ރަށްރަށް ގުޅުވައި ސަރަހައްދީ ތަރައްގީއަށް ސަރުކާރުން ކުރަމުންދާ މަސައްކަތުގެ ތެރެއިން މޯލްޑިވިއަނުން ވެލިދޫއަށް ސީޕްލޭންގެ ހިދުމަތް ފަށައިފި އެވެ.
ޕްރޮމޯޝަންގެ ދަށުން ދިވެހިންނަށް މާލެއިން ވެލިދޫއަށް ކުރާ ސީޕްލޭންގެ ދަތުރުގެ އަގެއް ކަމަށް މީގެ ކުރިން މޯލްޑިވިއަނުން ހާމަކޮށްފައިވަނީ 999 ރުފިޔާ އެވެ. މި ދަތުރުތައް ކުރަން ހަމަޖެހިފައިވަނީ ހަފްތާއަކު ދެ ދުވަހުއެވެ. އެއީ، ބުދަ އަދި ހުކުރު ދުވަހު އެވެ.
ސީޕްލޭން މެދުވެރިކޮށް މޯލްޑިވިއަނުން ކުރާ މި ދަތުރުތަކުގެ ސަބަބުން އެ އަތޮޅުގެ އެހެން ރަށްތަކަށް ވެސް ދަތުރުކުރަން ފަސޭހަވެގެންދާނެ ކަމަށް އެ ކުންފުނިން ބުނެ އެވެ. އަދި އެ އަތޮޅަށް ޒިޔާރަތްކުރާ ފަތުރުވެރިންނަށް އެ ރަށްރަށުގެ ތަފާތު ތަޖުރިބާތަކެއް ކޮށްލުމުގެ ފުރުސަތު ލިބިގެންދާނެ ކަމަށާއި، އެ ސަރަހައްދުގެ ގުދުރަތީ ރީތިކަން ބަލާލުމުގެ ފުރުސަތު ލިބިގެންދާނެ ކަމަށް މޯލްޑިވިއަނުން ހާމަކުރެ އެވެ.
Advertisement
މިއީ ސީޕްލޭން މެދުވެރިކޮށް މީހުން ދިރިއުޅޭ ރަށްރަށަށް މޯލްޑިވިއަނުން ކުރާ ތިން ވަނަ ރަށެވެ. ބ. އަތޮޅު ކަމަދޫ އާއި އެ އަތޮޅުގެ ފުޅަދޫއަށް މިހާރުވެސް ސީޕްލޭންގެ ދަތުރުތައް ކުރެ އެވެ.
ވެލިދޫ އަށް ސީޕްލޭންގެ ހިދުމަތް ފެށުމާއެކު އެ ދާއިރާގެ މަޖިލިސް މެންބަރު މުހައްމަދު އައްބާސް ވިދާޅުވީ އެ ހިދުމަތް ވެލިދޫ އަށް ފެށިގެން ދިއުމަކީ ވަރަށް އުފާ ކުރާ ކަމެއްކަމުގައި ކަމަށާއި، ވެލިދޫ އަދި ދާއިރާގެ ތަރައްގީ އަށް ސަރުކާރުން ނުވަތަ ސަރުކާރު ހިއްސާވާ ކުންފުނިން ވިޔަސް ކުރެވޭ ކޮންމެ ކަމަކީ އެމަނިކުފާނުގެ ވަރަށް ބޮޑު ހިއްސާއެއް އޮވެގެން ކުރެވިގެންދާ ކަމެއްކަމަށް ދާއިރާގެ ރައްޔިތުން ހެޔޮ ހިތުން ގަބޫލު ކުރެއްވުން އެދޭ ކަމަށެވެ.
އައްބާސް މިފަދައިން ވިދާޅުވި ނަމަވެސް ސަރުކާރުން ވެލިދޫ ދާއިރާ އަށް ކޮށްދެއްވަން ހުރި ތަރައްގީގެ މަޝްރޫއުތަކަށް އެމަނިކުފާނުގެ ފަރާތުން އެއްބާރުލުންދޭ މަންޒަރެއް ނުފެނެ އެވެ. އެކަމަށްޓަކައި އެ ދާއިރާގެ ބައެއް ރައްޔިތުންގެ ނުރުހުން ވެސް ވަނީ އޭނާ އަށް އަމާޒުވެފަ އެވެ.
ސީޕްލޭންގެ ޓިކެޓު ނެންގެވުމަށާއި މައުލޫމާތު ސާފު ކުރެއްވުމަށް scc@iasl.aero އަށް މެއިލް ކުރެއްވުމަށް ނުވަތަ ހޮޓްލައިން ނަންބަރު 1671 އަށް ގުޅުއްވުމަށް މޯލްޑިވިއަނުން އެދެ އެވެ.
