އިންޑިއާގެ އުއްތަރު ޕްރަދޭޝް ސްޓޭޓްގެ ބަރޭލީގެ ރަށެއްގައި ގޭގައި ޖަމާއަތް ހަދައިގެން ނަމާދު ކުރަމުން ދިޔަ 12 މުސްލިމުން ހައްޔަރުކޮށްފި އެވެ.
ކަޝްމީރު މީޑިއާ ސާވިސް އިން ބުނި ގޮތުގައި އެ މުސްލިމުން ގެއެއްގައި ޖަމާތުގައި ނަމާދު ކުރާ ވީޑިއޯއެއް ވައިރަލް ވުމުން އެމީހުންނާ ދެކޮޅަށް މައްސަލައެއް ވަނީ ސަރަހައްދީ ފުލުސް އޮފީހުގައި ރަޖިސްޓްރީ ކޮށްފަ އެވެ.
މީޑިއާ ރިޕޯޓްތައް ބުނާ ގޮތުން ފުލުހުން މައްސަލަ ރަޖިސްޓްރީ ކޮށްފައި ވަނީ ހުސް ގެއެއް ވަގުތީ މިސްކިތެއްގެ ގޮތުގައި އެތައް ހަފްތާއެއް ވަންދެން ބޭނުން ކުރަމުންދާ ކަމަށް ބުނެ ހިންދޫންގެ ބަޔަކު ރިޕޯޓް ކުރުމުންނެވެ.
Advertisement
މި މަހު 19 ވަނަ ދުވަހު ހައްޔަރުކުރި 12 މީހުން ވެސް މެޖިސްޓްރޭޓެއްގެ ކުރިމައްޗަށް ހާޒިރުކުރި ކަމަށްވިޔަސް، އެ މީހުން ވަނީ ކަފާލާތުގެ ދަށުން ދޫކޮށްލާފައެވެ.
ފުލުހުން ބުނި ގޮތުގައި ފުރަތަމަ ތަހުގީގުން އެނގުނު ގޮތުގައި އެ ހުސް ގެއަކީ ޙަނީފް ނަމަކަށް ކިޔާ މީހެއްގެ ގެއެއް ކަމަށާއި އެ ގެއަކީ ހުކުރު ނަމާދަށް ވަގުތީ ގޮތުން ބޭނުން ކުރަމުން އަންނަ ގެއެއްކަން ވަނީ އެނގިފައެވެ.
ކޮންގްރެސް އިސްބޭފުޅެއް ކަމަށްވާ ޑރ. ޝައްމާ މުޙައްމަދު، 12 މުސްލިމުންނާ މެދު ފުލުހުން ތަފާތުކުރުންތަކެއް ގެންގުޅުނު މައްސަލައާމެދު ސުވާލު އުފައްދަވަމުން، ސޯޝަލް މީޑިއާގައި ވަރަށް ބޮޑަށް ފާޑުވިދާޅުވެފައި ވެއެވެ.
އޭނާގެ އެއް ސުވާލަކީ އެ މުސްލިމުން ހައްޔަރުކުރީ ކޮން އަސާސެއްގެ މައްޗަށް ބިނާކޮށް ހެއްޔެވެ؟ އެ މީހުން މުގުރާލީ ކޮން ގާނޫނެއް ހެއްޔެވެ؟
އޭނާ ވިދާޅުވީ ޔޫޕީގެ ފުލުހުންނަކީ އަމިއްލަ ރައްޔިތުން ގޭގައި ނަމާދު ކުރާތީ ބިރުދެއްކުމުގައި އަވަދިނެތި އުޅޭ ބައެއް ކަމަށެވެ.
އިންޑިއާގެ ވަރަށް ގިނަ ސަރަހައްދުތަކުގައި ހިންދޫންނާއި ފުލުހުން ގުޅިގެން ހިންގާ ޖަރީމާތަކާ ހެދި މުސްލިމުންނަށް މިނިވަންކަމާއެކު އަޅުކަން ކުރުމަށް ވަނީ ދަތިވެފައެވެ.
