ޣައްޒާގެ ޞުލްޙަ ބެލެހެއްޓުމަށް އެކުލަވާލާ “ބޯޑް އޮފް ޕީސް ފޯ ޣައްޒާ”ގައި ބައިވެރިވުމަށް ޕާކިސްތާނުގެ ބޮޑުވަޒީރު ޝެހްބާޒް ޝަރީފަށް ދަޢުވަތު އަރުވައިފިއެވެ. މި ދަޢުވަތު އޭނާ އަށް އެރުވީ އެ ބޯޑުގެ ޗެއާމަންގެ ޙައިސިއްޔަތުން، އެމެރިކާގެ ރައީސް ޑޮނަލްޑް ޓްރަމްޕެވެ.
ޝެހެބާޒް ޝަރީފަކީ ޓްރަމްޕަށް ބައިނަލްއަޤްވާމީ ޞުލްހައިގެ އިނާމު ޙައްޤު ކަމަށް ބުނެ ވަކާލާތު ކުރެއްވި ލީޑަރުންގެ ތެރެއިން އެންމެ ފާހަގަ ކޮށްލެވޭ މުސްލިމު ލީޑަރެވެ. ޝެހެބާޒް ވަނީ ޓްރަމްޕަށް ސެލިއުޓް ވެސް ނަގާފައެވެ. އެއީ މިދިޔަ އަހަރުގައެވެ.
ޕާކިސްތާނުގެ ބޮޑުވަޒީރު ޝެހްބާޒް ޝަރީފް ރައީސް ޓްރަމްޕަށް ސެލިއުޓް ކުރަނީ (އެމެެރިކާ / 2025)
ވައިޓް ހައުސްއިން ބުނީ އިސްރާއީލުން ޣައްޒާއާ ދެކޮޅަށް ކުރާ ހަނގުރާމަ ދާއިމީކޮށް ނިންމާލައި ޣައްޒާގެ ޞުލްޙަ ޤާއިމްކޮށް އަދި އާރާސްތު ކުރުމަށް އެކުލަވާލާފައިވާ ޞުލްޙައިގެ ބޯޑުގެ ދާއިމީ މެންބަރުކަން ބޭނުން ނަމަ 1 ބިލިއަން ޑޮލަރު ދޭ ޤައުމަކަށް އެ ބޯޑުގެ ދާއިމީ މެންބަރުކަން ލިބޭނެ ކަމަށެވެ.
ޣައްޒާ ހަނގުރާމަ ހުއްޓުވުމަށް ޓްރަމްޕް އެކުލަވާލާފައިވާ ޕްލޭނުގެ ދެވަނަ މަރުހަލާ ތަންފީޒު ކުރުމަށް ނޭޝަނަލް ކޮމިޓީ ފޯ ދަ އެޑްމިނިސްޓްރޭޝަން އޮފް ޣައްޒާ އާއި ފައުންޑިން އެގްޒެކެޓިވް ބޯޑާއި އިންތިޤާލީ އޮނިގަނޑު އެކުލަވައިލުމަށް ޣައްޒާގެ އެގްޒެކެޓިވް ބޯޑެއް ވެސް އެމެރިކާއިން އުފެއްދިއެވެ.
އަދި ތުރުކީގެ ރައީސް ރަޖަބް ޠައްޔިބް އެރްދޮޣާން ހިމެނޭ ގޮތަށް ޣައްޒާގެ ބޯޑާއި ގުޅުމަށް ޓްރަމްޕް ވަނީ ޢަރަބި އިސްވެރިންނަށް ވެސް ދައުވަތު ދީފައެވެ.
