ފުޅާ ގޮތެއްގައި މަސްތުވާތަކެތީގެ ވިޔަފާރި ކުރާ ކަމަށް ފުލުހުން ތުހުމަތު ކުރާ އަލީ އަންވަރު ބަންދުން ދޫކުރަން ކްރިމިނަލް ކޯޓުގެ ކުރީގެ ގާޒީ ހުސައިން ފާއިޒް ރަޝާދު ނެރުއްވި އަމުރު ހައި ކޯޓުން މިއަދު ބާތިލުކޮށްފި އެވެ.
މަސްތުވާތަކެތީގެ މައްސަލައެއްގައި މިދިޔަ އޮކްޓޫބަރު މަހު އަންވަރު ހައްޔަރުކޮށް ފުރަތަމަ ބަންދުކުރީ ފަސް ދުވަހަށެވެ. ބަންދުގެ މުއްދަތު އިތުރުކުރުމަށް 18 އޮކްޓޯބަރު 2025 ގައި އޭނާ ކޯޓަށް ހާޒިރުކުރުމުން އެއްވެސް ޝަރުތަކާ ނުލައި ކްރިމިނަލް ކޯޓުން އޭނާ ދޫކޮށްލީ އެވެ.
މި ނިންމުން ނިންމަވަމުން ގާޒީ ފާއިޒު ފާހަގަކުރެއްވި ގޮތުގައި، އަންވަރު ހައްޔަރުކޮށް ބަންދާމެދު ގޮތެއް ނިންމުމުގައި ފުލުހުން ބިނާކުރި އަސާސްތައް ސާފުކޮށްދެވިފައެއް ނުވެ އެވެ. މީގެ އިތުރުން، އޭނާ ހައްޔަރުކުރުމަށްފަހު އަމަލުކުރި އިޖުރާއަތްތަކުގައި ގޯސްތަކެއް ހުރިކަމަށް ފެންނާތީ، އޭނާ ބަންދުގައި އިތުރަށް ބެހެއްޓޭނެ ތަނެއް ނެތް ކަމަށް ގާޒީ ވިދާޅުވި އެވެ.
އަންވަރު ބަންދުން ދޫކޮށްލަން ކްރިމިނަލް ކޯޓުން ނެރުނު އަމުރު ޕްރޮސިކިއުޓާ ޖެނެރަލްގެ އޮފީހުން ހައިކޯޓުގައި އިސްތިއުނާފު ކުރުމާ ގުޅިގެން، އެ ކޯޓުން މިއަދު ވަނީ ކްރިމިނަލް ކޯޓުގެ އެ ނިންމުމަކީ ބާތިލު ނިންމުމެއް ކަމަށް ހުކުމް ކޮށްފަ އެވެ.
ހައިކޯޓުގެ ހުކުމުގައި ފާހަގަކޮށްފައިވާ ގޮތުގައި، ޖިނާއީ އަދުލުގެ ނިޒާމުގައި ހައްޔަރު އަމުރެއް ތަންފީޒުކުރުމުގެ ކުރިން ބަލައި ފާސްކުރުމުގެ އަމުރެއް ފުރިހަމަކުރުން ލާޒިމުކުރާ އެއްވެސް އުސޫލެއް ނެތެވެ. އަދި ވަކި ހާއްސަ ޝަރުތުތަކެއް އަމުރުގައި ކަނޑައަޅާފައި ނުވާހާ ހިނދަކު، ކޯޓު އަމުރުތައް ތަންފީޒުކުރުމުގައި ވަކި ތަރުތީބެއް ގެންގުޅެން ނުޖެހޭނެ ކަމަށާއި، އެފަދަ ތަރުތީބެއް އޮންނާނީ ގާނޫނުގައި ނުވަތަ އަމުރުގައި ސާފުކޮށް ބަޔާންކޮށްފައިވާ ނަމަ ކަމަށްވެސް ހައިކޯޓުން ބުނެފައިވެ އެވެ.
މި މައްސަލައިގައި ހިމެނޭ އަމުރަކީ އެފަދަ ޝަރުތެއް އޮތް އަމުރަކަށް ނުވާއިރު، ބަލައި ފާސްކުރުމުގެ ކުރިން ހައްޔަރުކޮށްފައިވާތީ އަންވަރުގެ ހައްޔަރު ގޯސްކަމަށް ދަށު ކޯޓުން ނިންމި ނިންމުމަކީ ގާނޫނީ ގޮތުން ރަނގަޅު ނިންމުމެއް ނޫން ކަމަށް ހައިކޯޓުން ވަނީ ކަނޑައަޅާފަ އެވެ.
އަންވަރު ދޫކޮށްލަން އަމުރުކުރި ގާޒީ ހުސައިން ފާއިޒްގެ ސުލޫކީ މައްސަލައެއް ބެލުމަށްފަހު، ޖޭއެސްސީން މިހާރު ވަނީ އޭނާ ފަނޑިޔާރުކަމުގެ މަގާމުން ވަކިކޮށްފަ އެވެ. އަދި އަންވަރު މިހާރު ހުރީ ކޯޓު އަމުރެއްގެ ދަށުން އަލުން ހައްޔަރުކޮށް، އޭނާގެ މައްޗަށް ދައުވާ ވެސް އުފުލާފަ އެވެ.
