އިސްރާއީލުން ވީރާނާ ކޮށްލާފައިވާ ޣައްޒާގެ ކަންކަމާއި ގުޅޭ ގޮތުން އެމެރިކާ އާއި އިސްރާއީލާއި ދެމެދު ޚިޔާލު ތަފާތުވުންތައް ބޮޑުވަމުން އަންނަ ދަނޑިވަޅެއްގައި، ތުރުކީ ނުވަތަ ގަތަރުގެ ސިފައިން ޣައްޒާގައި ތިބުމަށް ދެކޮޅު ހަދާ ކަމަށް ޒައެނިސްޓު ބޮޑުވަޒީރު ނަތަންޔާހޫ އަނެއްކާވެސް ބުނެފިއެވެ.

އިސްރާއީލުގެ ޕާލަމެންޓްގެ ޖަލްސާއެއްގައި ވާހަކަ ދައްކަމުން ހައްދުފަހަނަ އެޅި ނަތަންޔާހޫ ބުންޏެވެ. "ޣައްޒާގައި ތުރުކީ ނުވަތަ ގަތަރުގެ ސިފައިންނެއް ނުތިބޭނެ" ކަމަށާއި، ޣައްޒާގެ ވެރިކަން ހިންގުމުގެ އޮނިގަނޑެއްގައި ވެސް އެ ދެގައުމުގެ އެއްވެސް ދައުރެއް އޮތުމަށް އިސްރާއީލުން ދެކޮޅު ހަދާ ކަމަށެވެ.

އޭނާ މިހެން ބުނީ އެމެރިކާގެ ރައީސް ޑޮނަލްޑް ޓްރަމްޕް އިސްކޮށް ހުރެގެން "ޕީސް ކައުންސިލް" ގެ ދަށުން ހިންގާ ޣައްޒާއަށް "އެގްޒެކެޓިވް ކައުންސިލެއް" އުފެއްދުމަށް ވައިޓް ހައުސްއިން މިދިޔަ ހަފްތާގައި އިއުލާން ކުރުމުންނެވެ.

ވޮޝިންޓަނުން ބޭނުން ވަނީ އެގްޒެކެޓިވް ކައުންސިލްގައި ތުރުކީގެ ފޮރިން މިނިސްޓަރު ހަކާން ފިދާން އާއި ގަތަރުގެ މަންދޫބު އަލީ އަލް ތަވާދީގެ އިތުރުން ސަރަހައްދީ އަދި ބައިނަލްއަގްވާމީ އެހެން ބޭފުޅުން ވެސް ހިމެނުމަށެވެ.

ނަތަންޔާހޫ ބުނީ ޣައްޒާއަށް ޓްރަމްޕް ރާވާފައިވާ ޕްލޭން ތަންފީޒު ކުރަން އުޅޭ އިރު އެ ކައުންސިލަށް މެންބަރުން ހޮވީ އިސްރާއީލާއި މަޝްވަރާ ނުކޮށް ކަމަށާއި، އިސްރާއީލާއި އަދި އެއީ އިސްރާއީލުގެ ސިޔާސަތާއި ހިލާފު ކަމެއް ކަމަށެވެ.