުރުމުގެ މައަސަކަތް އެކޯޕަރޭޝަނުން ކުރަަމުންދާ ކަމަށް އެފްޑީސީއިން ނެރުން ބަޔާނުގައި ބުނެފައިވެ އެވެ.

މީގެއިތުރުން އެކޯޕަރޭޝަނުން ނެރުން ބަޔާނުގައިވަނީ ސޯޝަލް މީޑިއާގައި އެ އިމާރާތުގެ ވެންޓިލޭޝާން ގޮޅިތަކާއި ކުނި އުކާލާ ނިޒާމާ ބެހޭ ގޮތުން ދެކެވިފައިވާ ވާހަކަތަކަށް ރައްދުދީ އެވާހަކަށް ދޮގުކޮށްފަ އެވެ. އަދި އެފަދަ ހާދިސާތަކާއި ގުޅިގެން މައުލޫމާތު ފޯރުކޮށްދޭ އިރު ޒިންމާދާރު ކަމާއެކު މައުލޫމާތު ހިއްސާ ކުރުމަށް ވެސް އިލްތިމާސް ކޮށްފައި އެވެ. މައުލޫމާތު ކަށަވަރު ކުރަން ބޭނުންވާނަމަ އެކޯޕަރޭޝަންގެ އޮފިޝަލް ވައިބާ ގުރުޕް ނުވަތަ ސޯޝަލް މީޑިއާ ޕްލެޓްފޯމްތަކުން ހިއްސާ ކުރާ މައުލޫމާތަށް ރިއާއަތް ކުރުމަށް އެދިފައި އެވެ.

މުސްތަގުބަލުގައި އެފަދަ ހާދިސާތައް ތަކުރާރު ވިޔަ ނުދިނުމަށް ޓަކައި އަޅަންޖެހޭ ހުރިހާ ފިޔަވަޅެއް އަޅާނެ ކަމަށް އެކޯޕަރޭޝަނުން ބުނެފައި އެވެ. އަދި އެ ޓަވަރުތަކުގައި ދިރިއުޅޭ ފަރާތްތަކުގެ ސަލާމަތާއި ރައްކާތެރިކަން ކަށަވަރު ކުރާނެ ކަމަށް ވެސް ބުނެފައި އެވެ. އޭގެ އިތުރުން ކުނި އުކާލަން ހާއްސަ ކުރެވިފައިވާ ތަންތަނަށް އެކަނި ކުނި ނެރުމަށް ސަމާލުކަން ދިނުމަށް އެފްޑީސީންއިންވަނީ އިއުތިމާސް ކޮށްފައެވެ.